Nꞌa rä kꞌeñä de gä kobre

¿JA RÄ te nuni rä kꞌeñä xä mꞌatꞌi ha rä zaa? Hinä, nuni rä kꞌeñä xä thoki de gä kobre. Jeoba bi ꞌñembi rä Moises ge dä to̱te ha nꞌa rä zaa pa njabu̱ yä israelita xä za xä hyandi ꞌne hinxä du. Pe nuyu̱ gi handi yꞌo ha rä hai hää xa mäjuäni yä kꞌeñä. Bi mu̱hni yä jäꞌi ꞌne bi japi bi ñheni. ¿Gi pädi por hanja?

Ngeꞌä yä israelita mi ñäni kontra Äjuä ꞌne kontra Moises ꞌne mi enä: “¿Por hanja guä ju̱gägihe de Ejipto pa gä tuhe ha nuya yä yꞌotꞌä hai? Nuua hingi ja rä dehe ha nixi ja te gä tsihe. Nuje ya hindi ne gä sigi gä tsihe rä mänä”.

Rä mänä mi nꞌa rä hogä ñhuni. Jeoba bi ja nꞌa rä milagro pa bi umbäbi rä mänä yä israelita. ꞌNe ko mänꞌa rä milagro bi umbäbi rä dehe. Pe yä israelita himi umbäbi njamädi Jeoba ngeꞌä xki su. Hänge pa bi kastiga yä israelita, Jeoba bä pe̱mpäbi yä kꞌeñä pa bi mu̱hni. Ndunthi yä israelita bi du.

Nubye̱, yä jäꞌi bä ehe ꞌne bi xipi rä Moises: “Di pe̱ꞌtsihe rä tsꞌoki ngeꞌä xtä ñähe kontra Jeoba ꞌne kontra nuꞌi. Go dä xatuäbi Jeoba pa dä hñäki nuyu̱ yä kꞌeñä”.

Hänge rä Moises bi xadi por geꞌu̱. Jeoba bi xipi rä Moises dä hyoki nꞌa rä kꞌeñä de gä kobre ꞌne dä to̱te ha nꞌa rä zaa, njabu̱ nuꞌu̱ yä jäꞌi xki mu̱hni yä kꞌeñä xä za xä hyandi näꞌä rä kꞌeñä de gä kobre. Rä Moises bi me̱fi näꞌä bi xipi Äjuä. ꞌNe nuꞌu̱ xki mu̱hni yä kꞌeñä mi hogi nuꞌmu̱ mi handi näꞌä rä kꞌeñä de gä kobre.

¿Te dä za gä pädihu̱ de gehnä? Gatꞌho nuju̱ di njahu̱ ngu nuꞌu̱ yä israelita xki mu̱hni yä kꞌeñä. Gatꞌho yä jäꞌi di nxita, di ñheni ꞌne tu, ngeꞌä näꞌä rä mu̱di ñꞌo̱ho̱ ꞌne näꞌä rä mu̱di ꞌme̱hñä, rä Adan ꞌne rä Eba, bi ꞌuege de Jeoba, ꞌne gatꞌho nuju̱ go yä bätsigihu̱. Pe Jeoba bi xoki nꞌa rä ꞌñuu pa dä za gä tinihu̱ nꞌa rä te pa nzäntho.

Jeoba bä pe̱hni ha rä Xiꞌmhai näꞌä rä Tꞌu̱ rä thuhu Ñhesukristo. Rä Hesu bi tsꞌu̱ti ha nꞌa rä zaa, ngeꞌä ndunthi mi handi ngu nꞌa rä tsꞌo jäꞌi. Pe Jeoba bä pe̱hni rä Hesu pa dä ñängägihu̱. Mu̱ gä handihu̱ꞌä ꞌne gä de̱nihu̱, dä za gä pe̱ꞌtsihu̱ nꞌa rä te pa nzäntho. Mꞌe̱fa ma gä pädihu̱ mä nꞌa tu̱i de gehnä.