RÄ LECCIÓN 54
¿Toꞌo näꞌä «rä ꞌme̱go, rä hogä yꞌo̱de ꞌne xa ja rä mfeni» no̱ni ha rä Biblia?
Rä Biblia enä ge rä Hesu, go geꞌä rä ñäxu de rä mhuntsꞌi (Efesios 5:23, TNM). Dende mähetsꞌi rä Hesu ya bi mända ngu nꞌa rä Rey. Pe nuua ha rä Xiꞌmhai, di usa näꞌä «rä ꞌme̱go, rä hogä yꞌo̱de ꞌne xa ja rä mfeni» pa di diriji nuꞌu̱ xa mäjuäni yä kristianu (hñeti Mateo 24:45, TNM). Rä Hesu go geꞌä bi huahni näꞌä «rä ꞌme̱go» ꞌne bi umbäbi rä autorida pa dä tomä rꞌa yä desision. Pe mäske nunä ꞌme̱go xä tꞌumbäbi rä autorida, nuni pe̱fi gatꞌho näꞌä di mända rä Kristo ꞌne ꞌmu̱i pa dä matsꞌi nuꞌu̱ märꞌa yä kristianu to̱ꞌmi dä ma mähetsꞌi. Pe, ¿xi toꞌo näꞌä rä ꞌme̱go ꞌne te pe̱fi pa di su nuꞌu̱ xa mäjuäni yä kristianu?
1. ¿Toꞌo näꞌä «rä ꞌme̱go, rä hogä yꞌo̱de ꞌne xa ja rä mfeni»?
Rä Zi Dada Jeoba nzäntho xä usa nꞌa rä ñꞌo̱ho̱ o nꞌa grupo yä ñꞌo̱ho̱ pa dä gu̱hni ꞌne dä diriji rä hnini (Malaquías 2:7; Hebreos 1:1, TNM). Mꞌe̱fa de bi du rä Hesu, yä apostol ꞌne nuꞌu̱ yä anciano de Jerusalén, go geꞌu̱ bi diriji nuꞌu̱ xa mäjuäni yä kristianu (Hechos 15:2, TNM). Näꞌä rä modo de hanja nuyu̱ yä ñꞌo̱ho̱ mi diriji rä hnini Äjuä, geꞌä pe̱fibye̱ nuꞌu̱ yä anciano di forma rä Cuerpo Gobernante de yä testigo rä Jeoba. Nunä tꞌu̱kä grupo go di nkargo dä uni näꞌä rä ñhuni bi ehe de rä Noya Äjuä, ꞌne go di diriji nuꞌu̱ xa mäjuäni yä kristianu pa njabu̱ di predika po gatꞌho rä Xiꞌmhai. Nuni rä tꞌu̱kä grupo go gehni «rä ꞌme̱go, rä hogä yꞌo̱de ꞌne xa ja rä mfeni» bi huahni rä Hesu (Mateo 24:45a, TNM). Gatꞌho nuꞌu̱ yä ñꞌo̱ho̱ di forma rä Cuerpo Gobernante, xä thahni pa dä ma mähetsꞌi dä mända ko rä Hesu.
2. ¿Te mä ñhuni uni näꞌä «rä ꞌme̱go, rä hogä yꞌo̱de ꞌne xa ja rä mfeni»?
Rä Hesu bi nkargobi nunä ꞌme̱go «dä supäbi nuꞌu̱ märꞌa yä ꞌme̱go ꞌne [...] dä umbäbi rä ñhuni ora mähyoni» (Mateo 24:45b, TNM). Ja ngu näꞌä rä ñhuni di tsihu̱ hyaxtho faxkägihu̱ pa dä nja mä tsꞌe̱dihu̱ ꞌne dä nja mä nzakihu̱, näꞌä rä ñhuni bi ehe de rä Noya Äjuä, rꞌakägihu̱ rä tsꞌe̱di pa gä yꞌohu̱ mänjuäntho ha rä ꞌñuu rä Zi Dada Jeoba ꞌne faxkägihu̱ pa gä kumplihu̱ ko näꞌä bi mändagihu̱ rä Hesu (1 Timoteo 4:6, TNM). Näꞌä rä ñhuni geꞌu̱ nuꞌu̱ yä ntꞌudi de rä Noya Äjuä di hänihu̱ ha yä mhuntsꞌi, ha yä däta mhuntsꞌi, ꞌne ha nuꞌu̱ yä he̱ꞌmi ꞌne yä bideo uni rä hnini Äjuä. Gatꞌho nunä rä ñhuni, faxkägihu̱ gä ntiendehu̱ rä bolunta rä Zi Dada Jeoba ꞌne faxkägihu̱ gä pe̱ꞌtsihu̱ nꞌa rä hogä ntsitsꞌi Kongeꞌä.
