Rꞌa yä fenäte pa rä däta mhuntsꞌi

Te mä ora ma dä mu̱di ꞌne dä uadi. Näꞌä luga habu̱ ma dä tꞌo̱tꞌe rä däta mhuntsꞌi ma dä xogi nzu̱ngä 8:00 a.m. Nuꞌu̱ hñupa, ma dä tꞌe̱ntsꞌi nꞌa rä ꞌmida nzu̱ngä 9:20 a.m. Näꞌä oraꞌä, mähyoni ge gatꞌho gä hudihu̱ pa njabu̱ dä mu̱di rä däta mhuntsꞌi ngu ri ꞌñehe. Näꞌä mbehe ꞌne nsabdo rä programä ma dä uadi ngu nzu̱ngä 5:00 p.m., pe näꞌä ndomingo ma dä uadi ngu nzu̱ngä 4:00 p.m.

Ma gä nsundahu̱ Jeoba ko yä jähñä. Dende mäyaꞌmu̱, rä hnini Äjuä xä nsunda Jeoba ko yä jähñä. Mäpaya ꞌnehe di sigi di so̱kämbeni rä Zi Dada Jeoba ko yä jähñä (Sal. 28:7). Nuꞌu̱ hñupa, de di xudi ꞌne de di ndee änte dä mu̱di rä däta mhuntsꞌi, di tꞌe̱ntsꞌi nꞌa rä ꞌmida. Nuya yä ꞌmida di tꞌe̱ntsꞌi pa dä maxkägihu̱ gä hoki mä korasohu̱ pa gä xo̱kämbenihu̱ rä Zi Dada Jeoba ꞌne pa gä pädihu̱ de geꞌä. Hänge ora gä o̱dehu̱ dä mhää ge ya ma dä tꞌe̱ntsꞌi rä ꞌmida, mähyoni gä hudihu̱ pa gä o̱dehu̱ ꞌne ya hingä ñähu̱. Njabu̱, ma gä udihu̱ ge di jamädihu̱ po gatꞌho näꞌä pe̱fi nuꞌu̱ yä ku de rä orquesta de rä Watchtower pa hoki nuꞌu̱ yä ꞌmida. Nuyu̱ yä ku, jutꞌäse̱ yä pasaje ꞌne pa yo mꞌiki tatꞌä je̱ya ha Patterson (Nueva York), pa bi hoki nuꞌu̱ yä ꞌmida xa mähotho. Mꞌe̱fa de dä tꞌe̱ntsꞌi rꞌa de nuya yä ꞌmida, nubye̱ ko ngatꞌho mä korasohu̱ ma gä ntuhuhu̱ nꞌa rä jähñä pa rä Zi Dada Jeoba.

Estacionamiento. Mu̱ go yä ku nuꞌu̱ xä tsꞌokuäbi dä hyandi rä estacionamiento, nuꞌmu̱ hinte ma dä njutꞌi, ꞌne ngu xti zo̱ni nuꞌu̱ yä ku zi yä bo̱jä, ma dä sipäbi habu̱ dä za dä ꞌmaꞌmi. Rꞌabu̱ ha yä estacionamiento hingi ñꞌe̱ni ndunthi yä bo̱jä, hänge dä hogi ge yä ku dä ma nꞌatbu̱ ko märꞌaa. Ha rä estacionamiento ja rꞌa yä luga pa ho̱nse̱ nuꞌu̱ yä bo̱jä hñä nꞌa rä letrero o plaka de matricula pa nuꞌu̱ yä jäꞌi di hñeni.

