RÄ LECCIÓN 51
¿Hanja di debe gä usa mä nehu̱ pa gä eꞌspäbihu̱ rä nsu rä Zi Dada Jeoba?
Nuꞌmu̱ rä Zi Dada Jeoba bi hyogägihu̱, ꞌnehe bi rꞌakägihu̱ nꞌa rä regalo xa mähotho: Mä nehu̱ pa dä za gä ñähu̱. ¿Gi kamfri ge rä Zi Dada Jeoba turämu̱i hanja di usahu̱ nunä regalo? ¡Mfädiꞌä! (Hñeti Santiago 1:26). Hänge, ¿hanja dä za gä usahu̱ xä ñho mä nehu̱ pa njabu̱ näꞌä di mäñhu̱ dä ꞌñeꞌspäbi rä nsu rä Zi Dada Jeoba?
1. ¿Hanja dä za gä usahu̱ xä ñho mä nehu̱?
Rä Biblia engägihu̱: «Sigi gi hñuꞌmpämu̱ihu̱ nꞌa ngu mänꞌaa ꞌne nupämfenihu̱ nꞌa ngu mänꞌaa» (1 Tesalonicenses 5:11, TNM). De gatꞌho nuꞌu̱ yä jäꞌi gi konose, ¿gi kamfri ge nꞌa de geꞌu̱ di japäbi mꞌe̱di toꞌo dä hñuꞌmpäbi rä mu̱i? ¿Te dä hogi gi pe̱fi pa njabu̱ gi nupäbi rä mfeni? Dä za gi xipäbi ge gi mädi ꞌne gi turimu̱i po geꞌä. ꞌNehe, dä za gi xipäbi nuꞌu̱ yä hogä mꞌu̱i gi handi ge pe̱ꞌtsi. Pe, ¿dä za gi beni nꞌa rä testo de rä Biblia näꞌä dä za gi ꞌñuti pa gi nupäbi rä mfeni? Xi ja ndunthi yä testo de rä Biblia nuꞌu̱ dä za gä usahu̱ pa gä nupäbihu̱ yä mfeni märꞌaa. Beni nzäntho ge nuꞌu̱ yä noya di usahu̱ ora di zofohu̱ märꞌaa, dä za dä benefisiabi o dä za dä afektabi. Hänge nzäntho debe gä tratahu̱ gä ñähu̱ ko rä ñhojäꞌi ꞌne rä tꞌekꞌei (Proverbios 15:1).
2. ¿Te mä noya hindi debe gä mäñhu̱?
Rä Biblia enä: «Ogi ñähu̱ ko yä tsꞌo noya» (hñeti Efesios 4:29). Ora xikägihu̱ njabu̱ rä Noya Äjuä, signifika ge hindi debe gä mäñhu̱ yä ñhädondo, nixi yä tsꞌone, nixi nuꞌu̱ yä noya u̱ni o di ofende märꞌaa. ꞌNehe, hindi debe gä no̱nihu̱ märꞌaa, nixi gä mäñhu̱ yä nkꞌuamba o yä nhemhñä (hñeti Proverbios 16:28).
3. ¿Te ma dä maxkägihu̱ pa njabu̱ nzäntho dä bo̱ni de mä nehu̱ yä hogä noya?
Kasi nzäntho nuꞌu̱ yä noya po̱ni de ha mä nehu̱, udi näꞌä xa mäjuäni di mbenihu̱ ꞌne näꞌä ja ha mä korasohu̱ (Lucas 6:45, TNM). Hänge xa mähyoni gä ñuꞌtsihu̱ ha mä ñäxuhu̱ nuꞌu̱ yä mfeni xä ñho, nuꞌu̱ xä ntꞌaxi, nuꞌu̱ udi rä mhäte ꞌne nuꞌu̱ di nsunda Äjuä (Filipenses 4:8). Pa gä lograhu̱ gä pe̱ꞌtsihu̱ nuya yä hogä mfeni, xa mähyoni gä jamäsuhu̱ näꞌä di handihu̱, näꞌä di o̱dehu̱ ꞌne xa mähyoni gä huahnihu̱ yä hogä amigo (Proverbios 13:20). Pe̱ꞌtsi te gä mbenihu̱ mꞌe̱tꞌo änte de gä ñähu̱. Xa mähyoni gä ntso̱ꞌmihu̱ mꞌe̱tꞌo ꞌne gä handihu̱ hanja ma dä afektabi märꞌaa näꞌä ma gä mäñhu̱. Rä Biblia enä: «Nuꞌu̱ hingi mbeni mꞌe̱tꞌo pa dä ñä; yä noya su̱nte ngu nꞌa rä majuai. Pe yä noya nuꞌu̱ ja yä mfädi, ꞌñenä ngu nꞌa rä ꞌñethi» (Proverbios 12:18).
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ hanja di debe gä usa mä nehu̱ pa gä eꞌspäbihu̱ rä nsu rä Zi Dada Jeoba ꞌne gä nupäbihu̱ yä mfeni märꞌaa.
4. Jamäsu näꞌä gi mää
Gatꞌho nuju̱ rꞌabu̱ hixtä jamäsuhu̱ näꞌä xtä mäñhu̱ ꞌne mꞌe̱fa xtä arrepentihu̱ (Santiago 3:2). Hñetihu̱ Gálatas 5:22, 23, TNM, ꞌnepu̱ thädihu̱ nuya yä ntꞌani:
De nuya yä hogä mꞌu̱i no̱ni ha nuya yä testo, ¿ndaꞌä dä hogi gi yꞌapäbi rä Zi Dada Jeoba ge dä maxꞌäꞌi gi pe̱ꞌtsi? ¿Por hanja?