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ por hanja di jakägihu̱ mꞌe̱di näꞌä «rä ꞌme̱go, rä hogä yꞌo̱de ꞌne xa ja rä mfeni», fädi ngu rä Cuerpo Gobernante de yä testigo rä Jeoba.
Rä Cuerpo Gobernante go geꞌä di jamäsu yä testigo rä Jeoba de gatꞌho rä Xiꞌmhai: Umbäbi näꞌä rä ñhuni bi ehe de rä Noya Äjuä, di diriji ꞌne umbäbi rä mfatsꞌi ora ja yä tsꞌo thogi.
3. Rä hnini Äjuä ꞌmu̱i organisado
Rä Hesu di usa rä Cuerpo Gobernante pa di organisa näꞌä rä ꞌme̱fi ja yä testigo rä Jeoba po gatꞌho rä Xiꞌmhai. Näꞌä rä modo hanja ꞌmu̱i organisado, njabu̱ mi ꞌmu̱i organisado nuꞌu̱ yä mu̱di kristianu. Yꞌe̱ntsꞌihu̱ rä BIDEO.
Hñetihu̱ 1 Corintios 14:33, 40, TNM, ꞌnepu̱ thädihu̱ nunä rä ntꞌani:
¿Hanja udi rä Biblia ge rä Zi Dada Jeoba ne ge dä mꞌu̱i organisado nuꞌu̱ yä jäꞌi pe̱päbi?
4. Näꞌä rä ꞌme̱go rä hogä yꞌo̱de di organisa yä kristianu pa dä predika
Nuꞌu̱ yä mu̱di kristianu bi dedika dä ꞌñuti märꞌa yä jäꞌi de rä Noya Äjuä. Hñetihu̱ Hechos 8:14, 25, TNM, ꞌnepu̱ thädihu̱ nuya yä ntꞌani:
¿Toꞌo mi desidi habu̱ mi debe drä predika?
¿Te bi me̱fi rä apostol Pedro ꞌne rä apostol Juan ko näꞌä bi mända nuꞌu̱ märꞌa yä apostol?
Dä tꞌuti de rä Noya Äjuä yä jäꞌi de gatꞌho rä Xiꞌmhai, gehnä rä ꞌme̱fi mänꞌa di prokura dä organisa rä Cuerpo Gobernante. Yꞌe̱ntsꞌihu̱ rä BIDEO.
Rä Hesu bi ꞌñenä ge xa mähyoni dä tꞌuti yä jäꞌi de rä Noya Äjuä. Hñetihu̱ Marcos 13:10, TNM, ꞌnepu̱ thädihu̱ nuya yä ntꞌani:
¿Por hanja rä Cuerpo Gobernante xa di prokura ge yä jäꞌi de gatꞌho rä Xiꞌmhai dä yꞌo̱de de rä Noya Äjuä?
¿Gi kamfri ge hää di ja mꞌe̱di ge näꞌä «rä ꞌme̱go rä hogä yꞌo̱de» dä organisa yä kristianu pa dä predika po gatꞌho rä Xiꞌmhai? ¿Por hanja?
5. Näꞌä rä ꞌme̱go rä hogä yꞌo̱de, di diriji nuꞌu̱ xa mäjuäni yä kristianu
Rä Cuerpo Gobernante di diriji nuꞌu̱ xa mäjuäni yä kristianu ꞌmu̱i po gatꞌho rä Xiꞌmhai. ¿Hanja di ja rä Cuerpo Gobernante pa di desidi te mä instrucción dä uni? Hyandi te mi pe̱fi rä cuerpo gobernante näꞌä mi diriji nuꞌu̱ yä mu̱di kristianu. Hñetihu̱ Hechos 15:1, 2, TNM, ꞌnepu̱ thädihu̱ nuya yä ntꞌani:
¿Por hanja nꞌa rä pa bi diskuti nuꞌu̱ yä mu̱di kristianu?
