Rä Job nzäntho bi yꞌo̱te Äjuä

¿HINGI hueki nuni zi jäꞌi di hñeni? Rä thuhu rä Job, go rä ꞌme̱hñä nuni ñäui. ¿Gi pädi te xipi rä Job? “Tsani Äjuä ꞌne tu.” Ma gä handihu̱ por hanja näꞌä rä ꞌme̱hñä rä Job bi mängä nuꞌu̱ yä tsꞌo noya, ꞌne por hanja rä Job xi bi thogi ndunthi yä xuñha.

Rä Job mi o̱te nzäntho Jeoba. Mi ꞌmu̱i ha rä hai Us, getbu̱ de Kanään. Jeoba xa mi mädi rä Job, pe mi ꞌmu̱i toꞌo mi u̱tsa rä Job, ¿gi pädi toꞌoꞌä?

Geꞌä rä Zithu, rä Diablo. Beni, rä Zithu geꞌä rä tsꞌo e̱nxe̱ xa di u̱tsa Jeoba. Go geꞌä bi japi rä Adan ꞌne rä Eba himbi yꞌo̱te Jeoba, ꞌne mi hurämu̱i ge xä za xä ꞌueke gatꞌho yä jäꞌi pa hinxä yꞌo̱te Jeoba. Pe, ¿bi me̱fi näꞌä mi beni? Hinä. Beni, dä pädihu̱ ge ndunthi yä ñꞌo̱ho̱ ꞌne yä ꞌme̱hñä bi yꞌo̱te Äjuä. ¿Hängu de geꞌu̱ gi beni?

Mꞌe̱fa de bi du rä Jakob ꞌne rä Jose ha Ejipto, de gatꞌho rä Xiꞌmhai, se̱he̱ rä Job geꞌä mänꞌa xa mi o̱te Jeoba. Jeoba mi ne dä ꞌñuti rä Zithu ge hinxä za xä japi dä ntsꞌomꞌu̱i gatꞌho yä jäꞌi, ꞌne bi ꞌñembi: “Hyandi rä Job. Hyandi hanja nzäntho pe̱fi näꞌä di xipi”.

Pe rä Zithu bi dädi ꞌne bi ꞌñenä: “Näꞌä o̱de ngeꞌä gi jäpi ꞌne gi umbi ndunthi yä ñho. Pe mu̱ gi hñämbäbi gatꞌho näꞌä pe̱ꞌtsi, ma dä zañꞌäꞌi”.

Hänge Jeoba bi ꞌñembäbi: “Gi ma. Hñämbäbi ꞌne yꞌo̱ꞌtuäbi rä Job gatꞌho nuꞌu̱ yä ntsꞌomꞌu̱i gi beni. Ma gä handihu̱ mu̱ ge mäjuäni dä zangägi. Pe näꞌä hää, oxki ma gi hyo”.

Mꞌe̱tꞌo, rä Zithu bi japi rꞌa yä jäꞌi bi be nuꞌu̱ yä zuꞌue ꞌne yä kameyo mi pe̱ꞌtsi rä Job, ꞌnepu̱ bi hyopäbi yä de̱ti. ꞌNe ko nꞌa rä däta bu̱nthi bi hyopäbi nuꞌu̱ 10 yä bätsi. Mꞌe̱fa, bi japi bi zu̱di nꞌa rä tsꞌo ñheni. Rä Job xi bi sufri ndunthi. Hänge näꞌä rä ꞌme̱hñä bi ꞌñembäbi: “Tsani Äjuä ꞌne tu”. Pe rä Job himbi ne. ꞌNehe, hñuu yä ñꞌo̱ho̱ nuꞌu̱ hingä mñä hogä ntsitsꞌi, bä ehe ꞌne bi ꞌñembäbi rä Job ge xki me̱ꞌtsi nꞌa rä mꞌu̱i xä ntsꞌo. Pe rä Job bi sigi bi yꞌo̱te Äjuä.

Hänge Jeoba xa bi johya, ꞌne mꞌe̱fa bi jäpi rä Job, ja ngu gi handi ha rä kꞌoi. Bi yꞌo̱the de näꞌä rä ñheni. Rä Job bi me̱ꞌtsi mä 10 yä bätsi xa mähotho. Bi me̱ꞌtsi yo mꞌiki de nuꞌu̱ yä zuꞌue, yä de̱ti ꞌne yä kameyo xki ꞌme̱di.

Xi nuꞌi, ¿nzäntho ma gi yꞌo̱te Äjuä? Mu̱ gi ja njabu̱, Äjuä ma dä jäpiꞌi ꞌnehe. Ma dä za gi ꞌmu̱i pa nzäntho xti nheki gatꞌho rä Xiꞌmhai xa mähotho ja ngu mi nheki rä uädri Eden.