¿ꞌMu̱i en kontra yä testigo rä Jeoba de yä vacuna?
Hinä. Yä testigo rä Jeoba hingi ꞌmu̱i en kontra de yä vacuna. Nuꞌu̱ di mbeni ge kada nꞌa rä kristianu ri ꞌñepäbi dä desidise̱ mu̱ dä hñäni nꞌa rä vacuna o hinä. Ndunthi yä testigo rä Jeoba di desidi dä hñäni yä vacuna.
Di honihe nuꞌu̱ yä ꞌñethi mänꞌa xä ñho ꞌne xa di balorahe gatꞌho näꞌä pe̱fi rä ciencia po dä hyombäbi rä ꞌñethi nuꞌu̱ yä hñeni ja. ꞌNehe xa di jamädihe po gatꞌho näꞌä pe̱fi yä mediko mänꞌa ora xa di ntu̱ngi nꞌa rä ñheni.
Yä testigo rä Jeoba xä mfaxte mähye̱gi ko yä autorida. Por ejemplo, dende bi mu̱di rä pandemia de rä COVID-19, yä testigo rä Jeoba xä gu̱ki ndunthi yä tsꞌofo ha nthebetho yä idioma ha nunä página de Internet pa di mbitabi yä jäꞌi dä sigi dä kumpli ko nuꞌu̱ yä tsꞌofo xä uni yä autorida de kada nꞌa rä luga. Por ejemplo, xä animä hindä tꞌo̱tꞌe yä mhuntsꞌi, mu̱ toꞌo hñeni mänꞌä dä hogi hindä bo̱ni de rä nguu, mu̱ toꞌo yꞌo habu̱ yꞌo märꞌa yä jäꞌi dä hogi dä ꞌmai yabu̱ de märꞌaa, gä nxu̱yꞌe̱hu̱ njatꞌä, gä usahu̱ yä cubreboca, ꞌne märꞌa yä tsꞌofo näꞌä xä uni yä autorida ꞌnehe (Romanos 13:1, 2).
Po ndunthi yä je̱ya nuꞌu̱ yä rebista xä gu̱ki yä testigo rä Jeoba xä uni nuya yä tsꞌofo:
Kada nꞌa rä jäꞌi ri ꞌñepäbi dä desidise̱ hanja dä su rä nzaki (Gálatas 6:5).
«[Nunä revista] hingi mää te mä ꞌñethi o te mä terapia mänꞌa xä ñho ke märꞌaa. Nunä se̱he̱ uni rä imformäsio ꞌne kada nꞌa rä jäꞌi go ri ꞌñepäbi dä desidise̱ te dä me̱fi» (¡Despertad!, 8 de febrero de 1987).
«Go ma gi desidise̱ mu̱ nuꞌi o ri bätsi ma dä hñäni nꞌa rä vacuna o hinä» (¡Despertad!, 8 de diciembre de 1965).
Di honihe rä ꞌñethi, ngeꞌä pa gekhe rä te xa ja ndunthi rä muui (Hechos 17:28).
«Yä testigo rä Jeoba di usa xä ñho näꞌä rä mfädi pe̱ꞌtsi yä mediko pa njabu̱ dä ñꞌo̱the. Nuꞌu̱ di mädi yä te ꞌne mientra hindä nkontraui näꞌä mängä rä Mäkä Tꞌofo, nuꞌu̱ pe̱fi gatꞌho näꞌä dä za pa dä su yä nzaki» (La Atalaya, 1 de mayo de 1976).
«Hingä nꞌa rä pekado gi ma ko nꞌa rä mediko pa gi su ri nzaki ꞌne pa gi ꞌmu̱i mä ndunthi yä je̱ya. Yä testigo rä Jeoba hinte mä xuñha pe̱ꞌtsi de dä hñäni nꞌa rä tratamiento. ꞌNe ja ngu Lucas —nꞌa rä kristianu näꞌä mrä mediko de rä mu̱di siglo—, rꞌa yä testigo rä Jeoba di mpe̱fi ꞌnehe de gä mediko [...]. Pa yä testigo rä Jeoba xa ja ndunthi rä muui gatꞌho näꞌä rä mfatsꞌi uni yä mediko, ꞌne xa di jamädi po gatꞌho näꞌä pe̱fiꞌu̱ pa dä yꞌo̱the yä jäꞌi» (La Atalaya, 1 de febrero de 2011).