Nuya yä mhända pe̱ꞌtsi te dä mꞌu̱i ha ri koraso

Yä mayꞌo di su yä zi de̱ti pa hindä mꞌe̱di ꞌne di ñäni de yä zate. Njabu̱ ꞌnehe, yä dada pe̱ꞌtsi te dä su yä bätsi pa hindä mꞌe̱di o dä ꞌuengi de rä ꞌñuu Äjuä. (Prov. 27:23). ¿Hanja dä za dä kumpli yä dada näꞌä ꞌme̱fi pe̱ꞌtsi ngu yä mayꞌo? Nzäntho pe̱ꞌtsi te dä ꞌueke de yä tiempo pa dä ñäui yä bätsi, ꞌne njabu̱ dä bädi te ja ha yä mfeni ꞌne ha yä koraso (Prov. 20:5). Toꞌo hoki nꞌa rä nguu, pe̱ꞌtsi te dä hyoki ko yä medo pa xti nthe̱ui rä tsibi hindä zätꞌi. Njabu̱ ꞌnehe, yä dada pe̱ꞌtsi te dä usa nuꞌu̱ yä mfatsꞌi xa tse̱di ngu yä medo, pa dä za dä matsꞌi yä bätsi dä ze̱di yä jamfri (1 Cor. 3:10-15). Rä bideo Estas palabras tienen que estar en tu corazón udi por hanja xa mähyoni gä pe̱ꞌtsihu̱ rä Mhuntsꞌi de gä Familia tatꞌä semänä. Hyandi nunä bideo ko ri familia. Xti uadi, mäñhu̱ te gä pädihu̱, ꞌnepu̱ thädihu̱ nuya yä ntꞌani huxkua.

1) ¿Por hanja rä familia rä ku Tomás ya xki käni rä mhäte po Äjuä? 2) ¿Por hanja rä ku Tomás himbi za bi me̱ꞌtsi rä Mhuntsꞌi de gä Familia? 3) ¿Te mää rä Mäkä Tꞌofo ge mähyoni dä me̱fi yä dada pa dä tede yä bätsi ha rä ꞌñuu Äjuä? (Deut. 6:6, 7.) 4) ¿Te dä za dä matsꞌi yä familia pa dä me̱ꞌtsi nꞌa rä hogä ntsitsꞌi? 5) ¿Te mä sacrificio mähyoni dä yꞌo̱tꞌe yä dada po yä bätsi? 6) ¿Te bi me̱fi rä medinthäti Vargas, pa bi matsꞌi rä ku Tomás ꞌne rä familia? (Prov. 27:17.) 7) ¿Te mähyoni dä me̱fi rä dada dende änte pa njabu̱ dä bo̱ni xä ñho rä Mhuntsꞌi de gä Familia? 8) ¿Te bi me̱fi rä ku Tomás pa njabu̱ bi mu̱di bi matsꞌi rä familia? (Efes. 6:4.) 9) ¿Por hanja xa mähyoni hindä mꞌe̱di rä Mhuntsꞌi de gä Familia? 10) ¿Te dä za dä tꞌo̱tꞌe ha nꞌa rä Mhuntsꞌi de gä Familia? 11) Nuꞌmu̱ rä ku Tomás bi ñäui näꞌä rä tꞌu̱ mädä pa bi xipi ge pe̱ꞌtsi te dä me̱fi näꞌä xä ñho, ¿por ha nja bi hogi himbi nzofo de gä kue̱? (Jer. 17:9.) 12) ¿Te bi me̱fi rä ku Tomás ꞌne Mónica pa bi matsꞌi rä tꞌixu bi hye̱pu̱ näꞌä tsꞌu̱ntꞌu̱ mi ntsixhui? (Mar. 12:30; 2 Tim. 2:22.) 13) Nuꞌmu̱ rä ku Tomás ꞌne Mónica bi ja rꞌa yä mpadi ha yä mꞌu̱i, ¿hanja bi ꞌñudi ge bi me̱ꞌspäbi rä jamfri rä Zi Dada Jeoba? (Mat. 6:33.) 14) ¿Hanja nunä bideo bembäbi gatꞌho yä dada ge xa mähyoni dä matsꞌi yä familia dä ñꞌo ha rä ꞌñuu Äjuä? (1 Tim. 5:8.) 15) Dada, ¿xibye̱ te gi mbeni gi pe̱fi?

PA YÄ DADA: Nuꞌmu̱ gä handi nunä drama ha rä däta mhuntsꞌi de rä 2011, ¿gä da ngue̱nda ge mi ja mꞌe̱di gi jamäsu ri Mhuntsꞌi de gä Familia? ¿Geꞌä xkä pe̱fi asta nubye̱? Mu̱ tobe di ja mꞌe̱di rꞌa yä mpadi, po rä mäte, xatuäbi rä Zi Dada Jeoba ꞌne pe̱fi gatꞌho näꞌä mähyoni pa gi fatsꞌi ri familia dä ñäni yä te (Efes. 5:15-17).