¿Toꞌo rä Ñhesukristo?

1. ¿Hanja bi zo̱ho̱ bi mꞌu̱i rä Hesu?

Rä Hesu himbi mꞌu̱i ngu gatꞌho yä jäꞌi. Rä Hesu mꞌe̱tꞌo bä ꞌmu̱i ha mähetsꞌi ngu nꞌa espiritu änte de xpä ehe nuua ha rä Xiꞌmhai (Juan 8:23). Äjuä mꞌe̱tꞌo bi hyoki rä Hesu änte de xä hyoki gatꞌho nuꞌu̱ yä tꞌo̱tꞌe ja ha mähetsꞌi ꞌne ha rä Xiꞌmhai. ꞌNepu̱ rä Hesu bi matsꞌi Äjuä pa bi hyoki gatꞌho nuꞌu̱ märꞌa yä tꞌo̱tꞌe. De gatꞌho näꞌä bi hyoki Äjuä, ho̱nse̱ rä Hesu hinto bi matsꞌi pa bi hyoki hänge bi tꞌembi «rä rꞌa Tꞌu̱» Äjuä (Juan 1:14). Rä Hesu tꞌembi ꞌnehe «rä Noya» ngeꞌä mi hätsꞌi nuꞌu̱ yä raso mi uni Äjuä. Hñeti Proverbios 8:22, 23, 30 ꞌne Colosenses 1:15, 16.

2. ¿Por hanja rä Hesu bä ehe ha rä Xiꞌmhai?

Äjuä bä pe̱hni rä Tꞌu̱ ha rä Xiꞌmhai. ¿Gi pädi hanja bi thogi? Äjuä bi pombäbi rä te rä Hesu pa ha rä mu̱i Märia. Njabu̱ rä Hesu bi za bi mꞌu̱i nuua ha rä Xiꞌmhai. Märia mi nꞌa nxutsi näꞌä mi rä judia ꞌne hixki nthäti. Hänge rä dada rä Hesu hingä mi nꞌa jäꞌi de nuua ha rä Xiꞌmhai (Lucas 1:30-35). Rä Hesu bä ehe ha rä Xiꞌmhai po hñuu yä raso: 1) pa bi ꞌñudi näꞌä xa mäjuäni de Äjuä, 2) pa bi ꞌñudi hanja dä za gä pe̱päbihu̱ rä bolunta Äjuä mäske di thogihu̱ yä xuñha, ꞌne 3) pa bi uni rä te ꞌne njabu̱ “bi guꞌtuä gatꞌho yä tsꞌoki yä jäꞌi”. Näꞌä rä te bi uni rä Hesu, hinte mä tsꞌoki mi ñꞌoui. Hñeti Marcos 10:45.

3. ¿Por hanja mi ja mꞌe̱di nꞌa rä njutꞌi?

Nuꞌmu̱ nꞌa jäꞌi ñämbäbi rä te mä nꞌa jäꞌi de rä du, dä za gä eñhu̱ ge näꞌä jäꞌi bi uni nꞌa njutꞌi (Éxodo 21:29, 30). Nuꞌmu̱ Äjuä bi hyoki yä jäꞌi, himbi hyoki pa xä nxita ꞌne xä du. Di pädihu̱ njabu̱ ngeꞌä rä Mäkä Tꞌofo mää ge Äjuä bi xipi Adan näꞌä rä mu̱di ñꞌo̱ho̱ ge mu̱ xä me̱fi näꞌä tꞌembi «rä tsꞌoki», nuꞌmu̱ ma xä du. Pe mu̱ Adan xä yꞌo̱te Äjuä, nuꞌmu̱ nunka ma xä du (Génesis 2:16, 17; 5:5). Rä Mäkä Tꞌofo ꞌnehe mää ge po rä tsꞌoki Adan, rä du «bi yu̱tꞌi» ha rä Xiꞌmhai. Hää, Adan bi zokuäbi rä tsꞌoki ꞌne rä du gatꞌho nuꞌu̱ yä bätsi bi mꞌu̱i. Nuju̱ ndi honihu̱ toꞌo xä uni nꞌa njutꞌi po nuju̱ ꞌne xä ñängägihu̱ de rä du, näꞌä däta kastigo bi zogägihu̱ Adan. Hñeti Romanos 5:12 ꞌne 6:23.

