Mi yꞌo ꞌñuu pa Damäsko

¿GI PÄDI toꞌo nuni jäꞌi ꞌme̱ni ha yä hai? Gehni Saulo, näꞌä ñꞌo̱ho̱ bi supäbi yä hee nuꞌu̱ yä jäꞌi bi hyo Esteban. ¡Hyandi nuni ñotꞌi xa di hue̱xki! ¿Gi pädi te thogi?

Mꞌe̱fa de bi du Esteban, Saulo mi honi nuꞌu̱ yä de̱ni rä Hesu pa dä yꞌo̱tpäbi yä ntsꞌomꞌu̱i. Mi ku̱tꞌi ha yä nguu ꞌne mi ju̱ki ko yä nju̱tꞌitho pa mi e̱ntꞌi ha rä fadi. Ndunthi yä de̱ni rä Hesu bi bo̱ni bi ma pa ha märꞌa yä hnini pe mi sigi mi udi de rä Noya Äjuä. Pe Saulo bi ma ha märꞌa yä hnini pa bä honi yä de̱ni rä Hesu. ꞌNe nubye̱ bi ma pa Damäsko. Pe ma gä handihu̱ te mä däta tꞌo̱tꞌe bi thogi ha ꞌñuu.

Nse̱kitho, nꞌa ñotꞌi bi hue̱xki dende mähetsꞌi ꞌne bi goꞌmi Saulo. Nuni bi huangi ja ngu di handihu̱. ꞌNepu̱ bi yꞌo̱de toꞌo mi enä: “¡Saulo, Saulo! ¿Por hanja gi o̱tkägi yä ntsꞌomꞌu̱i?”. Nuꞌu̱ yä ñꞌo̱ho̱ mi ñꞌoui Saulo bi hyandi näꞌä ñotꞌi ꞌne bi yꞌo̱de näꞌä mi ñä pe himbi bädi te mi mää.

Saulo bi dädi: “¿Toꞌoꞌi zi Hmuu?”.

Näꞌä mi ñä bi ꞌñenä: “Go geki dä Hesu, näꞌä gi o̱tpäbi yä ntsꞌomꞌu̱i”. Rä Hesu bi ꞌñenä njabu̱ ngeꞌä nuꞌmu̱ Saulo mi o̱tpäbi rä ntsꞌomꞌu̱i nuꞌu̱ yä de̱ni rä Hesu, ꞌñenä go mi o̱tpäbi rä Hesu.

Nubye̱ Saulo bi ñꞌani: “Zi Hmuu, ¿te mähyoni gä o̱tꞌebye̱?”.

Rä Hesu bi ꞌñembi: “Nangi ꞌne ri ma pa Damäsko. Ja gehni ma dä siꞌi te gi pe̱fi”. Saulo bi nangi ꞌne bi zo̱tꞌe yä dä, pe hinte bi za bi hyandi. ¡Mi xada! Hänge nuꞌu̱ yä ñꞌo̱ho̱ mi ñꞌoui bi mipäbi rä yꞌe̱ ꞌne bi zitsꞌi pa Damäsko.

Nubye̱ rä Hesu bi nzofo nꞌa rä de̱ni mi ꞌmu̱i ha Damäsko ꞌne bi ꞌñembi: “Anänias, ꞌmai. Ju̱ ri ꞌñuu ꞌne ri ma ha näꞌä kaye rä thuhu Rekta. Ha rä ngu Judas ñꞌani po nꞌa ñꞌo̱ho̱ rä thuhu Saulo, ngeꞌä xtä huahni pa dä me̱pkägi ngu nꞌa mä hogä ꞌme̱go”.

Anänias bi yꞌo̱de ꞌne bi me̱fi njabu̱. Mi hyandi Saulo bi dani ꞌne bi ꞌñembäbi: “Rä zi Hmuu, go geꞌä bä pe̱nkägi pa dä xo ri da ꞌne pa gi hñäni rä mäkä tsꞌe̱di Äjuä”. Nubye̱, ngu te bi dagi de yä da Saulo ꞌne bi mu̱di bi hyandi mänꞌaki.

Saulo bi ma ha ndunthi yä dähni ꞌne bi ꞌñuti yä jäꞌi de rä Noya Äjuä. Bi zo̱ho̱ bi fädi ngu rä apostol Pablo, mꞌe̱fa ma gä pädihu̱ mä nꞌa tu̱i de geꞌä. Pe mꞌe̱tꞌo ma gä handihu̱ te bi mhändabi xä me̱fi Pedro.