Yä thuhni. Xti xogi näꞌä luga habu̱ ma dä nja rä däta mhuntsꞌi, hinxä ñho gä nextꞌihu̱ pa gä ꞌuekehu̱ yä thuhni ꞌñenä toꞌo di nte̱ꞌmehu̱. Ma gä udihu̱ rä tꞌekꞌei ꞌne rä ñhojäꞌi ko märꞌaa, mäske dä tokagihu̱ gä hudihu̱ ha nꞌa rä luga näꞌä hindi nehmähu̱. Mu̱ gä jahu̱ njabu̱, ma gä udihu̱ ge di pe̱päbihu̱ Jeoba, ꞌne ora dä hyandi märꞌa yä zi jäꞌi, ꞌnehe ma dä ne dä ꞌñeꞌspäbi rä nsu (Juan 13:34, 35; 1 Cor. 13:5; 1 Ped. 2:12). Ho̱nse̱ dä za gi ꞌueke yä thuhni pa nuꞌu̱ toꞌo gi ꞌmu̱hui ha ri nguu, nuꞌu̱ ri estudio o nuꞌu̱ toꞌo gi ñꞌoui mähye̱gi ha rä bo̱jä. Po rä mäte, ote gi hutsꞌi ha nuꞌu̱ yä thuhni hingä ma gi usa, pa njabu̱ yä ku dä za dä hñudi ha nuꞌu̱ yä thuhni. Hingä ndunthi nuꞌu̱ yä thuhni xä tꞌeke pa nuꞌu̱ yä zi däta jäꞌi o pa nuꞌu̱ di hñeni, hänge rꞌabu̱ hingä ma dä za dä hñudi kongeꞌu̱ gatꞌho rä familia. Po rä mäte, tsoogi nuꞌu̱ yä thuhni xä tꞌeke pa nuꞌu̱ yä zi ku ꞌne pa nuꞌu̱ toꞌo di su.

Ma gä jamäsu mä heehu̱. Nuꞌu̱ mä heehu̱ ma gä usahu̱ pa rä däta mhuntsꞌi pe̱ꞌtsi te dä ꞌñudi ge di pe̱päbihu̱ Äjuä, ꞌne ge hingä di ꞌmu̱ihu̱ ngu nunä xiꞌmhai (1 Tim. 2:9). ꞌNehe, durante rä däta mhuntsꞌi, ngu nuꞌmu̱ ma gä ku̱tꞌihu̱ ꞌne gä po̱nihu̱ de mä oxihu̱, mähyoni gä jamäsu ge gä ñheehu̱ xä ñho. Njabu̱, ko rä johya ma gä usa mä gafetꞌhu̱, ꞌne hingä ntsahu gä umbäbihu̱ ntꞌo̱de yä zi jäꞌi. Mu̱ gä ñheehu̱ ngu ri ꞌñehe ꞌne gä portahu̱ xä ñho ha näꞌä däta mhuntsꞌi regional xä ꞌñepu̱, hingä ho̱nse̱ ma dä japi yä zi jäꞌi dä ne dä bädi de Äjuä, ꞌnehe ma gä johyabihu̱ rä koraso rä Zi Dada Jeoba (Sof. 3:17).

Nuꞌmu̱ di usahu̱ rä celular o mä nꞌa rä bo̱jä. Ma gä udihu̱ rä tꞌekꞌei mu̱ hingä mfadahu̱ yä ku nuꞌmu̱ di usahu̱ rä celular, rä cámara, rä tablet, o mä nꞌa rä bo̱jä mbo de rä däta mhuntsꞌi. Dä hogi ge hingä ñähu̱ o gä pe̱hnihu̱ yä mensaje mu̱ hingä xa mähyoni, pa njabu̱ gä hopäbihu̱ yä ku dä yꞌo̱de ꞌne dä hyandi xä ñho rä programä.

Rä ñhuni. Po rä mäte, hñätsꞌi näꞌä ma gi tsi, pa njabu̱ hindä ja mꞌe̱di gi po̱ni de rä däta mhuntsꞌi ꞌne guä tai rä ñhuni. Beni ge mbo de rä däta mhuntsꞌi, hindä za gi ku̱tꞌi ko yä traste de gä bidrio o ko ndunthi yä ñhuni.

Yä donäsio. Dä za gä jamädihu̱ po gatꞌho näꞌä rä me̱fi xä tꞌo̱tꞌe pa gä pe̱ꞌtsihu̱ mä däta mhuntsꞌihu̱, po mäde de gä uni mä donäsiohu̱ pa njabu̱ dä sigi dä tꞌungä ntꞌo̱de ha gatꞌho rä Xiꞌmhai. Mu̱ gä unihu̱ nꞌa rä cheque, mähyoni gä huꞌspäbihu̱ rä thuhu rä «La Torre del Vigía, A.R.». Ha rꞌa yä däta mhuntsꞌi, dä za dä tꞌuni yä donäsio ko yä tarjeta de crédito o de débito.

