MÄ MꞌU̱IHU̱ NGU YÄ KRISTIANU
«Mꞌe̱tꞌo guä hoki nuꞌu̱ yä xuñha ko ri ku»
Imäjinä ge nuꞌi gi ꞌmu̱i ha Galilea ha yä pa rä Hesu, ꞌne nubye̱ xkä ma pa Jerusalén pa gi ntini ha näꞌä rä ngo de gä Sofo (fädi ngu rä fiesta de las Cabañas). Xä zo̱ho̱ yä jäꞌi de ndunthi yä luga pa dä xo̱kämbeni Äjuä. Nuꞌi gi ne gi uni nꞌa rä ofrenda pa Jeoba. Entre ndunthi yä jäꞌi xkä mabu̱ gi gu̱tꞌä nꞌa ri tꞌäxi. Ora ya gä tso̱ni ha rä templo gi handi ge xa ñutsꞌi yä jäꞌi ꞌne nixi tsa toꞌo dä thogi; xi ndunthi nuꞌu̱ yä jäꞌi xä zo̱ni ꞌne gatꞌho ne dä presenta yä ofrenda. ¡Por fin bi zo̱ho̱ ri turno! Pe ora ya ma gi ntregabi yä majhä näꞌä ri tꞌäxi xkä tsitsꞌi, gä beni ge nꞌa rä ku pe̱ꞌtsi nꞌa rä xuñha kontra geꞌi (hñeti Mateo 5:24). Nuꞌi, hingi pädi mu̱ näꞌä ku xä ntini ꞌnehe ha rä templo o bi yꞌo ha mä nꞌa rä luga. Pe ¿te di debe gi pe̱fi pa gi hyoki näꞌä rä xuñha gi pe̱ꞌtsi kongeꞌä ja ngu bi mängä rä Hesu? Jaua yoho yä lista habu̱ hutsꞌi hñuu yä tsꞌofo ha kada nꞌaa. Märka näꞌä rä tsꞌofo gi handi ge xä ñho.
NÄꞌÄ DI DEBE GI PE̱FI
Mu̱ gi mbeni ge hinte mä raso ja pa dä nkue̱ kongeꞌi näꞌä rä ku, hingä mähyoni gi ma gi ñäui.
Mu̱ gi ma gi ñäui, japi dä rekonose ge gi pe̱ꞌtsi nraso o ge ꞌnehe tu rä tsꞌoki.
Mu̱ gi tu rä tsꞌoki o hinä, di debe gi ma gi ñäui näꞌä rä ku. Ko rä pasensia yꞌo̱de näꞌä di senti mäske hingä ma gi ntiende gatꞌho näꞌä ma dä mää. Mu̱ gä ne gä u̱ni o hinä, yꞌapäbi rä mpumbäte ko ngatꞌho ri koraso po näꞌä gä japi bi senti.
NÄꞌÄ DI DEBE DÄ ME̱FI NÄꞌÄ RÄ KU
Di debe dä xipäbi märꞌa yä ku de rä mhuntsꞌi näꞌä gä o̱tpäbi, pa njabu̱ nuꞌu̱ dä matsꞌi.
Di debe dä hyo̱xäꞌi rä thai po näꞌä rä xuñha gä pe̱ꞌtsihu̱. ꞌNehe di debe dä beñꞌäꞌi gatꞌho nuꞌu̱ yä detalle bi thogi ꞌne ma dä jaꞌi gi rekonose ge go gi tu rä tsꞌoki.
Di debe dä rekonose hängu rä balo ꞌne rä umilda gä pe̱ꞌtsi pa gä ñäui ꞌne pa gä apäbi rä mpumbäte. ꞌNepu̱ ko ngatꞌho rä koraso di debe dä rꞌaꞌi rä mpumbäte.
Mäpaya ya hindi unihu̱ yä tꞌäxi o märꞌa yä zuꞌue de gä ofrenda pa gä xo̱kämbenihu̱ Äjuä. Pe mäske njabu̱, ¿te mähyoni gä pe̱fihu̱ mu̱ di nehu̱ ge Äjuä dä numäñho näꞌä so̱kämbeni di umbäbihu̱?