YÄ TESORO DE RÄ NOYA ÄJUÄ | MATEO 20, 21
«Mu̱ nꞌa de geꞌähu̱ gi nehu̱ gi ndängihu̱, mähyoni gi mꞌe̱gohu̱»
20:28
Yä escriba ꞌne yä fariseo xa mi yä ndä ꞌñexmänsu. Ora mi yꞌo ha yä tai o ha yä ꞌñuu, mi ne ge gatꞌho yä jäꞌi dä hyandi ꞌne dä ze̱njua.
Nuꞌu̱ yä escriba ꞌne yä fariseo xa mi ho dä ꞌñexä yä nsu ante märꞌaa ꞌne xa mi honi yä däta nsu (Mt 23:5-7). Pe rä Hesu himi njabu̱. «Rä Tꞌu̱ rä mexiꞌmhai, himbä ehe pa drä ꞌme̱päbiꞌä, sino pa dä me̱päbi märꞌaa.» (Mt 20:28.) Xi nuju̱, ¿di o̱tꞌehu̱ ntsꞌe̱di po gä kumplihu̱ ho̱nse̱ ko nuꞌu̱ yä privilegio di mbenihu̱ ge mänꞌa eskägihu̱ mä nsuhu̱? Pa dä numäñhogihu̱ rä Zi Dada Jeoba, mähyoni gä de̱nihu̱ rä ejemplo rä Hesu ꞌne gä o̱tꞌehu̱ ntsꞌe̱di po gä fatsꞌihu̱ märꞌaa, mäske ndunthi yä mꞌiki ho̱nse̱ rä Zi Dada Jeoba handi näꞌä di pe̱fihu̱ ha rä hnini (Mt 6:1-4). ¿Te mä ꞌme̱fi di ja nꞌa rä jäꞌi näꞌä rä umilde?
Xu̱ki ꞌne di umbäbi rä mantenimiento rä Ngu de gä Mhuntsꞌi.
Fatsꞌi nuꞌu̱ yä zi däta jäꞌi ꞌne märꞌaa.
Uni yä donäsio.