Hulda bi konsigi näꞌä xa mi desia

MU̱ NUꞌI xkä ntso̱nte o̱tꞌe rꞌa yä je̱ya ha nꞌa rä tꞌu̱kä isla rä thuhu Sangir Besar (Indonesia), zäi ge xkä konose hñuu yä zi nju nuꞌu̱ mi fädi ngeꞌä mi predika. Pe ꞌnehe mi fädi ngeꞌä po nꞌa rä tiempo njatꞌä mi thandi ge mi yꞌo ha rä ñäni rä ndehe. ¿Te mi pe̱fini nuyu̱ yä zi nju?

Nde, nuyu̱ yä zi nju mi ku̱tꞌi ha rä ndehe pa mi ku̱i yä do —myä ndängi ngu nꞌa rä pelota de gä fútbol— ꞌne mi hudi ha rä ñäni rä ndehe ꞌne ko nꞌa rä martillo mi tehmi nuꞌu̱ yä do pa mi hoki yä graba. ꞌNepu̱ ko yä cubeta de gä plástico mi theni nuya yä graba ꞌne mi u̱tꞌi ha rꞌa yä rꞌo̱za ꞌne mi pa. Nuya yä graba mri usa pa mi thoki yä däꞌñu, hänge mi tso̱ni yä däta bo̱jä pa mi hätsꞌi nuya yä graba.

Nꞌa de nuya hñuu yä zi nju rä thuhu Hulda. Ko näꞌä mi tähä nunä zi nju, mi fatsꞌi rä familia ko nuꞌu̱ yä gasto mi pe̱ꞌtsi. Pe nubye̱ rä zi nju Hulda mi ne dä usa näꞌä mi tähä pa dä dai nꞌa rä tablet, ngeꞌä mi ne dä usa rä aplicación JW Library^®. Hulda mi pädi ge näꞌä imformäsio ꞌne nuꞌu̱ yä bideo ehe ha nunä aplicación, ma xä matsꞌi pa mänꞌa xä predika xä ñho ꞌne pa mänꞌa xä ntiende näꞌä mi heti ha rä Mäkä Tꞌofo.

Durante nꞌa nzänä mädee, Hulda bi mpe̱fi yo ora tatꞌä xudi. Hulda bi logra bi hyoki nꞌa tꞌu̱kä camioneta rä graba, ꞌne ko näꞌä rä bojä bi dähä bi za bi dai nꞌa rä tablet.

Rä zi nju Hulda enä: «Xa bi zabigi ꞌne gatꞌho mä ndoyꞌo xmä ñꞌu̱. Pe nguntꞌä dä pumfri näꞌä rä nzabi ora ya ndi hñä mä tablet. Nubye̱ hää di predika mänꞌa xä ñho, ꞌne hingi jaki xä hei gä ñhoki ko näꞌä rä imformäsio pa yä mhuntsꞌi». Rä nju Hulda ꞌnehe enä ge rä tablet xa bi matsꞌi mi zo̱ho̱ rä COVID-19, ngeꞌä nubye̱ tanto yä mhuntsꞌi ngu rä predicación mi tꞌo̱tꞌe por zoom. ¡Hängu di johyahu̱ gä pädihu̱ ge Hulda bi za bi dai rä tablet!