O̱thu̱ «näꞌä xä ñho» ꞌne umbäbihu̱ rä tsaya märꞌaa (Luc. 6:45a)

¿Hänge gatꞌho di ne gä o̱thu̱ «näꞌä xä ñho» ꞌne gä “umfu̱ tsaya nuꞌu̱ toꞌo tso̱ngägihu̱”? (Rom. 12:13.) Yä ansiano geꞌu̱ di gu̱tꞌi rä ꞌñuu pa handi hanja dä tꞌumbäbi nꞌa zi ñhuni ꞌne dä tꞌumbi pa rä pasaje nuꞌu̱ yä ku bi ehe uni yä thoꞌtsi ha rä mhuntsꞌi. Pe, rꞌa yä publikador di ntsa dä mbitabi ha yä nguu nuꞌu̱ yä ku tso̱ngägihu̱, ngeꞌä hingi pe̱ꞌtsi nꞌa rä hogä nguu o hingi pe̱ꞌtsi ndunthi rä bojä pa dä dai te dä hyokuäbi dä zi. Mu̱ nuꞌi gi mbeni jabu̱, ma dä maxkägihu̱ gä ntso̱ꞌmihu̱ ha näꞌä rä tsꞌofo bi umbäbi Hesu rä Märta (Luc. 10:39-42). Rä Hesu bi ꞌñudi ge nuꞌmu̱ di mbitabihu̱ yä ku ha mä nguhu̱, hingä mähyoni nꞌa rä hogä ñhuni nixi nꞌa rä hogä nguu. Näꞌä mänꞌa mähyoni, gä nupä mfenihu̱ nꞌa ngu mänꞌaa. Mu̱ gä jamäsuhu̱ nunä tsꞌofo, ma dä za gä o̱thu̱ «näꞌä xä ñho» po märꞌa mä kuhu̱, ja ngu di mändagihu̱ rä Noya Äjuä (3 Juan 5-8).