Bi bo̱ni de rä fadi

HYANDI nuni e̱nxe̱ di xoki rä goxthi rä fadi. Yꞌo ju̱ki yä apostol de rä fadi. Ma gä handihu̱ por hanja mi jotꞌi ha rä fadi.

Hixki thogi ndunthi yä pa dende nuꞌmu̱ yä de̱ni rä Hesu bi hñäni rä mäkä tsꞌe̱di Äjuä, ꞌne gehnä bi thogi: nꞌa ndee, Pedro ꞌne Juan bi ma pa ha rä templo Jerusalen. Getbu̱ de rä goxthi, mi hudi nꞌa ñꞌo̱ho̱ himi tsa dä ñꞌo dende bi mꞌu̱i. Yä jäꞌi hyaxtho mi tsitsꞌi näꞌä zi ñꞌo̱ho̱ pa mi api rä bojä gatꞌho toꞌo mi ku̱tꞌi ha rä templo. Mi hyandi bi thogi Pedro ꞌne Juan bi yꞌapi ꞌnehe rä bojä. ¿Te bi me̱fi Pedro ꞌne Juan?

Nuyu̱ bi mꞌai ꞌne Pedro bi ꞌñembi: “Hindi hñä rä bojä, pe ma gä rꞌaꞌi näꞌä di pe̱ꞌtsi. ¡Po rä thuhu rä Hesu di xiꞌi ge gi ꞌmai ꞌne yꞌo!”. Nubye̱ Pedro bi mipä rä yꞌe̱, ꞌne näꞌä ñꞌo̱ho̱ nguntꞌä bi nsagi bi mꞌai ꞌne bi mu̱di bi ñꞌo. Yä jäꞌi xa bi johya ꞌne himi tsa dä gamfri mi hyandi näꞌä milagro.

Pedro bi ꞌñenä: “Dä jahe nunä milagro po näꞌä rä tsꞌe̱di Äjuä, näꞌä toꞌo bi gu̱tsꞌi rä Hesu de rä du”. Mientra mi ñäthoꞌu̱, bi zo̱ho̱ rꞌa yä majhä xa xki nkue̱ ngeꞌä Pedro ꞌne Juan mi xipi yä jäꞌi ge rä Hesu xki nangi de rä du. Hänge bi zitsꞌi bä kotꞌi ha rä fadi.

Rä hyaxꞌä nuꞌu̱ yä majhä bi me̱ꞌtsi nꞌa däta mhuntsꞌi. Nubye̱ bä tsꞌii Pedro, Juan ꞌne näꞌä ñꞌo̱ho̱ xki tꞌo̱the. Nuꞌu̱ yä majhä bi yꞌambäbi: “¿Ko te mä tsꞌe̱di gä jahu̱ näꞌä milagro?”.

Pedro bi dädi ge xki yꞌo̱the näꞌä ñꞌo̱ho̱ po rä tsꞌe̱di Äjuä, näꞌä toꞌo xki gu̱tsꞌi rä Hesu de rä du. Nuꞌu̱ yä majhä hingä mi pädi te dä me̱fi ngeꞌä mi handi ge hää xki yꞌo̱the näꞌä ñꞌo̱ho̱. Hänge bi mändabi nuꞌu̱ yä apostol ge hindä sigi dä ñä de rä Hesu, ꞌnepu̱ bi hye̱gi bi ma.

Ngu mi thogi yä pa, yä apostol mi sigi mi ungä ntꞌo̱de de rä Hesu ꞌne mi o̱the nuꞌu̱ mi hñeni. Nuꞌu̱ yä milagro mi o̱tꞌe, nguntꞌä bi fädi ha ma rꞌa yä luga. Hänge ndunthi yä jäꞌi de nuꞌu̱ yä tꞌu̱kä hnini mi ja getbu̱ de Jerusalen, bi zixä yä datꞌhi pa njabu̱ nuꞌu̱ yä apostol bi yꞌo̱the. Hänge nuꞌu̱ yä embidioso majhä, bi gu̱ yä apostol ꞌne bi gotꞌi ha rä fadi mänꞌaki. Pe, ¿gi pädi te bi thogi?

Mi nxui, rä e̱nxe̱ Äjuä bi xoki näꞌä rä goxthi rä fadi ja ngu gi handi ha rä kꞌoi. Näꞌä e̱nxe̱ bi ꞌñenä: “Ri ma guä ꞌmaihu̱ ha rä templo ꞌne sigi gi nzofohu̱ yä jäꞌi”. Rä hyaxꞌä, nuꞌmu̱ yä majhä bi mända dä tsꞌii yä apostol, nuyu̱ ya xki bo̱ni xki ma. Nuꞌu̱ yä apostol bi thini mi udi ha rä templo hänge bi tsꞌitsꞌi ha Sanedrin.

Nuꞌu̱ yä majhä bi ꞌñembäbi: “Dä mändaꞌihe ge hixkä sigi xkä ꞌñudihu̱ de rä Hesu, pe ya bi ñudi Jerusalen ko nuꞌu̱ ri ntꞌudihu̱”. Yä apostol bi dädi: “Nuje pe̱ꞌtsi te gä o̱tehe Äjuä ngu mä ndähe ke nuꞌu̱ yä mhända yä mexiꞌmhai”. ꞌNepu̱ yä apostol bi sigi bi ungä ntꞌo̱de de rä Hesu. ¿Hänge nꞌa rä hogä kꞌoi pa nuju̱?