«Njaua dä za gi predika», ¿hanja ri ꞌñehe gä usahu̱ nuya yä presentasion?

Dende rä enero de rä 2018, bi mu̱di bi thutsꞌi yä presentasion ha rä Programä pa yä Mhuntsꞌi Rä Mꞌu̱i ꞌne yä ꞌMe̱fi yä Kristianu. ¿Hanja ri ꞌñehe gi usa nuya yä presentasion ora gi uni nꞌa rä thoꞌtsi o nuꞌmu̱ gi predika?

Ora di tokaꞌi gi uni nꞌa rä thoꞌtsi. Mähyoni gi usa näꞌä rä mu̱di ntꞌani huxpu̱, rä testo ꞌne näꞌä rä ntꞌani pa rä rebisita. Pe hingä mähyoni gi mängä kada nꞌa de nuꞌu̱ yä noya no̱ni ha nuꞌu̱ yä bideo utkägihu̱ hanja gä predikahu̱. Por ejemplo, mu̱ ha rä bideo gi handi ge rä publikador di predika ha nꞌa rä hospital, ha ri asignación dä za gi ꞌñudi ge gi predika ha nꞌa rä tai o ha mä nꞌa rä luga. Dä za gi paati hanja gi fu̱di ꞌne hanja gi esplika. ꞌNehe, mäske ha ri asignación hingi hutsꞌi njabu̱, dä za gi usa nꞌa rä bideo o nꞌa rä he̱ꞌmi näꞌä ehe ha «Yä erramienta pa gä udihu̱».

Ora gi predika. Nuꞌu̱ yä presentasion ehe habu̱ enä «Njaua dä za gi predika», xä thutsꞌi pa ho̱nse̱ dä rꞌakägihu̱ yä idea. Mu̱ nꞌa rä jäꞌi bi yꞌo̱de xä ñho, dä za gi sigi gi ñäui ꞌne asta dä za gi sigi ko näꞌä rä ntꞌani ꞌne näꞌä testo ehe pa rä rebisita. Mu̱ di ja mꞌe̱di, dä za gi paati nꞌa tu̱i hanja ehe näꞌä presentasion ꞌne dä za gi usa mä nꞌa rä ntꞌani o mä nꞌa rä testo näꞌä gi handi ge mänꞌa dä ho yä jäꞌi de rä territorio. Por ejemplo, ¿ja te xä thogi ha näꞌä luga ꞌne yä jäꞌi ne dä ñä de geꞌä? Nuꞌmu̱, nuꞌu̱ yä presentasion ehe habu̱ enä «Njaua dä za gi predika» dä za gi usa ja ngu gi handi dä hogi, kontal gi ꞌñuti yä jäꞌi de rä Noya Äjuä (1Co 9:22, 23).