Yä israelita bi bo̱ni

YA MA dä uadi yo nje̱ya dende nuꞌmu̱ yä mengu Medopersia bi hñäni näꞌä hnini Babilonia. ¡Pe nubye̱ hyandi te thogi! Hää, yä israelita yꞌo ri bo̱ni de Babilonia. ¿Hanja bi za bi bo̱ni? ¿Toꞌo bi hyopi bi bo̱ni?

Siro, näꞌä ndä de Persia go geꞌä bi hyopi bi bo̱ni yä israelita. Ndunthi yä je̱ya änte de xä mꞌu̱i Siro, Isaias bi yꞌofo näꞌä bi mää Jeoba ge ma xä me̱fi Siro, Jeoba bi ꞌñenä: “Ma gi pe̱fi näꞌä go di ne. Yä goxthi näꞌä hnini hingä ma dä njotꞌi pa njabu̱ dä za gi ku̱tꞌi ꞌne gi hñäni näꞌä hnini”. ꞌNe geꞌä bi thogi, yä mengu Medopersia bi yu̱tꞌi de gä xui ngeꞌä xki tsꞌogi mi xogi nuꞌu̱ yä goxthi, ꞌne Siro geꞌä bi gu̱tꞌi rä ꞌñuu pa bi hñäni Babilonia.

Jeoba ꞌnehe bi xipi Isaias ge Siro ma xä mända xä thoki mänꞌaki Jerusalen ꞌne rä templo. ¿Bi me̱fi njabu̱ Siro? Hää, bi ꞌñembäbi yä israelita: “Pengihu̱ ha Jerusalen ꞌne guä hokihu̱ rä templo Jeoba, näꞌä ri Zi Dadahu̱”. ꞌNe ja ngu gi handi ha rä kꞌoi, geꞌä ma dä me̱fi nuyu̱ yä israelita.

Pe ndunthi yä israelita ya mi yä zi däta jäꞌi ꞌne mi hñeni, hänge hingä gatꞌho bi za bi mengi ha Jerusalen. ꞌNehe xi mi yabu̱, mi pe̱ꞌtsi te xä ñꞌo ngu 800 yä kilometro. Märꞌa yä israelita himbi za bi mengi ha Jerusalen po märꞌa yä raso. Pe Siro bi ꞌñembäbi nuꞌu̱ bi gohi ha Babilonia: “Umbäbihu̱ yä plata, yä oro ꞌne märꞌa yä hogä ntꞌuni nuꞌu̱ toꞌo ma dä mengi dä hoki Jerusalen ꞌne rä templo”.

Hänge nuꞌu̱ yä israelita bi mengi ha Jerusalen, bi tꞌumbi ndunthi yä hogä ntꞌuni. Siro ꞌnehe bi umbi nuꞌu̱ yä kopa ꞌne nuꞌu̱ yä mohi xpi hä Näbukodonosor de rä templo Jeoba nuꞌmu̱ bä huati Jerusalen. Hänge nuꞌu̱ yä israelita bi mengi ha Jerusalen bi hñätsꞌi ndunthi yä tꞌo̱tꞌe.

Mꞌe̱fa de goho nzänä, yä israelita bi zo̱ni ha Jerusalen. Xa geꞌu̱ 70 yä je̱ya xki thogi dende nuꞌmu̱ yä me Babilonia bi huati Jerusalen ꞌne bi gohi mi huitꞌätho. Pe mäske yä israelita bi mengi ha yä hnini, bi thogi ndunthi yä xuñha ja ngu ma gä handihu̱.