Rä Hesu bi gui nuꞌu̱ mi mpa

RÄ Hesu di nheki ge xa di nkue̱, ¿hänge hää? ¿Gi pädi por hanja? Ngeꞌä nuyu̱ yä ñꞌo̱ho̱ yꞌoni ha rä templo Äjuä, xa tsu̱di yä kꞌatꞌä bojä. Mi pepäbi nuꞌu̱ yä jäꞌi mi ehe ha rä templo pa mi xo̱kämbeni Äjuä.

¿Gi handi gatꞌho nuyu̱ yä tꞌu̱kä doro, yä de̱ti, ꞌne yä palomä? Nuyu̱ yä jäꞌi mi pa nuyu̱ yä zuꞌue mbo ha rä templo Äjuä. ¿Gi pädi por hanja? Ngeꞌä yä israelita mi japä mꞌe̱di yä zuꞌue ꞌne yä tsꞌintsꞌu̱ pa dä umbäbi yä ofrenda Äjuä.

Ha nuꞌu̱ yä mhända xki tꞌumbi Moises mi enä ge nuꞌmu̱ nꞌa israelita mi o̱tꞌe nꞌa tsꞌoki, mi pe̱ꞌtsi te dä umbäbi nꞌa ofrenda Äjuä. ꞌNehe mi ja märꞌa yä raso pa mi uni yä ofrenda yä israelita. Pe, ¿habu̱ xä za xä dini gatꞌho nuꞌu̱ yä zuꞌue pa xä uni yä ofrenda?

Rꞌa yä israelita mi pe̱ꞌtsi yä de̱ti, yä doro, ꞌne yä tsꞌintsꞌu̱ pa mi uni de gä ofrenda. Pe ndunthi yä israelita hinte mä zuꞌue mi pe̱ꞌtsi. Märꞌaa, mi ꞌmu̱i xi yabu̱ hänge mi japäbi xä ñhei dä zitsꞌi nuꞌu̱ yä zuꞌue asta ha rä templo Jerusalen. Hänge pa dä uni yä ofrenda, yä israelita pe̱ꞌtsi te mi tambäbi nuꞌu̱ yä ñꞌo̱ho̱ mi mpa ha rä templo. Pe nuꞌu̱ yä ñꞌo̱ho̱, xa mi pa xä mädi nuꞌu̱ yä zuꞌue, ꞌne mi pepäbi yä bojä yä jäꞌi. Ha rä templo Äjuä hingä mi nꞌa rä luga pa xä mpa nuꞌu̱ yä ñꞌo̱ho̱.

Hänge rä Hesu xä bi nkue̱, ꞌne bi pu̱ntsꞌi nuꞌu̱ yä mexa xki yꞌu̱tsꞌi yä bojä nuꞌu̱ yä jäꞌi. ꞌNehe bi hyoki nꞌa rä dänthi ꞌne kongeꞌä bi gu̱ki nuꞌu̱ yä zuꞌue de ha rä templo. Bi mändabi nuꞌu̱ toꞌo mi pa yä palomä: “¡Ju̱kihu̱ de gekua! Ogi mpahu̱ nuua ha rä ngu mä Dada. Nunä hingä nꞌa luga pa gi tähähu̱ yä bojä”.

Rä Hesu mi ñꞌoui rꞌa de nuꞌu̱ yä de̱ni. ꞌNe nuyu̱ himi tsa dä gamfri mi hyandi näꞌä bi me̱fi rä Hesu. Nuꞌu̱ yä de̱ni bi beni näꞌä mää rä Mäkä Tꞌofo habu̱ enä de rä Tꞌu̱ Äjuä: “Näꞌä rä mhäte pe̱ꞌspäbi rä ngu Äjuä ma dä nzo̱ mbo de geꞌä ngu rä tsibi”.

Mientra rä Hesu bi ntini ha rä Paskua ha Jerusalen, ꞌnehe bi ja ndunthi yä milagro. Mꞌe̱fa rä Hesu bi bo̱ni de Judea ꞌne bi mengi pa Galilea. Pe ꞌnehe bi thogi ha rä hnini Samäria. Ma gä handihu̱ te bi thogi ha nunä hnini.