RÄ NTHEKE 4
¿Hanja gi suhu̱ ri bojähu̱?
«Nuꞌu̱ yä kohi dä hogi mu̱ ja yä hogä tsꞌofo.» (Proverbios 20:18)
Gatꞌhogihu̱ di honihu̱ rä bojä pa gä umbäbihu̱ näꞌä di japäbi mꞌe̱di mä familiahu̱ (Proverbios 30:8). Di pädihu̱ ge «rä bojä di sugägihu̱» ꞌne faxkägihu̱ (Eclesiastés 7:12). Rꞌabu̱ di jakägihu̱ xä ñhei gä ñähu̱ de yä bojä ko mä familiahu̱, pe ogi hopi ge po geꞌä dä nja yä xuñha ha ri medinthäti (Efesios 4:32). Mähyoni gi pe̱ꞌspäbi komfiansa ri ꞌme̱hñä o ri däme, ꞌne de gi yohu̱ gi hyandihu̱ hanja ma gi gasta ri bojähu̱.
1 NTSO̱ꞌMIHU̱ ÄNTE DE TE GI PE̱FIHU̱
NÄꞌÄ UDI RÄ MÄKÄ TꞌOFO: «Xiꞌmu̱ nꞌa rä jäꞌi dä beni dä hyoki nꞌa rä däta nguu, ¿hage hindä beni mꞌe̱tꞌo te gatꞌho mähyoni pa dä uadi dä hyoki?» (Lucas 14:28). Mähyoni gi ñähu̱ gi yohu̱ te ma gi pe̱fihu̱ ko näꞌä ri bojä gi pe̱ꞌtsihu̱ (Amós 3:3). Mbenihu̱ mꞌe̱tꞌo te di jaꞌähu̱ mꞌe̱di gi tañhu̱ ꞌne hängu rä bojä dä za gi gastahu̱ (Proverbios 31:16). Mäske xi gi pe̱ꞌtsihu̱ ndunthi rä bojä pa gi tañhu̱ yä tꞌo̱tꞌe, hingä po rängeꞌä ma gi tsꞌonthohu̱ ri bojähu̱. Yꞌo̱thu̱ ntsꞌe̱di po hingi ñho̱xu̱ yä thai, ꞌne gastahu̱ ho̱nse̱ näꞌä rä bojä gi pe̱ꞌtsihu̱ (Proverbios 21:5; 22:7).
NÄꞌÄ DÄ ZA GI PE̱FI:
Mu̱ pongi nꞌa tu̱i ri bojähu̱ xti uadi rä semänä o rä zänä, dä hogi gi yꞌambäbi ri ꞌme̱hñä o ri däme te ma gi pe̱fihu̱ ko näꞌä bojäꞌä
Mu̱ gi dahu̱ ngue̱nda ge hingi huadi ri bojähu̱ hyanthu̱ te dä za gi pe̱fihu̱ pa ya hingi gastahu̱ ndunthi yä bojä. Dä za gi tedehu̱ rꞌa yä zi zuꞌue o gi potꞌihu̱ rꞌa yä berdura pa njabu̱ ya hingi gastahu̱ ndunthi yä bojä ora gi ntañhu̱
2 MÄÄ NÄꞌÄ MÄJUÄNI ꞌNE HYANDI TE THOGI
NÄꞌÄ UDI RÄ MÄKÄ TꞌOFO: Mää näꞌä mäjuäni pe hingä «ho̱nse̱ ha rä thandi Äjuä [...], ꞌnehe ha yä thandi yä jäꞌi» (2 Corintios 8:21). Xa gi mää näꞌä mäjuäni ora gi xipäbi ri ꞌme̱hñä o ri däme hängu gi tähä ꞌne hängu gi gasta.
Änte de gi yꞌo̱tꞌe nꞌa rä däta nthai, yꞌambäbi ri ꞌme̱hñä o ri däme te di mbeni de geꞌä (Proverbios 13:10). Mu̱ gi nehu̱ dä nja nꞌa rä mꞌu̱i te mä entho ha ri medinthätihu̱, mähyoni gi mäñhu̱ te gi mbenihu̱ de rä bojä. Beni ge näꞌä rä bojä gi tähä, ꞌnehe go rä me̱ti ri familia, hingä ho̱nse̱ go ri me̱ti (1 Timoteo 5:8).
NÄꞌÄ DÄ ZA GI PE̱FI:
Kohi ko ri ꞌme̱hñä o ri däme de hängu rä bojä dä za gi gasta nsinke gi ñꞌani mꞌe̱tꞌo
Ogi to̱ꞌmi dä nja nꞌa rä xuñha pa gi ñähu̱ de rä bojä