Rä Jose bi tsapi yä ku

RÄ Jose mi ne dä bädi mu̱ nuꞌu̱ 10 yä ku mädä ya xki paati yä mꞌu̱i. Mu̱ ya mi ja yä nhuekäte o mñä tsꞌomꞌu̱itho. Hänge bi ꞌñenä: “Nuꞌähu̱ se̱he̱ xki ꞌñehehu̱ gi hyanthu̱ te mä ñho pe̱ꞌtsi mä hninihe”.

Nuꞌu̱ bi dädi: “Hinä, hingä geꞌä mä ꞌme̱fihe. Nuje hingä dyä tsꞌomꞌu̱ihe. Gatꞌho nuje di nkuhe. Ndi 12 ndi nkuhe. Pe nꞌa mä kuhe ya joꞌo, ha näꞌä mä tꞌu̱kä kuhe bä kohi ha rä ngu ko mä dadahe”.

Rä Jose bi ja ge ngu himi kamfribi. ꞌNe bi mända dä jotꞌi ha rä fadi näꞌä rä ku mrä thuhu Simeon, ꞌne nuꞌu̱ märꞌa bi hyopi dä hñätsꞌi te dä zi ꞌne dä mengi ha yä nguu. Pe bi ꞌñembi: “Xki pengihu̱, pe̱ꞌtsi dä ehe kongeꞌähu̱ näꞌä ri tꞌu̱kä kuhu̱”.

Mi zo̱ni ha yä nguu ha rä hnini Kanään, nuꞌu̱ yä ku bi xipäbi rä dada gatꞌho näꞌä xki thogi. Rä Jakob xa bi durämu̱i ꞌne bi ꞌñenä: “Rä Jose ya joꞌo, ꞌne nubye̱ rä Simeon joꞌo ꞌnehe. Hingä hopäbi to dä zitsꞌi rä Benjamin”. Pe nuꞌmu̱ bi thege yä ñhuni, rä Jakob pe̱ꞌtsi bi hyopi nuꞌu̱ yä tꞌu̱ bi zitsꞌi rä Benjamin pa Ejipto, pa dä hä mänꞌa tu̱i rä ñhuni.

Nubye̱, rä Jose bi hyandi mi xä mani yä ku. Xi bi johya ngeꞌä bi hyandi rä Benjamin, rä tꞌu̱kä ku. Hää, pe ninꞌa de nuyu̱ yä ku himi pädi ge nuni rä ñꞌo̱ho̱ ja rä däta nsu, geꞌä rä Jose. Nubye̱ rä Jose bi ja nꞌa rä tꞌo̱tꞌe pa dä tsapi nuꞌu̱ 10 yä ho̱ku.

Rä Jose bi mändabi yä ꞌme̱go dä ñuꞌtsuäbi rä ñhuni gatꞌho nuꞌu̱ yä rꞌo̱za. ꞌNehe, rä Jose bi mända dä tꞌe̱ntꞌuäbi näꞌä rä kopa de gä plata xa mi ho ha rä rꞌo̱za rä Benjamin, ꞌne nuꞌu̱ yä ku himbi da ngue̱nda. Mꞌe̱fa de xki ma ꞌne ya xki ñꞌo zi yabu̱, rä Jose bi me̱hni yä ꞌme̱go pa dä de̱ni nuꞌu̱ yä ku. Mi zu̱di, nuꞌu̱ yä ꞌme̱go bi ꞌñembäbiꞌu̱: “¿Por hanja xkä pepäbihu̱ rä kopa de gä plata mä hmuuhe?”.

Gatꞌho nuꞌu̱ yä ku rä Jose bi ꞌñenä: “Hinte mä kopa xtä pepäbihe, mu̱ gi tinihu̱ ge nꞌa de gekhe di pe̱ꞌtsihe, geꞌä gi hyohu̱”.

Hänge nuꞌu̱ yä ꞌme̱go bi xenduäbi gatꞌho yä rꞌo̱za, ꞌne bi zu̱di näꞌä rä kopa ha rä rꞌo̱za rä Benjamin ja ngu gi handi ha rä kꞌoi. Nuꞌu̱ yä ꞌme̱go bi ꞌñenä: “Nuꞌähu̱ dä za gi mahu̱, pe rä Benjamin dä ehe kongekhe”. Xi nubye̱, ¿te ma dä me̱fi nuꞌu̱ 10 yä ho̱ku rä Jose?

Gatꞌho bi mengi ko rä Benjamin ha rä ngu rä Jose. Rä Jose bi ꞌñembäbi yä ku: “Gatꞌho dä za gi pengihu̱ ha ri nguhu̱, pe rä Benjamin pe̱ꞌtsi dä gohi pa mä ꞌme̱go”.

Nubye̱ rä Juda bi ñä ꞌne bi ꞌñenä: “Mu̱ gä tso̱nihe ꞌne dä hyandi mä dadahe ge hindi ñꞌohe nuni rä metsi, näꞌä ma dä du, ngeꞌä xa di mädi. Hänge, di adi ko rä mäte, go dä tsämgägi gä mꞌe̱go, pe hyopi dä ma nuni rä metsi”.

Rä Jose bi hyandi ge yä ku xki paati yä mꞌu̱i, ya mñä hojäꞌi ꞌne mi ja yä nhuekäte. Nubye̱ ma gä handihu̱ te bi me̱fi rä Jose.