Yä ꞌñethi. Mu̱ gi hñeni, beni gi hñätsꞌi ri ꞌñethi, ngeꞌä ha rä däta mhuntsꞌi hingi tꞌuni yä ꞌñethi. Mu̱ gä diabético ꞌne gi usa yä jeringa o yä yꞌofri, mähyoni gi ñꞌani habu̱ ri ꞌñehe gi yꞌe̱i, pa njabu̱ hingi thäntsꞌi ko gatꞌho nuꞌu̱ märꞌa yä paxi. Beni ge nuya yä jeringa xä ntsꞌuni.

Pa hindä thogi yä aksidente. Tatꞌä je̱ya ha yä däta mhuntsꞌi thogi yä aksidente. ꞌNe kasi nzäntho po nuꞌu̱ yä thiza xa xä ñhetsꞌi di hñä yä nju. Hänge pa hindä thogi nuya yä aksidente, mähyoni ge yä nju dä hñätsꞌi yä thiza hingä xa xä ñhetsꞌi, pa hindä mfeꞌtse o dä dagi, ꞌne njabu̱ dä za dä ñꞌo xä ñho ha rä däta mhuntsꞌi.

Pa nuꞌu̱ hingi o̱de xä ñho. Ha rꞌa yä däta mhuntsꞌi, rä programä ma drä thoꞌtsi po rä frecuencia modulada (FM). Hänge toꞌo ma dä yꞌo̱de rä programä po mäde de gehnä, ma dä ja mꞌe̱di di hñä nꞌa zi tꞌu̱kä radio de gä batería ꞌne yä audífono.

Yä carriola o yä thuhni pa yä tꞌu̱kä bätsi. Ha mbo rä däta mhuntsꞌi, hingi tsa dä thätsꞌi yä carriola o yä thuhni pa yä tꞌu̱kä bätsi, ho̱nse̱ nuꞌu̱ yä tꞌu̱kä silla xä thoki pa dä nthätꞌi ha nꞌa rä thuhni o asiento.

Yä perfume. Kasi gatꞌho yä däta mhuntsꞌi di tꞌo̱tꞌe ha nꞌa rä luga näꞌä jotꞌi. Hänge ma gä udihu̱ rä tꞌekꞌei mu̱ hingä nkotsꞌihu̱ nuꞌu̱ yä perfume xa yu̱ni ntsꞌe̱di. Ngeꞌä rꞌabu̱, ꞌmu̱pu̱ rꞌa yä zi ku nuꞌu̱ di hñeni ꞌne hingi tsa xä ñho nuꞌmu̱ pähä nuꞌu̱ yä perfume (1 Cor. 10:24).

Yä restauran. Mu̱ ma gi ku̱tꞌi ha nꞌa restauran, ma gi ꞌñeꞌspäbi rä nsu rä Zi Dada Jeoba mu̱ gi ꞌñudi rä ñhojäꞌi ꞌne rä tꞌekꞌei. Ri hee pe̱ꞌtsi te dä ꞌñudi ge gi pe̱päbi Äjuä. ꞌNe mu̱ njabu̱ di nzäi ha näꞌä restauran, tsoogi rä propina.

Yä hotel:

1. ꞌUeke ho̱nse̱ nuꞌu̱ yä kuarto ma gi usa. ꞌNehe, mähyoni ge hindä thogi rä ndunthi nuꞌu̱ yä jäꞌi dä ñꞌoxi ha nꞌa rä kuarto, ho̱nse̱ näꞌä bi tꞌuni nse̱ki.

2. Ogi cancela näꞌä kuarto gä ꞌueke, ho̱nse̱ nuꞌmu̱ xa mähyoni. Mu̱ ma gi cancela, mähyoni ge nguntꞌä gi xipäbi näꞌä jäꞌi di nkargo de rä hotel, pa njabu̱ mä nꞌa rä jäꞌi dä za dä usa näꞌä kuarto (Mat. 5:37). Mu̱ ma gi cancela, ogi pumfri gi yꞌofo näꞌä rä número de cancelación. Mu̱ hingi cancela änte de 48 yä ora, ya hindä jotsꞌäꞌi ri bojä.

