Rä Ngunsadi pa toꞌo udi rä Noya Äjuä 2015, ma dä maxkägihu̱ pa gä udihu̱ mänꞌa xä ñho
1 Rä rey Dabid bi ꞌñenä: «ꞌNe gatꞌho näꞌä gä mää ꞌne näꞌä gä beni ha mä koraso, gatꞌho dä zo̱ho̱ gi hyandi xä ñho ha ri mäkä thandi, mä Zi Dadaꞌi Jeoba, go geꞌi mä Ntakiꞌi ꞌne mä Ñänteꞌi» (Sal. 19:14). Ja ngu rä Dabid, nuju̱ ꞌnehe, di nehu̱ ge rä Zi Dada Jeoba dä numäñho nuꞌu̱ mä noyahu̱. Hänge pa nuju̱, nꞌa rä däta nsu gä uñhu̱ ntꞌo̱de näꞌä mäjuäni, ꞌne gä uñhu̱ rꞌa yä hogä noya ha rä mhuntsꞌi. Rä Ngunsadi pa toꞌo udi rä Noya Äjuä, gehnä nꞌa de nuꞌu̱ yä mfatsꞌi di rꞌakägihu̱ rä Zi Dada Jeoba pa gä pädihu̱ hanja gä uñhu̱ ntꞌo̱de. Nunä di tꞌo̱tꞌe po gatꞌho rä Xiꞌmhai ha thogi de 111.000 yä mhuntsꞌi. Nunä Rä Ngunsadi, xä matsꞌi ndunthi yä ku ꞌne yä nju de gatꞌho yä hnini ꞌne yä mꞌu̱i, pa dä ꞌñudi mänꞌa xä ñho rä Noya Äjuä ko ndunthi rä tsꞌe̱di, rä tꞌekꞌei ꞌne pa gä tso̱mbäbihu̱ ha yä koraso yä jäꞌi (Hech. 19:8; Col. 4:6).
2 Rä programä pa Rä Ngunsadi de rä je̱ya 2015, xä thai ha nuya yä he̱ꞌmi: Traducción del Nuevo Mundo de las Santas Escrituras [bi12], Ra ꞌRaꞌyo Testamento o Ár ꞌRaꞌyo Nkohi Jö; Äjuä pe̱ꞌtsi rꞌa yä hogä noya pa nuꞌi [fg], Nuju̱ dä za gä ntsitsꞌihu̱ ko rä Zi Dada [gf], ¿Toꞌo pe̱päbi rä bolunta Jeoba mäpaya? [jl], Yꞌo̱te Äjuä pa dä za gi ꞌmu̱i pa nzäntho [ll]. ꞌNehe, ma dä nja rꞌa yä mpadi ha rä Thoꞌtsi 1, ꞌne ha nuꞌu̱ yä minuto pe̱ꞌtsi näꞌä thoꞌtsi Hñeti rä Mäkä Tꞌofo. Ma gä handihu̱ te mä mpadi ma dä nja.
3 Hñeti rä Mäkä Tꞌofo. Näꞌä ku ma dä uni nunä thoꞌtsi, pe̱ꞌtsi yoho minuto pa dä uni nꞌa rä ntꞌudi näꞌä bi dini ha nuꞌu̱ yä mꞌede de rä Mäkä Tꞌofo de näꞌä semänäꞌä. Pe̱ꞌtsi te dä ñhoki xä ñho, pa näꞌä ntꞌudi dä uni, dä matsꞌi yä ku de rä mhuntsꞌi ꞌne hindä thogi de nuꞌu̱ yoho minuto xä tꞌumbi. Mähyoni dä zoogi rꞌato minuto, pa njabu̱ nuꞌu̱ yä ku xä ntini, dä uni yä komentario de gä 30 segundo. Pa gä uñhu̱ nꞌa komentario de gä 30 segundo, di ja mꞌe̱di gä ñhokihu̱ xä ñho. Pe mu̱ gä o̱thu̱ ntsꞌe̱di po gä jahu̱ njabu̱, ma gä hopäbihu̱ ge märꞌa yä ku dä uni ꞌnehe yä komentario, ꞌne ma dä maxkägihu̱ ndunthi nuꞌmu̱ di uñhu̱ ntꞌo̱de.
4 Thoꞌtsi 1. Nubye̱ ho̱nse̱ ja hñuu minuto pa toꞌo dä hñeti nuꞌu̱ yä xe̱ni de rä Mäkä Tꞌofo. Näꞌä ku pe̱ꞌtsi nunä thoꞌtsi, xa mähyoni ge dä nsaya ndunthi yä mꞌiki. Nuꞌmu̱ di nsaya, dä jamäsu ge dä hñeti ntsꞌe̱di, hindä paati yä noya, hindä nkꞌu̱ne, ꞌne dä ꞌñudi ge di ntiende näꞌä heti. Rä hnini Jeoba o̱tꞌe ntsꞌe̱di po dä hñeti xä ñho yä he̱ꞌmi, ngeꞌä di pädihu̱ ge njabu̱ mänꞌa dä za gä xo̱kämbenihu̱ xä ñho Jeoba. Di rꞌakägihu̱ ndunthi rä johya gä handihu̱ ge ndunthi yä bätsi pädi dä hñeti xä ñho yä he̱ꞌmi. Po geꞌä di jamädibihu̱ yä dada, ngeꞌä o̱tꞌe ntsꞌe̱di po dä matsꞌi ko rä mhäte yä zi bätsi pa dä bädi dä hñeti xä ñho yä he̱ꞌmi.
