¿Pa te mi tꞌuni yä ofrenda mäyaꞌmu̱?

1:3; 2:1, 12; 3:1

Ha näꞌä rä Ley bi tꞌumbäbi Moisés, mi mhändabi yä israelita dä uni yä ofrenda o yä sacrificio. Rä Zi Dada Jeoba xa mi numäñho nuyu̱ yä ofrenda. Nuyu̱ yä ofrenda bi representa näꞌä rä sacrificio bi uni rä Hesu (Heb 8:3-5; 9:9; 10:5-10).

• Yä israelita mi debe dä uni de gä ofrenda nuꞌu̱ yä zuꞌue mi xä ñho hingä nuꞌu̱ mi hñeni. Njabu̱ ꞌnehe näꞌä rä ndoyꞌo bi uni rä Hesu, mrä perfecto ꞌne hinte mä tsꞌoki mi ñꞌoui (1Pe 1:18, 19).

• Ora nꞌa rä israelita mi uni nꞌa rä ofrenda näꞌä mi tsꞌätꞌi, pe̱ꞌtsi te mi uni gatꞌho ꞌne hinte mi kohui pa dä zi. Njabu̱ ꞌnehe, rä Hesu bi umbäbi mäxo̱ge rä te rä Zi Dada Jeoba.

• Nuꞌu̱ yä israelita mi uni nuꞌu̱ yä ofrenda de comunión, mi udi ge mi ꞌmu̱i en paz ko Äjuä. Njabu̱ ꞌnehe nuꞌu̱ tsi de rä thuhme ꞌne de rä binu ha rä Fenäte de rä du rä Hesu, udi ge ꞌmu̱i en paz ko Äjuä.