3. Mu̱ ma gi usa nꞌa rä tarjeta de crédito o de débito pa gi jutꞌi nuꞌu̱ yä pa ma gi oxi ha rä hotel, beni ge kasi nzäntho, rä hotel tsämi nꞌa tu̱i de näꞌä rä bojä gi pe̱ꞌtsi ha ri tarjeta, pa ngu mu̱ te gi tehmi o te dä mꞌe̱di ha näꞌä kuarto ma gi oxi. Näꞌä ri bojä bi tsꞌämi, ma dä jotsꞌäꞌi asta xki po̱ni de näꞌä hotel o rꞌa yä pa mꞌe̱fa.

4. Ha rä hotel, rꞌabu̱ ja nꞌa zi bo̱jä pa gi theni ri ꞌme̱ni o ri maleta, usa nuꞌmu̱ gi handi ge dä za, ꞌne koꞌtsi nguntꞌä pa dä za dä usa märꞌa yä jäꞌi.

5. Mu̱ njabu̱ di nzäi ha näꞌä hotel habu̱ ma gi kohi, umbäbi rä propina nuꞌu̱ yä jäꞌi ma dä maxꞌäꞌi gi theni ri ꞌme̱ni o ri maleta, o nuꞌu̱ xu̱ki näꞌä kuarto habu̱ ma gi oxi.

6. Hyoki te gi tsi ho̱nse̱ ha nuꞌu̱ yä kuarto tꞌuni nse̱ki.

7. Mu̱ ha rä hotel tꞌuni rä café, rä hielo, o rä ñhuni de di xudi, ogi hätsꞌi pa ha rä däta mhuntsꞌi. Nuyu̱ yä ñhuni thoki ho̱nse̱ pa dä tsꞌi mbo ha rä hotel, hingä pa dä thätsꞌi.

8. ꞌÑudi rä ñhojäꞌi ꞌne rä tꞌekꞌei pa ko nuꞌu̱ yä zi jäꞌi di mpe̱fi ha rä hotel. Beni ge tso̱ni ndunthi yä jäꞌi pa oxi, ꞌne nuꞌu̱ di jamädi ndunthi nuꞌmu̱ di pe̱ꞌtsihu̱ rä pasensia ꞌne di udihu̱ rä ñhojäꞌi ꞌne rä tꞌekꞌei.

9. Ha rꞌa yä hotel, pe̱ꞌtsi yä elevador, yä alberca, yä gimnasio ꞌne märꞌa yä tꞌo̱tꞌe. Hänge ri ꞌñehe ge yä dada dä jamäsu yä zi bätsi durante nuꞌu̱ yä pa ma dä gohi ha rä hotel.

10. Ha näꞌä Lista de hoteles recomendados hutsꞌi ho̱nse̱ hängu ma dä njutꞌi po nꞌatho rä pa, hänge xki jutꞌi ma gi uni ma nꞌa zi tu̱i rä bojä po rä impuesto. Pe mu̱ ma dä tꞌadi mä ndunthi rä bojä, ogi jutꞌi. Mänꞌa xä ñho gi nzofo nguntꞌä ꞌne xipäbi nuꞌu̱ yä ku de rä Departamento de Alojamiento de näꞌä däta mhuntsꞌi.

11. Mu̱ durante nuꞌu̱ yä pa de rä däta mhuntsꞌi, dä nja nꞌa rä xuñha ko näꞌä ri kuarto de rä hotel habu̱ gi oxi, xipäbi nuꞌu̱ yä ku de rä Departamento de Alojamiento pa dä hyandi hanja dä za dä maxꞌäꞌi.

Toꞌo ne dä mfaxte. Gatꞌho toꞌo dä ne dä mfaxte, dä za dä ma ha rä Departamento de Servicio Voluntario. Mu̱ nꞌa bäsjäꞌi ne dä mfaxte pe tobe hingi pe̱ꞌtsitho 16 nje̱ya, dä hogi ge dä ñꞌoui rä dada, rä nänä, o mä nꞌa rä ku näꞌä xä tsꞌokuäbi dä su o dä hyandi näꞌä bäsjäꞌi.