¿Toꞌo ma xä za xä uni näꞌä njutꞌi pa xä ñängägihu̱ de rä du? Nuꞌmu̱ di tuhu̱, ho̱nse̱ nuꞌu̱ mä tsꞌokihu̱ di jutꞌihu̱. Hänge nixi nꞌa rä jäꞌi hinxä za xä uni rä te pa xä gutꞌi yä tsꞌoki märꞌa yä jäꞌi, ngeꞌä gatꞌho di pe̱ꞌtsihu̱ rä tsꞌoki. Hñeti Salmo 49:7-9.

4. ¿Por hanja bi du rä Hesu?

Rä Hesu hingä mi nja ngu yä jäꞌi. Rä Hesu himbi me̱ꞌtsi rä tsꞌoki ja ngu yä jäꞌi. Hänge näꞌä himi japä mꞌe̱di xä du po yä tsꞌoki. Näꞌä nunka bi me̱fi nꞌa rä tsꞌo tꞌo̱tꞌe. Pe rä Hesu bi du pa bi gutꞌi yä tsꞌoki yä jäꞌi. Äjuä bi ꞌñudi xi ndunthi rä mhäte po yä mexiꞌmhai nuꞌmu̱ bä pe̱hni rä Tꞌu̱ pa bi du po nuju̱. Rä Hesu ꞌnehe bi ꞌñudi ndunthi rä mhäte po nuju̱ ngeꞌä bi yꞌo̱te rä Dada ꞌne bä ehe pa bi uni rä te ꞌne bi gutꞌi mä tsꞌokihu̱. Hñeti Juan 3:16 ꞌne Romanos 5:18, 19.

Hyandi rä bideo ¿Por hanja bi du rä Hesu?

5. ¿Te pe̱fi rä Hesu mäpaya?

Mi mꞌu̱i rä Hesu nuua ha rä Xiꞌmhai, bi yꞌo̱the nuꞌu̱ yä jäꞌi mi hñeni, bi gu̱tsꞌi nuꞌu̱ yä jäꞌi xki du, ꞌne bi matsꞌi nuꞌu̱ yä jäꞌi mi sufri. Njabu̱ bi ꞌñudi gatꞌho näꞌä ma dä me̱fi mꞌe̱fa po gatꞌho nuꞌu̱ yä jäꞌi o̱te Äjuä (Mateo 15:30, 31; Juan 5:28). Mꞌe̱fa de bi du rä Hesu, Äjuä bi gu̱tsꞌi ꞌne bi umbi nꞌa rä ndoyꞌo pa dä ꞌmu̱i ha mähetsꞌi habu̱ hindä za dä hyandi yä jäꞌi (1 Pedro 3:18, NM). Mi mengi rä Hesu ha mähetsꞌi, bi hñudi ha rä hyo Äjuä, bi hñudi ha rä ñꞌe̱i, ꞌne bi do̱ꞌmi asta nuꞌmu̱ Äjuä bi umbi rä tsꞌe̱di pa dä mända ha gatꞌho rä Xiꞌmhai (Hebreos 10:12, 13). Nubye̱, rä Hesu bi mända ha mähetsꞌi ngu nꞌa Ndä. Gatꞌho nuꞌu̱ yä de̱ni rä Hesu ungä ntꞌo̱de de nunä hogä noya ha gatꞌho rä Xiꞌmhai. Hñeti Daniel 7:13, 14 ꞌne Mateo 24:14.

Mänꞌitꞌho, rä Hesu ko näꞌä rä tsꞌe̱di pe̱ꞌtsi de gä Ndä ma dä hñäki gatꞌho yä xuñha ꞌne ma dä huati nuꞌu̱ yä tsꞌomꞌu̱i jäꞌi di japi dä sufri märꞌaa. Gatꞌho nuꞌu̱ yä jäꞌi o̱te ꞌne kamfribi rä Hesu, ma dä me̱ꞌtsi nꞌa rä hogä mꞌu̱i ko rä johya xti zo̱ho̱ dä uädri rä Xiꞌmhai. Hñeti Salmo 37:9-11.