10 yä plaga

HYANDI yä kꞌoi. Kada nꞌaa udi nꞌa de nuꞌu̱ yä plaga bä pe̱hni Jeoba ha Ejipto. Ha nuni rä mu̱di kꞌoi gi handi hanja rä Aron fe̱tꞌi ko rä zaa näꞌä rä däthe Nilo. ꞌNepu̱ näꞌä rä dehe bi mpu̱ngä ji, yä peskado bi du ꞌne näꞌä rä däthe bi mu̱di bi xägi.

Mꞌe̱fa, Jeoba bi japi bi bo̱ni yä ranä de ha rä däthe Nilo. Mi ja yä ranä habu̱ mi hoki yä thuhme, habu̱ mi pantꞌi yä ju̱ni, ha yä ähä, ꞌne habu̱räza. Mi du nuꞌu̱ yä ranä, yä ejipsio bi muntsꞌi yä tꞌo̱ꞌtsetho, ꞌne gatꞌho rä hnini Ejipto bi xägi.

Nubye̱, rä Aron bi me̱tꞌi rä hai ko rä zaa ꞌne näꞌä rä fonthai bi mpu̱ngä jejene, nuꞌu̱ mi ngu yä sankudu nuꞌu̱ tsate. Gehnä rä hñuu rä plaga.

Nuꞌu̱ märꞌa yä plaga se̱he̱ bi zu̱di yä ejipsio, yä israelita ya hinä. Näꞌä rä goho rä plaga bi nja yä däta giꞌue, nuꞌu̱ bi yꞌu̱tꞌi ha gatꞌho yä ngu yä ejipsio. Näꞌä rä plaga ku̱tꞌa bi hyopäbi yä zuꞌue yä ejipsio. Bi du xi ndunthi yä doro, yä baga, yä de̱ti ꞌne yä tꞌäxi.

Mꞌe̱fa, rä Moises ꞌne rä Aron bi yꞌe̱i yä ꞌmospi. Nuꞌu̱ yä ꞌmospi bi japi bi fo̱xä yä däta säsi ha yä ndoyꞌo yä jäꞌi ꞌne yä zuꞌue. Gehnä rä plaga rꞌato.

Mꞌe̱fa de geꞌä, rä Moises bi gu̱xä rä yꞌe̱ pa ha mähetsꞌi, ꞌne Jeoba bä pe̱hni yä hue̱i ꞌne yä ndo. Nunka xki dagi rꞌa yä ndo ha Ejipto ngu geꞌmu̱.

Ha näꞌä rä plaga hñäto bi nja xi ndunthi yä nkꞌoto. Nunka xki nheki yä nkꞌoto njabu̱, ha nixi mꞌe̱fa de geꞌä hinxä nheki. Bi zi gatꞌho näꞌä xki yꞌe̱gi yä ndo.

Ha näꞌä rä plaga gu̱to bi nja nꞌa rä ꞌme̱xui. Po hñupa nꞌa rä ꞌme̱xui bi goꞌmi gatꞌho Ejipto, pe ha mi ꞌmu̱i yä israelita mi ja rä hyaꞌtsi.

Pa ri uadi, Äjuä bi ꞌñembi yä israelita ge xä hyo nꞌa rä tꞌu̱ꞌxi o nꞌa rä zi tꞌu̱tudi ꞌne ko näꞌä rä ji xä gotsꞌi ha yä nthetsꞌi yä goxthi. Nubye̱, rä e̱nxe̱ Äjuä bi thogi ha Ejipto. Habu̱ bi hyandi rä ji, näꞌä rä e̱nxe̱ hinto bi hyo de näꞌä rä nguu. Pe nuꞌu̱ yä goxthi yä ngu habu̱ himi tu rä ji, bi hyo näꞌä rä mu̱di tꞌu̱ yä jäꞌi ꞌne de yä zuꞌue. Gehnä rä plaga rꞌe̱tꞌa.

Mꞌe̱fa de nunä rä plaga, rä Faraon bi hyopi bi bo̱ni yä israelita. Nuyu̱ ya xki ñhoki, ꞌne geꞌä rä xui bi mu̱di bi bo̱ni de Ejipto.