Ha näꞌä Fenäte de rä du rä Hesu, ¡ma gä de̱mbäbihu̱ rä so̱ni ꞌne rä mhäte Jeoba ꞌne rä Hesu!

1. ¿Te o̱tꞌe ndunthi yä publikador ha nuꞌu̱ yä zänä tagi rä Fenäte de rä du rä Hesu?

¹ Rä Zi Dada Jeoba, di kumpli ko ndunthi rä so̱ni ꞌne rä mhäte näꞌä di promete. Pa dä mää rꞌa de nuꞌu̱ yä jäpi ma dä hä rä Tsꞌu̱tꞌhui Äjuä, Isaías 9:7 enä: «Gehnä ma dä me̱fi rä so̱ni Jeoba, näꞌä rä ndä de gatꞌho yä ndä». ꞌNehe, nuꞌmu̱ rä Hesu bi mꞌu̱kua ha rä Xiꞌmhai, bi ꞌñudi ndunthi rä so̱ni ꞌne rä mhäte po näꞌä xa mäjuäni (Juan 2:13-17; 4:34). Tatꞌä je̱ya, ha nuꞌu̱ yä zänä tagi rä Fenäte de rä du rä Hesu, yä miyontho yä publikador de̱mbäbi rä so̱ni ꞌne rä mhäte rä Zi Dada Jeoba ꞌne rä Hesu, ꞌne o̱tꞌe ntsꞌe̱di po dä ꞌueke mätsꞌu̱ de yä tiempo pa dä ungä ntꞌo̱de ha nuꞌu̱ yä paꞌu̱. Xi nuꞌi, ¿ma gi ꞌueke mätsꞌu̱ de ri tiempo ꞌnehe?

2. Pa rä 7 de märso, ¿te ma dä maxkägihu̱ gä pe̱fihu̱ näꞌä rä mhäte di pe̱ꞌtsihu̱ po Äjuä?

² Campaña pa rä Fenäte de rä du rä Hesu. Nunä je̱ya, ma gä fu̱dihu̱ dende rä 7 de märso gä mbitabihu̱ yä jäꞌi dä ntini ha nunä Fenäte. ¡Ma gä ñhokihu̱ dende nubye̱ pa gä uñhu̱ ntꞌo̱de mätsꞌu̱ ha nuꞌu̱ yä paꞌu̱! Gatꞌho yä mhuntsꞌi ma dä mpe̱fi ko ndunthi rä johya, ꞌne ma dä nxo̱ni dä hñäꞌspäbi rä imbitasio gatꞌho yä jäꞌi ha nuꞌu̱ yä territorio pe̱ꞌtsi. Yꞌo̱tꞌe ntsꞌe̱di po gi usa jw.org pa gi pe̱mpäbi nꞌa rä imbitasio ri pariente, nuꞌu̱ di mpe̱fi kongeꞌi, nuꞌu̱ gi pe̱ui ha rä skuela, ri rebisita, ri estudio, ꞌne gatꞌho nuꞌu̱ yä jäꞌi gi pädi.

3. ¿Hanja dä za gä uñhu̱ mätsꞌu̱ de mä tiempohu̱ pa gä uñhu̱ ntꞌo̱de ha näꞌä rä zänä märso ꞌne abril?

³ Mpe̱fi de gä prekursor ausiliar. Näꞌä rä mhäte di pe̱ꞌtsihu̱ po Äjuä, ma dä jakägihu̱ gä nxo̱nihu̱ gä uñhu̱ mätsꞌu̱ de mä tiempohu̱ pa gä uñhu̱ ntꞌo̱de. Pa rä märso ꞌne abril, dä za gä mpe̱fihu̱ de gä prekursor ausiliar ko ho̱nse̱ 30 yä ora. Ndunthi yä ku ma dä mprekursor ausiliar ha nuya yä zänä. Nuꞌmu̱ di nxadise̱hu̱ rä Mäkä Tꞌofo o ha mä Mhuntsꞌihu̱ de gä Familia, dä hogi gä xatuäbihu̱ rä Zi Dada Jeoba pa dä za gä handihu̱ hanja dä za gä pe̱fihu̱ njabu̱ ꞌnehe (Prov. 15:22). Mu̱ gi yꞌo̱tꞌe ntsꞌe̱di po gi ungä ntꞌo̱de mätsꞌu̱ ha nuya yä zänä, näꞌä ri johya ꞌne ri mhäte ma dä nupäbi yä mfeni märꞌa yä ku, ꞌne ma dä ne dä me̱fi njabu̱ ꞌnehe. Pe näꞌä mänꞌa xa mähyoni, ma gi ꞌñudi ge gi te̱mbäbi rä so̱ni ꞌne rä mhäte rä Hesu (Mar. 6:31-34).

4. ¿Te mä jäpi ma gä hänihu̱ mu̱ gä te̱mbäbihu̱ rä so̱ni ꞌne rä mhäte Jeoba ꞌne rä Hesu?

⁴ Mu̱ gä te̱mbäbihu̱ rä so̱ni ꞌne rä mhäte rä Zi Dada Jeoba ꞌne rä Hesu, ꞌne gä umbäbihu̱ mätsꞌu̱ de mä tiempohu̱ ha näꞌä rä zänä märso ꞌne abril, ma gä hänihu̱ ndunthi yä jäpi. Mä ndunthi yä zi jäꞌi de ha rä territorio, ma dä za gä umbäbihu̱ ntꞌo̱de. ꞌNehe, ma gä tsahu̱ näꞌä rä johya po̱ho̱ de gä pe̱phu̱ mä Zi Dadahu̱ Jeoba ꞌne de gä faxu̱ märꞌa yä jäꞌi (Hech. 20:35). Pe näꞌä mänꞌa xa mähyoni, mu̱ gä nxo̱nihu̱ ꞌne gä mpexkehu̱ gä uñhu̱ ntꞌo̱de, ¡ma gä johyabihu̱ rä koraso rä Zi Dada Jeoba ꞌne rä Hesu!