Rä ntheke 15

Ma gä faxu̱ märꞌa dä me̱fi rä bolunta Äjuä

¿Por hanja mähyoni gi ungä ntꞌo̱de näꞌä ya gi pädi? (1)

¿Toꞌo dä za gi umbä ntꞌo̱de nuꞌu̱ yä rꞌayꞌo hogä noya? (2)

¿Te ngu ma dä hyandi yä jäꞌi hanja gi ꞌmu̱i? (2)

¿Hämꞌu̱ dä za gi po̱ni ko rä mhuntsꞌi pa gi ungä ntꞌo̱de rä Noya Äjuä? (3)

1. Nuꞌi ya gä pädi ndunthi nuꞌu̱ yä hogä ntꞌudi de rä Mäkä Tꞌofo. Nunä rä mfädi ma dä maxꞌäꞌi gi pe̱ꞌtsi nꞌa rä hogä mꞌu̱i (Efesios 4:22-24). Nunä rä mfädi xa mähyoni pa dä za gi hñäni nꞌa rä te pa nzäntho (Juan 17:3). ꞌNehe mähyoni dä yꞌo̱de märꞌa yä jäꞌi nuya yä rꞌayꞌo hogä noya pa dä za dä me̱ꞌtsi rä te. Gatꞌho nuꞌu̱ xa mäjuäni yä de̱ni rä Hesu pe̱ꞌtsi dä ungä ntꞌo̱de rä Noya Äjuä. Geꞌä di mända Äjuä (Romanos 10:10, NM; 1 Corintios 9:16; 1 Timoteo 4:16).

2. Näꞌä xä tꞌutꞌäꞌi, dä za gi fu̱di gi ꞌñuti ꞌnehe nuꞌu̱ yä jäꞌi gi pädi. Ngu nuꞌu̱ te ri njaui, ri ntsitsꞌi, ha ri ꞌme̱fi ꞌne ha ri ngunsadi. Ñä ko rä tꞌekꞌei ꞌne ogi nkue̱ (2 Timoteo 2:24, 25). Beni ge yä jäꞌi mänꞌa handi näꞌä gi pe̱fi ke näꞌä gi mää. Yä jäꞌi dä za dä yꞌo̱de näꞌä gi xipi pe nuꞌmu̱ nuꞌi gi pe̱ꞌtsi nꞌa rä hogä mꞌu̱i (Mateo 5:16; 1 Pedro 3:1, 2, 16).

3. Njabu̱ rꞌamätsꞌu̱ ma gi pe̱fi näꞌä tꞌadi pa dä za gi po̱ni gi ungä ntꞌo̱de rä Noya Äjuä ko nu yä testigo rä Jeoba de ha näꞌä rä mhuntsꞌi habu̱ gi ntini. Nunä rä ꞌme̱fi xa mähyoni pa njabu̱ gi fu̱di gi pe̱päbi rä bolunta Äjuä (Mateo 24:14). ¡Hängu rä johya ma gi pe̱ꞌtsi mu̱ gi fatsꞌi nꞌa rä jäꞌi dä me̱pi Jeoba ꞌne dä hñäni nꞌa rä te pa nzäntho! (1 Tesalonicenses 2:19, 20.)