Por hanja bi jui de ha rä uädri

HYANDI te thogi nubye̱. Rä Adan ꞌne rä Eba di jui de nunä rä uädri Eden. ¿Gi pädi por hanja?

Ngeꞌä bi me̱fi nꞌa rä däta tsꞌo tꞌo̱tꞌe. Hänge Jeoba bi kastiga. ¿Gi pädi te bi me̱fi rä Adan ꞌne rä Eba?

Himbi yꞌo̱de näꞌä xki mändabi Jeoba. Äjuä xki xipi ge xä za xä zi nuꞌu̱ yä fruta yä zaa mi ja ha rä uädri. Pe mi ja nꞌa rä zaa näꞌä xki mändabi Jeoba ge hindä zipä rä fruta; xki xipi ge mu̱ xä zi, nuꞌmu̱ xä du. Näꞌä rä zaa mi su Jeoba pa gese̱ꞌä. Di pädihu̱ ge hinxä ñho gä thatꞌihu̱ näꞌä hingo mä me̱tihu̱, ¿hänge hää? Nuꞌmu̱, ¿te bi thogi?

Nꞌa rä pa, nuꞌmu̱ rä Eba mi yꞌose̱ ha rä uädri, nꞌa rä kꞌeñä bi nzofo. ¡Hyandi! Näꞌä rä kꞌeñä bi xipi rä Eba dä zi näꞌä rä fruta xki mändabi Jeoba ge hindä zi. Jeoba hixki hyoki yä kꞌeñä pa dä ñä. Hänge näꞌä rä kꞌeñä hingo geꞌä mi ñä, mi ꞌmu̱ mänꞌa rä jäꞌi näꞌä toꞌo mi ñä. ¿Toꞌoꞌä?

Hingo mi geꞌä rä Adan. Nuꞌmu̱, ¿toꞌoꞌä? Nꞌa de nuꞌu̱ yä e̱nxe̱ xki hyoki Äjuä änte dä hyoki rä Xiꞌmhai. Hää, nuꞌu̱ yä e̱nxe̱ hingi tsa toꞌo dä hyandi. Nꞌa de nuꞌu̱ yä e̱nxe̱ bi zo̱ho̱ bi ñꞌexmänsu. Bi mu̱di bi mbeni ge xä za xä zo̱ho̱ dä mända ngu Jeoba pa gatꞌho yä e̱nxe̱ ꞌne yä jäꞌi go dä yꞌo̱te ꞌne hingo dä yꞌo̱te Jeoba. Näꞌä rä e̱nxe̱ go geꞌä bi japi dä ñä näꞌä rä kꞌeñä.

Näꞌä rä e̱nxe̱ bi hyatꞌi rä Eba. Bi ꞌñembäbi ge mu̱ xä zi näꞌä rä fruta, ma xä zo̱ho̱ xä nja ngu Äjuä, rä Eba bi ñꞌeme o bi gamfri. Hänge bi zi näꞌä rä fruta, ꞌne rä Adan bi zi ꞌnehe. Rä Adan ꞌne rä Eba himbi yꞌo̱te Äjuä hänge bi jui de näꞌä rä uädri habu̱ mi ꞌmu̱i.

Pe nꞌa rä pa, Äjuä ma dä hyoki gatꞌho rä Xiꞌmhai xi mähotho ngu näꞌä rä uädri Eden. Mꞌe̱fa ma gä handihu̱ hanja nuꞌi dä za gi mfaste ꞌnehe. Nubye̱ ma gä handihu̱ te bi thogi rä Adan ꞌne rä Eba.