Näꞌä ma gä pädihu̱ ha rä sección 8

Jeoba bi umbäbi Salomón ndunthi rä mfädi ꞌne go bi nkargobi dä hyoki rä templo. Pe Salomón, rꞌamätsꞌu̱u̱ bi mu̱di bi ꞌuege de Jeoba. Mu̱ nuꞌi gi pe̱ꞌtsi yä bätsi, fatsꞌi pa dä ntiende ge mu̱ dä ntsitsꞌi ko nuꞌu̱ yä jäꞌi hingi pe̱päbi Jeoba, dä za dä ꞌme̱di yä ntsitsꞌi kongeꞌä ja ngu bi thogi Salomón. Koꞌmu̱ Salomón bi ꞌuege de Jeoba, ꞌnehe bi hege rä tsꞌu̱tꞌhui. Nuꞌu̱ yä rey bi mꞌu̱i mꞌe̱fa, ꞌnehe bi japi rä hnini dä ꞌuege de Jeoba. Hänge ndunthi de nuꞌu̱ yä profeta Jeoba xa bi thogi yä ntꞌu̱tsate ꞌne asta bi tho. Ha näꞌä rä tsꞌu̱tꞌhui de rä norte, kasi gatꞌho yä jäꞌi bi ꞌuege de Jeoba po rä tsꞌoki Jezabel. Mäske njabu̱, ndunthi yä israelita hää bi me̱päbi Jeoba ko ngatꞌho yä koraso, ngu rä rey Jehosafat ꞌne rä profeta Elías.