¿Habu̱ bi ma rä apostol Pablo, Bernabé ꞌne nuꞌu̱ märꞌa yä kristianu pa dä yꞌadi rä mfatsꞌi ꞌne drä solusionä nunä asunto?
Hñetihu̱ Hechos 15:12-18, 23-29, TNM, ꞌnepu̱ thädihu̱ nunä rä ntꞌani:
Pa dä hñäni rä mfatsꞌi de rä Zi Dada Jeoba, ¿te mi pe̱fi änte de dä tomä nꞌa rä desision nuꞌu̱ yä apostol ꞌne yä anciano mi diriji nuꞌu̱ yä mu̱di kristianu? (Hyandihu̱ mänꞌaki yä versículo 12, 15, ꞌne 28).
Hñetihu̱ Hechos 15:30, 31, TNM ꞌne 16:4, 5, TNM, ꞌnepu̱ thädihu̱ nuya yä ntꞌani:
¿Te bi senti nuꞌu̱ yä kristianu nuꞌmu̱ bi hñäni nuꞌu̱ yä karta xki yꞌofo nuꞌu̱ yä apostol ꞌne yä anciano mi ꞌmu̱i ha Jerusalén?
Koꞌmu̱ nuꞌu̱ yä mu̱di kristianu bi me̱fi näꞌä bi mända rä cuerpo gobernante, ¿te mä jäpi bi nheki ha yä mhuntsꞌi?
Hñetihu̱ 2 Timoteo 3:16, TNM ꞌne Santiago 1:5, TNM, ꞌnepu̱ thädihu̱ nunä rä ntꞌani:
Xi mäpaya, ¿habu̱ honi rä mfatsꞌi rä Cuerpo Gobernante ora ma dä tomä nꞌa rä desision?
RꞌA YÄ JÄꞌI ENÄ: «Mu̱ gi pe̱fi näꞌä mända rä Cuerpo Gobernante, nuꞌmu̱ go gi o̱te yä jäꞌi hingo Äjuä».
Xi nuꞌi, ¿te di kombenseꞌi ge rä Hesu go geꞌä xä hñutsꞌi rä Cuerpo Gobernante mäpaya pa dä diriji rä hnini Äjuä?
NÄꞌÄ DÄ PÄDIHU̱
Rä Cuerpo Gobernante go geꞌä «rä ꞌme̱go, rä hogä yꞌo̱de ꞌne xa ja rä mfeni» no̱ni ha rä Biblia. Ñhesukristo go geꞌä bi huahni nunä ꞌme̱go ꞌne bi nkargobi dä diriji, ꞌne dä umbäbi näꞌä rä ñhuni bi ehe de rä Noya Äjuä gatꞌho nuꞌu̱ xa mäjuäni yä kristianu ꞌmu̱i po gatꞌho rä Xiꞌmhai.
Pa gä benihu̱
¿Toꞌo go bi huahni näꞌä «rä ꞌme̱go, rä hogä yꞌo̱de ꞌne xa ja rä mfeni»?
¿Te pe̱fi rä Cuerpo Gobernante mäpaya pa di sugägihu̱?
Xi nuꞌi, ¿gi kamfri ge rä Cuerpo Gobernante go geꞌä näꞌä «rä ꞌme̱go, rä hogä yꞌo̱de» no̱ni ha rä Biblia?
HABU̱ DÄ ZA GI PÄDI MÄ NꞌA TU̱I
Hyandi te pe̱fi rä Cuerpo Gobernante pa di organisa ꞌne pa di kumpli ko näꞌä rä ꞌme̱fi xrä nkargobi.
«¿Te me̱ꞌä rä Cuerpo Gobernante de yä testigo rä Jeoba?» (Ehe ha jw.org)
Hyandi te pe̱fi rä Cuerpo Gobernante pa di asegura ge hää mäjuäni näꞌä rä imformäsio rꞌakägihu̱.
¿Te di mbeni nuꞌu̱ yä ñꞌo̱ho̱ di forma rä Cuerpo Gobernante de näꞌä rä ꞌme̱fi xrä nkargobi dä ja?
¿Hanja xtä handihu̱ ha yä mhuntsꞌi ꞌne ha yä däta mhuntsꞌi ge rä Zi Dada Jeoba go geꞌä di diriji rä Cuerpo Gobernante?