Rä tꞌu̱kä doro de gä oro

¡AY, HINÄ! Xibye̱, ¿te pe̱fi yä jäꞌi? ¡Di xatuäbi nꞌa rä tꞌu̱kä doro! ¿Por hanja pe̱fi njaua?

Nuꞌmu̱ rä Moises bä kohi ndunthi yä pa ha rä tꞌo̱ho̱, yä israelita bi ꞌñenä: “Hindi pädihu̱ te xpä thogi ko rä Moises. Ma gä hokihu̱ nꞌa rä zidada pa dä gu̱gägihu̱ de gekua”.

Rä Aron, rä ku rä Moises bi ꞌñenä: “Ndeꞌmu̱, hñäkihu̱ nuꞌu̱ ri tsꞌu̱nꞌguhu̱ ꞌne guä hänkägihu̱ua”. Mi tꞌumbi rä Aron nuꞌu̱ yä tsꞌu̱nꞌgu, bi deni ko rä tsibi pa bi hyoki nꞌa rä tꞌu̱kä doro de gä oro. ꞌNe yä israelita bi ꞌñenä: “¡Gehnä mä Zi Dadahu̱ bä ju̱gägihu̱ de Ejipto!”. ꞌNepu̱ bi ja nꞌa rä dängo, ꞌne bi xo̱kämbeni näꞌä rä tꞌu̱kä doro.

Mi hyandi Jeoba, xi bi bo̱ rä kue̱. ꞌNe bi ꞌñembi rä Moises: “Nxo̱ni gi käi. Yä israelita bi pe̱fi rꞌa yä tsꞌo tꞌo̱tꞌe, xä zoogi mä mhända ꞌne bi ndäne nꞌa rä tꞌu̱kä doro de gä oro”.

Rä Moises nguntꞌä bi gäi de rä tꞌo̱ho̱. ꞌNe mi zo̱ni, ¿gi pädi te bi hyandi rä Moises? Bi hyandi hanja yä israelita xki fahni näꞌä rä tꞌu̱kä doro, xa mi tuhu ꞌne mi nei. Rä Moises xa bi nkue̱ ndunthi ꞌne bi yꞌe̱i nuꞌu̱ yoho yä nxindo habu̱ mi hutsꞌi yä mhända Äjuä. Nuyu̱ yä nxindo bi dehmi. ꞌNepu̱ bi gu̱ näꞌä rä tꞌu̱kä doro xki hyoki nuꞌu̱ yä israelita, bi deni ko rä tsibi ꞌne bi xutꞌi.

Yä israelita xki me̱fi xi nꞌa rä tsꞌo tꞌo̱tꞌe. Hänge rä Moises bi xipi rꞌa yä ñꞌo̱ho̱ dä gu̱ yä majuai, ꞌne bi ꞌñembi: “Pe̱ꞌtsi te dä du gatꞌho nuꞌu̱ bi xo̱kämbeni näꞌä rä tꞌu̱kä doro”. Hänge nuꞌu̱ yä ñꞌo̱ho̱ bi hyo 3,000 yä jäꞌi. ¿Te utkägihu̱ nunä rä thogi? Ge se̱he̱ Jeoba ri ꞌñepi gä xo̱kämbenihu̱, hingä nuꞌu̱ yä zidada hingä mäjuäni.