Nꞌa rä burru bi ñä

¿NUꞌI xkä o̱de ge nꞌa rä pa bi ñä nꞌa rä burru? “Hinä, yä zuꞌue hingi ñä”, geꞌä ma gi thädi. Pe rä Mäkä Tꞌofo mää ge nꞌa rä pa bi ñä nꞌa rä burru. Ma gä handihu̱ hanja bi thogi.

Yä israelita ya ma dä yu̱tꞌi ha rä hai Kanään. Balak, näꞌä rä ndä de Moab mi tsu yä israelita. Hänge bi mända bä thoni nꞌa rä nduxte ñꞌo̱ho̱ mi tꞌembi Balam pa dä zani yä israelita. Bi tꞌembi ge ma xä tꞌumbi ndunthi yä bojä, hänge rä Balam bi bo̱tsꞌe ha rä burru ꞌne bi bo̱ni bi ma bä nuu rä Balak.

Jeoba himi ne ge rä Balam xä zambäbi rä hnini. Hänge bi me̱hni nꞌa rä e̱nxe̱ ko nꞌa rä majuai pa xä mꞌai ha rä ꞌñuu ꞌne hinxä hyopi xä thogi rä Balam. Rä Balam himi handi näꞌä rä e̱nxe̱, pe näꞌä rä burru hää, hänge himi ne dä thogi habu̱ mi ꞌmai näꞌä rä e̱nxe̱. Näꞌä rä burru bi uadi bi mꞌe̱ni. Hänge rä Balam xi bi nkue̱ ꞌne bi gu̱ bi me̱tꞌi ko nꞌa rä zaa.

Nubye̱, ¿gi pädi te bi me̱fi rä Zi Dada Jeoba? Bi japi bi yꞌo̱de rä Balam ge näꞌä rä burru bi ñä ꞌne bi ꞌñeñä: “¿Te xtä o̱tꞌäꞌi pa gi fe̱tkꞌägi?”.

Rä Balam bi dädi: “Gi jakägi gä kohi ngu nꞌa rä dondo, mu̱ gä hñä nꞌa rä majuai, ya xtä hoꞌi”.

Rä burru bi ñꞌani: “¿Nzäntho xtä jaꞌäbu̱?”.

Rä Balam bi dädi: “Hinä”.

Nubye̱, Jeoba bi japi rä Balam bi hyandi näꞌä rä e̱nxe̱ mi ꞌmai ha rä ꞌñuu ko nꞌa rä majuai. Rä e̱nxe̱ bi ꞌñenä: “¿Por hanja gi fe̱tꞌi ri burru? Xtä ehe gä kotꞌi rä ꞌñuu pa hingi thogi guä tsani rä hnini Israel. Mu̱ nuni ri burru hinxä ꞌuengi de geki, nuga xtä hoꞌi pe hixtä ho ri burru”.

Rä Balam bi ꞌñenä: “Di pe̱ꞌtsi rä tsꞌoki. Hingä ndi pädi ge ngi ꞌmai ha rä ꞌñuu”. Näꞌä rä e̱nxe̱ bi hyopi bi ma rä Balam pa bä nuu rä Balak. Rä Balam mi netho dä zani rä hnini Israel, pe Jeoba bi japi rä Balam bi mää hñuu yä jäpi pa rä hnini Israel.