MÄ MꞌU̱IHU̱ NGU YÄ KRISTIANU
Nꞌa rä rꞌayꞌo mfatsꞌi pa gä fu̱di gä umbäbihu̱ ntꞌo̱de yä jäꞌi
Dende rä enero de rä 2016, näꞌä rebista La Atalaya xä thoki pa gä uñhu̱ ntꞌo̱de, ha rä nxii 16, nzäntho ma dä ehe nꞌa sección habu̱ enä: «¿Qué dice la Biblia?». Nunä sección xä thoki pa dä maxkägihu̱ gä fu̱di gä ñähu̱ ko yä jäꞌi. Ri hñätsꞌi nꞌa tu̱i yä tratado: xä tꞌofo nꞌa rä ntꞌani pa dä tꞌambäbi yä jäꞌi te di mbeni de geꞌä. ꞌNepu̱ udi te mää rä Mäkä Tꞌofo de näꞌä ntꞌaniꞌä. Mꞌe̱fa hutsꞌi märꞌa yä punto ꞌne märꞌa yä testo de rä Mäkä Tꞌofo de näꞌä temaꞌä.
Mu̱ di huahnihu̱ xä ñho näꞌä di xipäbihu̱ yä jäꞌi nuꞌmu̱ di ñähu̱ kongeꞌu̱, asta dä za dä hñäni nꞌa rä estudio. Hänge nunä sección xä thoki pa dä za gä faxu̱ nuꞌu̱ yä zi jäꞌi tsu̱di rä thuhu ꞌne rä nduthe de rä Noya Äjuä (Mt 5:6).
HANJA GI USA NUNÄ SECCIÓN:
Yꞌambäbi nꞌa de nuꞌu̱ yä ntꞌani huxpu̱ ꞌne to̱ꞌmi dä mää te di mbeni näꞌä jäꞌi.
Yꞌo̱de ꞌne jamädibi ngeꞌä bi xiꞌi te di mbeni.
Hñeti näꞌä testo hutsꞌi habu̱ enä «Lo que dice la Biblia» ꞌne yꞌambäbi te di mbeni. Mu̱ näꞌä jäꞌi hingi xo̱ni, usa nꞌa de nuꞌu̱ yä punto ehe habu̱ enä: «¿Qué más dice la Biblia?».
Ofresebi rä rebista.
Kohi gi pengi mä nꞌa rä pa, pa gi ꞌñuti näꞌä mänꞌa rä ntꞌani huxpu̱.