Nꞌa rä bo̱ka bi mända ha Ejipto

NUYU̱ yä ñꞌo̱ho̱ gi handi, di japäbi dä mpe̱fi yä jäꞌi. ¡Hyandi nuni rä ñꞌo̱ho̱ fe̱tꞌi nꞌa rä me̱fi ko nꞌa rä nthähi! Nuyu̱ yä jäꞌi di mpe̱fi bä ehe de ha rä familia rä Jakob, tꞌembi yä israelita. Ha nuyu̱ yä ñꞌo̱ho̱ di japäbi dä mpe̱fi, tꞌembi yä ejipsio. Yä ejipsio bi zo̱ho̱ bi ja ꞌme̱go yä israelita. ¿Por hanja bi thogi njabu̱?

Po ndunthi yä je̱ya, gatꞌho rä familia rä Jakob bi ntsitsꞌi xä ñho ko yä ejipsio. Rä Jose go geꞌä mi su yä israelita ngeꞌä mi pe̱ꞌtsi nꞌa rä däta nsu mꞌe̱fa de rä Faraon näꞌä mrä ndä ha Ejipto. Pe rä Jose bi du. ꞌNe mänꞌa rä Faraon näꞌä himi handi xä ñho yä israelita, bi zo̱ho̱ bi mända ha Ejipto.

Nuni rä bo̱ka Faraon bi ja ꞌme̱go yä israelita. ꞌNe bi hñutsꞌi rꞌa yä bo̱ka ñꞌo̱ho̱ nuꞌu̱ himi ja yä nhuekäte pa mänꞌa bi japi yä israelita bi mpe̱fi ndunthi, ꞌne bi japi bi hyoki yä hnini pa rä Faraon. Pe yä israelita mi yꞌo mi xu. Mꞌe̱fa de rꞌa yä je̱ya, yä ejipsio mi tsu ge yä israelita xä xu ꞌne xä nja ndunthi yä tsꞌe̱di.

¿Gi pädi te bi mända rä Faraon? Bi nzofo nuꞌu̱ yä ꞌme̱hñä mi fatsꞌi yä israelita dä mꞌu̱i yä bätsi, ꞌne bi mändabi: “Pe̱ꞌtsi gi hyohu̱ nuꞌu̱ yä metsi dä mꞌu̱i”. Pe nuꞌu̱ yä ꞌme̱hñä mñä hojäꞌi hänge himbi ne bi hyo nuꞌu̱ yä zi ꞌue̱ne.

Hänge nubye̱ rä Faraon bi mändabi gatꞌho yä ejipsio: “Hyohu̱ gatꞌho nuꞌu̱ yä metsi ja xä mꞌu̱i. Pe nuꞌu̱ yä nxutsi ogi hohu̱”. ¿Hänge xi nꞌa rä tsꞌo tꞌo̱tꞌe näꞌä bi mända? Ma gä handihu̱ hanja bi bongi nꞌa rä zi metsi.