Hanja dä za gä uñhu̱ ntꞌo̱de mänꞌa xä ñho: pädi hanja gi thädi nuꞌmu̱ gi tini nꞌa rä jäꞌi xa di nkue̱

Por hanja xa mähyoni. Nuꞌmu̱ di uñhu̱ ntꞌo̱de, rꞌa yä jäꞌi thädi ko rä tꞌekꞌei. Pe rä Hesu bi ꞌñenä ge ma xä mꞌu̱i rꞌa yä jäꞌi nuꞌu̱ ma dä u̱tsagihu̱ (Juan 17:14). Hänge nuju̱ ya di pädihu̱ ge rꞌabu̱ ma gä tiñhu̱ rꞌa yä jäꞌi nuꞌu̱ xa di nkue̱ nuꞌmu̱ di tso̱nihu̱. Ora thogi njabu̱, pe̱ꞌtsi te gä pädihu̱ hanja gä thädihu̱ pa njabu̱ gä johyabihu̱ rä koraso Jeoba, näꞌä toꞌo di häꞌspäbihu̱ rä thuhu (Rom. 12:17-21; 1 Ped. 3:15). Mu̱ gä thädihu̱ ko rä ñhojäꞌi, hingä hopäbihu̱ dä te yä xuñha. ꞌNehe, tanto näꞌä jäꞌi di nkue̱ ꞌne nuꞌu̱ toꞌo dä hyanꞌgägihu̱, ma dä da ngue̱nda ge yä testigo rä Jeoba hindi hoñhu̱ yä tuhni, ꞌne dä za ge mä nꞌa rä pa, dä ꞌne dä yꞌo̱xkägihu̱ (2 Cor. 6:3).

Te dä za gä pe̱fihu̱:

Ogi nkue̱ ꞌne ꞌñudi rä ñhojäꞌi. Geꞌä ma dä japi dä kätꞌi yä kue̱. Ogi mbeni ge näꞌä jäꞌi di nkue̱ kongeꞌi (Ecl. 7:9). Zäi ge näꞌä jäꞌi pe̱ꞌtsi yä dumu̱i o gä tso̱ni ora mi thogi yä xuñha ha rä nguu. Rꞌabu̱ rꞌa yä zi jäꞌi dä za dä u̱tsagihu̱, pe ngeꞌä xä sipäbi yä nkꞌuamba o yä nhemhñä de gekhu̱ (2 Cor. 4:4).
Ñä ko rä ñhojäꞌi (Prov. 15:1). Yä testigo rä Jeoba hindi adihu̱ rä mpumbäte ngeꞌä di udihu̱ rä Noya Äjuä. Pe, ¿xiꞌmu̱ mi ähä näꞌä jäꞌi ꞌne dä japihu̱ bi nuhu̱ o mi ja ndunthi rä ꞌme̱fi? Nuꞌmu̱ hää dä hogi gä xiphu̱ ge dä punꞌgägihu̱. ¿Xi te dä za gä pe̱hu̱ mu̱ näꞌä jäꞌi di nkue̱ ngeꞌä xä sipi yä nkꞌuamba de gekhu̱? Dä za gä embäbihu̱: «Di ntiende por hanja gi nkue̱. Pe, näꞌä xkä yꞌo̱de de gekhe, hingä gatꞌho mäjuäni, ¿dä za gä xiꞌi por hanja?». Mu̱ näꞌä jäꞌi di nkue̱ po rꞌa de nuꞌu̱ mä jamfrihu̱ ngu näꞌä di mbenihu̱ de rä ji o de nuꞌu̱ yä jäꞌi di tꞌe̱ni de rä hnini Jeoba, nuꞌmu̱ dä za gä xipäbihu̱: «Hää di ntiendeꞌi. Märꞌa yä zi jäꞌi di mbeni njabu̱ ꞌnehe. Mu̱ gi rꞌakä nse̱ki, dä za gä utꞌäꞌi ko rä Mäkä Tꞌofo por hanja di pe̱fihe njabu̱».
Mu̱ näꞌä jäꞌi xa di nkue̱, rꞌabu̱ mänꞌa xä ñho hinte gä mäñhu̱ ꞌne gä mahu̱. Mu̱ näꞌä jäꞌi dä xikägihu̱ ge ya hingi ne ge yä testigo rä Jeoba dä zo̱ni, nuꞌi dä za gi xipäbi ge ma gä pe̱ꞌspäbihu̱ rä tꞌekꞌei näꞌä adi ꞌne ge ya hingä ma gä thogihu̱ ha rä nguu.

Pe̱fi nuya yä tsꞌofo nunä zänä:

Ora gi pe̱ꞌtsi ri Mhuntsꞌi de gä Familia, nsaya hanja gi thädi nuꞌmu̱ gi tini nꞌa rä jäꞌi xa di nkue̱.
Mu̱ gä tini nꞌa rä jäꞌi näꞌä xa di nkue̱, xki po̱ni de rä nguu, yꞌambäbi näꞌä ku gi ñꞌoui te ngu bi hyandi hanja gä thädi, ꞌne mu̱ xä za xkä thädi mänꞌa xä ñho.