5 Thoꞌtsi 2. Nunä thoꞌtsi ma dä dura 5 minuto, ꞌne go ma dä uni nꞌa rä nju. Näꞌä nju dä za dä huahni märꞌa yä testo de rä Mäkä Tꞌofo pa dä uni xä ñho näꞌä temä bi tꞌumbi. Mähyoni dä uni rä thoꞌtsi xa ngu nuꞌmu̱ di ungä ntꞌo̱de rä Noya Äjuä ha rä territorio. Rä superintendente de Rä Ngunsadi, ma dä xipäbi näꞌä nju toꞌo ma dä matsꞌi dä uni rä thoꞌtsi.
6 Thoꞌtsi 3. Nunä thoꞌtsi ma dä dura 5 minuto, ꞌne dä za dä uni nꞌa ku o nꞌa nju. Mu̱ go ma dä uni nꞌa rä nju, nuꞌmu̱ ma dä ja ngu nuꞌmu̱ uni rä thoꞌtsi 2. Mu̱ go ma dä uni nꞌa ku, nuꞌmu̱ nunä thoꞌtsi ma dä uni dende ha rä atril pa gatꞌho nuꞌu̱ xä ntini ha rä Ngu de gä Mhuntsꞌi. Toꞌo ma dä uni nunä thoꞌtsi, ma dä huahni xä ñho nuꞌu̱ yä testo ma dä usa pa dä uni näꞌä temä bi tꞌumbi.
7 Tsꞌofo. Kada dä uadi nꞌa rä thoꞌtsi, rä superintendente de Rä Ngunsadi ma dä usa 2 minuto pa dä jamädibi näꞌä ku po näꞌä rä thoꞌtsi bi uni ꞌne pa dä no̱ni nꞌa de nuꞌu̱ yä tsꞌofo mää rä mfistꞌofo Benefíciese de la Escuela del Ministerio Teocrático.
Mu̱ gä jamäsuhu̱ nuꞌu̱ yä tsꞌofo tꞌakägihu̱, ma dä maxkägihu̱ gä udihu̱ mänꞌa xä ñho
8 Nuꞌu̱ yä ku thogi ha Rä Ngunsadi, mähyoni dä me̱ꞌtsi nꞌa rä mfistꞌofo Benefíciese ꞌne dä jamäsu habu̱ enä Lista personal de aspectos de la oratoria, de yä nxii 79 asta 81. Xti uadi rä mhuntsꞌi, rä superintendente de Rä Ngunsadi, ma dä kalifikabi kada nꞌa de nuꞌu̱ yä ku bi uni yä thoꞌtsi ꞌne dä yꞌambäbise̱ mu̱ bi hyoki näꞌä ejercicio ehe ha rä mfistꞌofo Benefíciese, habu̱ xä tsꞌokuäbi dä mpe̱fi. ꞌNe ja gekua o mä nꞌa rä pa, rä superintendente de Rä Ngunsadi dä za dä nupäbi yä mfeni nuꞌu̱ yä ku, ꞌne dä za dä umbäbi rꞌa yä tsꞌofo mu̱ di ja mꞌe̱di. Mähyoni ge nuꞌu̱ yä ku häni nuꞌu̱ yä tsꞌofo, dä hyandi ngu nꞌa rä mfatsꞌi näꞌä tꞌumbi pa dä ꞌñudi mänꞌa xä ñho rä Noya Äjuä (1 Tim. 4:15).
9 Mu̱ nꞌa de nuꞌu̱ yä ku bi thogi de nuꞌu̱ yä minuto xä tꞌumbi, rä superintendente de Rä Ngunsadi o rä maxte, ma dä hyoni hanja dä xipi. Pa geꞌä, dä za dä hyoni te dä zu̱ntꞌi o dä gantꞌi zi njante, ꞌne njabu̱ näꞌä ku o näꞌä nju uni rä thoꞌtsi, dä bädi ge mähyoni ya dä huati rä thoꞌtsi ꞌne dä gäi de rä plataforma (hyandi rä mfistꞌofo Benefíciese, rä nxii 282, rä parrafo 4).
10 Nupäbi yä mfeni gatꞌho toꞌo ya di ntini ha yä mhuntsꞌi, kamfri ꞌne ꞌmu̱i ja ngu xä bädi de rä Mäkä Tꞌofo, pa dä yꞌadi dä thogi ha Rä Ngunsadi (hyandi rä mfistꞌofo Benefíciese, rä nxii 282, rä parrafo 6). Näꞌä ntꞌudi uni nunä Rä Ngunsadi, xä matsꞌi rä hnini Äjuä pa ko rä tꞌekꞌei ꞌne rä mhäte, dä ꞌñudi xä ñho nuꞌu̱ yä hogä noya de rä Tsꞌu̱tꞌhui Äjuä. ¡Hängu di johya rä Zi Dada Jeoba, nuꞌmu̱ di usahu̱ näꞌä rä ntꞌudi xä rꞌakägihu̱ pa gä eꞌspäbihu̱ rä nsu! (Sal. 148:12, 13; Is. 50:4.)