YÄ TESORO DE RÄ NOYA ÄJUÄ | MATEO 18, 19
Nsu pa hingi mfeꞌtse ꞌne hingi japi dä mfeꞌtse märꞌaa
Rä Hesu bi hñutsꞌi rꞌa yä ejemplo pa bi ꞌñudi hängu rä peligro ja de gä japhu̱ dä mfeꞌtse märꞌaa, o gä hopäbihu̱ ge te dä jakhu̱ gä mfeꞌtsehu̱.
18:6, 7
Rä noya «mfeꞌtse» di signifika näꞌä di tꞌo̱tꞌe o näꞌä thogi ꞌne geꞌä japi nꞌa rä jäꞌi dä ꞌuengi de rä ꞌñuu Äjuä, japi dä me̱fi nꞌa rä tꞌo̱tꞌe näꞌä hinxä ñho o japi dä yꞌo̱tꞌe nꞌa rä pekado.
Toꞌo japi dä mfeꞌtse nꞌa rä jäꞌi, mänꞌa xä ñho dä tsꞌu̱tuäbi ha rä yꞌu̱ga nꞌa rä do de gä mulinu ꞌne dä tꞌe̱ntꞌi ha rä ndehe.
Yä do yä mulinu
18:8, 9
Rä Hesu bi ꞌñembäbi nuꞌu̱ yä de̱ni ge mu̱ nꞌa de nuꞌu̱ yä da o nꞌa de nuꞌu̱ yä yꞌe̱ mi japäbi dä mfeꞌtse, mänꞌa xmä ñho dä hñäki de geꞌu̱.
Mänꞌa xä ñho gä ꞌme̱dihu̱ nꞌa xe̱ni de mä ndoyꞌohu̱ pa dä za gä ku̱tꞌihu̱ ha rä Tsꞌu̱tꞌhui Äjuä, ke gä o̱thu̱ ntsꞌe̱di po gä pe̱ꞌtsihu̱ di xo̱ge mä ndoyꞌohu̱ ꞌne gä huadihu̱ ha rä Gehena, näꞌä di signifika rä du pa nzäntho.
Xi nuga, ¿ngu te mä tꞌo̱tꞌe dä za dä jakägi gä mfeꞌtse? ¿Te dä za gä pe̱fi pa hinte dä jakägi gä mfeꞌtse? ¿Te dä za gä pe̱fi pa hingä japäbi dä mfeꞌtse märꞌaa?