Jeoba xa di mädi nuꞌu̱ yä jäꞌi xä ntꞌaxi yä mꞌu̱i

Ndunthi yä dada embäbi yä bätsi dä xu̱ki yä yꞌe̱, dä xu̱ki yä kuarto, dä mpaxi o dä ñhi. ¿Por hanja? Ngeꞌä yä dada ne dä hyandi yä bätsi xträ ntꞌaxi. ¿Pe gi pädi de habu̱ bi ehe rä ntꞌaxi? De rä Zi Dada Jeoba (Éx 30:18-20; Dt 23:14; 2Co 7:1). Ora di ñhihu̱, di peni mä dutuhu̱, di nsundahu̱ rä Zi Dada Jeoba (1Pe 1:14-16). Pe, ¿ꞌnehe di pe̱ꞌtsihu̱ mä nguhu̱ xä ntꞌaxi? Ndunthi yä jäꞌi xä nzäi dä fo̱te yä paxi ha yä ꞌñuu, ha yä jardin o ha yä parke. Pe nuju̱ di o̱tꞌehu̱ ntsꞌe̱di po gä pe̱ꞌtsihu̱ xä ntꞌaxi mä nguhu̱, ngeