Di o̱tꞌehe yä mhuntsꞌi po mäde de yä videoconferencia

Ha ndunthi yä dähni de rä xiꞌmhai, yä autorida xä mända ge hingi debe dä muntsꞌi ndunthi yä jäꞌi ha nꞌadä rä luga. Po rängeꞌä, yä testigo rä Jeoba di jamäsuhe nunä mhända xä uni yä autorida, pe nsinke gä cancelahe nuꞌu̱ mä mhuntsꞌihe. Po rängeꞌä, di usahe nꞌa rä aplicación rä thuhu Zoom pa di o̱tꞌehe nuya yä mhuntsꞌi po mäde de yä videoconferencia.

Pa gä pe̱ꞌtsihe yä mhuntsꞌi tatꞌä semänä, rä Cuerpo Gobernante bi aprueba drä ñꞌusa nuꞌu̱ yä donäsio pa njabu̱ kada nꞌa rä mhuntsꞌi dä me̱ꞌtsi nꞌa rä kuenta de Zoom. Xa bi hogi nunä desision, ngeꞌä ndunthi yä mhuntsꞌi himi tsa dä gutꞌi 15 o 20 yä dolar pa dä me̱ꞌtsi nꞌa rä kuenta de Zoom. Ri mu̱di ndunthi yä mhuntsꞌi mi usa näꞌä rä aplicación gratis, pe himi tsa dä ꞌmu̱i conectado ndunthi yä ku po ndunthi rä tiempo. Po rängeä, rä Cuerpo Gobernante bi hyandi ge mänꞌa xä ñho dä dai nꞌa rä kuenta pa kada nꞌa rä mhuntsꞌi. Asta mäpaya, 65.000 yä mhuntsꞌi, ha thogi de 170 yä dähni di benefisia de nunä arreglo.

Rä mhuntsꞌi Kairagi, de rä dähni Manado (bi kohi ha Célebes Septentrional, Indonesia), bi zopu̱ näꞌä rä aplicación gratis ꞌne bi mu̱di dä usa nꞌa de nuꞌu̱ yä kuenta bi dai rä hnini Äjuä. Rä ku Hadi Santoso pede näꞌä bi thogi: «Koꞌmu̱ ya hingi ja ꞌme̱di gä po̱nihe de rä mhuntsꞌi kada 40 minuto ꞌne gä ku̱tꞌihe mänꞌaki, nubye̱ gatꞌho yä ku tsa dä hyandi yä mhuntsꞌi, asta nuꞌu̱ yä zi ku di japi xä ñhei dä usa nunä aplicación».

Léster Jijón, nꞌa rä anciano de rä mhuntsꞌi Guayacanes Oeste, de rä dähni Guayaquil (Ecuador), enä: «Koꞌmu̱ ya zi ku xa yä zi hyoya, ndunthi de nuꞌu̱ yä mhuntsꞌi himi pe̱ꞌtsi konte dä gutꞌi nꞌa rä kuenta de Zoom. Xa di johyahe ngeꞌä rä hnini Äjuä bi gutꞌi pa gä pe̱ꞌtsihe nꞌa rä kuenta. Nubye̱ tsa gä mbitabihe mä ndunthi yä zi jäꞌi pa dä ntini ha yä mhuntsꞌi».

Rä ku Johnson Mwanza, de rä mhuntsꞌi Norte Ngwerere, de rä dähni Lusaka (Zambia), bi yꞌofo: «Ndunthi yä ku xä ꞌñengägihe: “Nubye̱ di handihe hängu di mäkägihe rä hnini Äjuä. Hinte mä duda di pe̱ꞌtsihe ge rä Zi Dada Jeoba xa di mäkägihe”».

Pa bi za bi thai nuya yä kuenta de Zoom, bri ñꞌusa nuꞌu̱ yä donäsio xä tꞌuni pa dä tꞌumbäbi rä mfatsꞌi nuꞌu̱ yä ku ora ja nꞌa rä tsꞌo thogi. Gehya yä donäsio dri ꞌme̱hni pa mä mäkä ꞌme̱fihu̱ po mäde de donate.jw.org. Di jamädihe ndunthi nuya yä donäsio gi unihu̱. Njabu̱ ꞌnehe di tꞌumbäbi rä mfatsꞌi gatꞌho nuꞌu̱ mä kuhu̱ di ñhandui yä tso thogi ha märꞌa yä luga de rä xiꞌmhai (2 Corintios 8:14).