Por hanja bi bo̱ni rä Moises

HYANDI rä Moises; bi bo̱ni de Ejipto. ¿Dä za gi hyandi nuyu̱ yä ñꞌo̱ho̱ di nte̱hui rä Moises? ¿Gi pädi por hanja nuyu̱ ne dä hyo rä Moises? Ma gä handihu̱ mu̱ dä za gä pädihu̱ por hanja.

Rä Moises bi te ha rä ngu rä Faraon, näꞌä rä ndä de Ejipto. Rä Moises bi zo̱ho̱ bi me̱ꞌtsi yä däta nsu ꞌne rä mfädi. Rä Moises mi pädi ge hingä mrä ejipsio ꞌne ge yä dada mñä israelita ꞌne mi mꞌe̱go.

Nꞌa rä pa, nuꞌmu̱ mi pe̱ꞌtsi 40 yä je̱ya, rä Moises bi ma bä handi te mi thogi yä israelita. Bi hyandi ge mi tꞌo̱ꞌtuä yä ntsꞌomꞌu̱i. Bi hyandi nꞌa rä ejipsio mi fe̱tꞌi nꞌa rä ꞌme̱go mrä israelita. Rä Moises bi ñhani ꞌne nuꞌmu̱ bi da ngue̱nda ge hinto mi handi, bi yu̱ntꞌi näꞌä rä ejipsio ꞌne bi hyo. ꞌNepu̱ rä Moises bi yꞌagi näꞌä rä ejipsio ha yä ꞌmomu.

Rä hyaxꞌä, rä Moises bi ma bä handi rä hnini mänꞌaki. Mi hurämu̱i ge ma xä za xä matsꞌi pa ya hindä mꞌe̱go. Pe bi hyandi yoho yä israelita mi ntuhni, rä Moises bi ꞌñembäbi näꞌä mrä bo̱ka: “¿Por hanja gi yu̱ntꞌi ri ku?”.

Näꞌä rä ñꞌo̱ho̱ bi dädi: “¿Toꞌo xä hñuxꞌäꞌi de gä ndä ꞌne de gä nzaya? ¿Ma gi hyogägi ja ngu gä hyo näꞌä rä ejipsio?”.

Nubye̱ rä Moises bi ntsu. Bi da ngue̱nda ge yä jäꞌi xki bädi näꞌä xki yꞌo̱ꞌtuäbi näꞌä rä ejipsio. Rä Faraon ꞌnehe bi bädi hänge bi me̱hni rꞌa yä ñꞌo̱ho̱ pa xa hyo rä Moises. Hänge rä Moises pe̱ꞌtsi te bi bo̱ni de Ejipto.

Mi bo̱ni rä Moises de Ejipto, bi ma yabu̱, ha nꞌa rä hai tꞌembi Mädian. Ja gehni bä pädi rä Jetro ꞌne rä familia, ꞌne bi nthätui ko nꞌa de nuꞌu̱ yä tꞌixu mrä thuhu Sipora. Rä Moises bi zo̱ho̱ bi mfayꞌo ꞌne bi supäbi yä de̱ti rä Jetro. Bi mꞌu̱ 40 yä je̱ya ha Mädian. Nubye̱ ya mi pe̱ꞌtsi 80 yä je̱ya. Nꞌa rä pa, nuꞌmu̱ rä Moises mi fadi nuꞌu̱ yä de̱ti rä Jetro, bi thogi nꞌa rä däta tꞌo̱tꞌe näꞌä bi patuäbi rä mꞌu̱i rä Moises. Thogi ha näꞌä mänꞌa rä nxii ꞌne ma gä handihu̱ te mä tꞌo̱tꞌeꞌä.