Hñetihu̱ 1 Corintios 15:33, TNM, ꞌnepu̱ thädihu̱ nunä rä ntꞌani:
¿Gi kamfri ge mu̱ di o̱dehu̱ ꞌne di handihu̱ yä kosa xä ntsꞌo, o di pe̱ꞌtsihu̱ yä tsꞌo amigo, ko rä tiempo ma gä ñähu̱ ja ngu ñäꞌu̱?
¿Te ma dä thogi mu̱ di o̱dehu̱ ꞌne di handihu̱ yä kosa xä ntsꞌo, o di pe̱ꞌtsihu̱ yä tsꞌo amigo? ¿Te ma dä thogi mu̱ di o̱dehu̱ ꞌne di handihu̱ yä kosa xä ñho, ꞌne di pe̱ꞌtsihu̱ yä hogä amigo?
Hñetihu̱ Eclesiastés 3:1, 7, ꞌnepu̱ thädihu̱ nunä rä ntꞌani:
¿Hämꞌu̱ mänꞌa dä hogi hinte gi mää o gi to̱ꞌmi asta mä nꞌa rä ora o mä nꞌa rä pa?
5. Ñä xä ñho de märꞌaa
¿Te dä za gä pe̱fihu̱ pa njabu̱ hingä u̱nihu̱ märꞌa ko näꞌä di mäñhu̱? Yꞌe̱ntsꞌihu̱ rä BIDEO, ꞌnepu̱ thädihu̱ nuya yä ntꞌani:
Ja ngu dä handihu̱ ha rä bideo, ¿por hanja nꞌa rä ku bi ne bi paati näꞌä rä modo de hanja mi no̱ni märꞌaa?
¿Te bi me̱fi pa bi paati näꞌä rä mꞌu̱i?
Hñetihu̱ Eclesiastés 7:16, ꞌnepu̱ thädihu̱ nunä rä ntꞌani:
¿Te dä hogi gi beni ora ya ma gi fu̱di gi no̱ni märꞌaa?
Hñetihu̱ Eclesiastés 7:21, 22, ꞌnepu̱ thädihu̱ nunä rä ntꞌani:
¿Hanja dä za dä maxꞌäꞌi nuya yä testo pa gi dominä ri ne ora gi o̱de ge märꞌa ñä xä ntsꞌo de geꞌi?
6. Zofo ko rä mhäte ri familia
Rä Zi Dada Jeoba ne ge gä zofohu̱ mä familiahu̱ ko rä mhäte. Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:
¿Te dä za dä maxꞌäꞌi pa gi zofo ko rä mhäte ri familia?
Hñetihu̱ Efesios 4:31, 32, TNM, ꞌnepu̱ thädihu̱ nunä rä ntꞌani:
¿Hanja dä za gä usa mä nehu̱ pa gä nupäbihu̱ rä mfeni mä familiahu̱?
Rä Zi Dada Jeoba ꞌnehe xä mää hängu di mädi rä Tꞌu̱. Hñetihu̱ Mateo 17:5, TNM, ꞌnepu̱ thädihu̱ nunä rä ntꞌani:
¿Hanja dä za gi de̱mbäbi rä ejemplo rä Zi Dada Jeoba ora gi nzofo ri familia?
Hyoni hanja gi felisita ꞌne gi nupäbi yä mfeni märꞌaa.
RꞌA YÄ JÄꞌI ENÄ: «Nuga di mää näꞌä di mbeni. Mu̱ märꞌa hindi ho, hindi mportagi».
Xi nuꞌi, ¿gi ꞌmu̱i de acuerdo ko näꞌä mbeni nuꞌu̱ yä jäꞌi? ¿Por hanja?
NÄꞌÄ DÄ PÄDIHU̱
Näꞌä di mäñhu̱ ja ndunthi rä tsꞌe̱di pa dä benefisiabi märꞌaa o pa dä perjudikabi. Hänge xa mähyoni ge mꞌe̱tꞌo gä mbenihu̱ te ma gä mäñhu̱, hämꞌu̱ ma gä mäñhu̱ ꞌne hanja ma gä mäñhu̱ nꞌa rä kosa.
Pa gä benihu̱
¿Hanja dä za gi usa ri ne pa gi nupäbi yä mfeni märꞌaa?
¿Te mä noya hindi debe gi mää ora gi ñäui märꞌaa?
¿Te ma dä maxkägihu̱ pa nzäntho gä usa mä nehu̱ pa gä nupäbi yä mfeni märꞌaa ꞌne gä nzofohu̱ ko rä mhäte?
HABU̱ DÄ ZA GI PÄDI MÄ NꞌA TU̱I
¿Te ma dä maxkägihu̱ gä usahu̱ xä ñho mä nehu̱?
Ma gä udihu̱ ge näꞌä di mäñhu̱ di ñꞌoui rä mfädi Äjuä (8:04)
Pädi te ma dä maxkägihu̱ gä u̱tsahu̱ yä tsꞌone ꞌne yä ñhädondo.
«¿Por hanja hinxä ñho toꞌo dä mängä yä tsꞌone?» (Ehe ha jw.org)
Pädi te ma dä maxkägihu̱ gä u̱tsahu̱ yä nkꞌuamba.
Hyandi hanja rä Zi Dada Jeoba bi matsꞌi nꞌa rä ñꞌo̱ho̱ bi hye̱pu̱ nuꞌu̱ yä tsꞌone mi mää.