¿Por hanja yä testigo rä Jeoba xä paati rꞌa de nuꞌu̱ yä ntꞌudi?

Gatꞌho näꞌä di kamfrihe di häihe de rä Mäkä Tꞌofo. Pe koꞌmu̱ xtä ntiendehe rꞌamätsꞌu̱u̱ näꞌä hutsꞌi, rꞌabu̱ xä ja mꞌe̱di gä paatihe näꞌä di kamfrihe.a

Nuꞌu̱ yä noya hutsꞌi ha Proverbios 4:18 faxkägihu̱ gä ntiendehu̱ por hanja mähyoni dä tꞌo̱tꞌe nuya yä mpadi. Nunä testo enä: «Pe rä ꞌñuu nuꞌu̱ o̱tꞌe rä justisia ꞌñenä näꞌä hyaꞌtsi yꞌo ri nheki de gä xudi, yꞌo ri hue̱xki asta xa dä hyatsꞌi xä ñho». Ja ngu ora yꞌo ri hyatsꞌi, mänꞌa japi dä nheki xä ñho näꞌä te ja habu̱ di ꞌmu̱ihu̱. Njabu̱ ꞌnehe, Äjuä japi gä ntiendehu̱ rꞌamätsꞌu̱u̱ näꞌä udi rä Noya ꞌne ha näꞌä rä tiempo ri ꞌñehe gä pädihu̱ (1 Pedro 1:10-12). ꞌNe rä Biblia bi mää ge ha rä «tiempo de rä fin» näꞌä rä mfädi ma xä zo̱ho̱ dä ndunthi (Daniel 12:4).

Hänge hindi debe dä sorprendegihu̱ nixi gä tumämu̱i po nuya yä mpadi. Asta rꞌa de nuꞌu̱ yä ꞌme̱go Äjuä de mäyaꞌmu̱ himi ntiende xä ñho mi ndaꞌä rä bolunta Äjuä. Pe ora bi ntiende, nuꞌu̱ bi paati näꞌä mi mbeniꞌu̱.

• Moisés mi ne xä gu̱ki yä israelita de Egipto 40 yä je̱ya änte de näꞌä rä tiempo xki hñutsꞌi Äjuä pa xä gu̱ki (Hechos 7:23-25, 30, 35).

• Yä apostol himbi ntiende näꞌä rä profecía mi mää ge rä Mesías mi pe̱ꞌtsi te xä du ꞌnepu̱ ma xä resusita (Isaías 53:8-12; Mateo 16:21-23).

• Rꞌa de nuꞌu̱ yä mu̱di kristianu himi ntiende xä ñho hämꞌu̱ ma xä zo̱ho̱ rä pa Jeoba (2 Tesalonicenses 2:1, 2).

Ngu bi thogi rä tiempo, Äjuä bi matsꞌi nuꞌu̱ yä ꞌme̱go de mäyaꞌmu̱ pa bi paati näꞌä mi mbeni. ꞌNe mäpaya ꞌnehe di bäntebihu̱ Äjuä pa dä maxkägihu̱ gä ntiendehu̱ mänꞌa xä ñho rä Noya (Santiago 1:5).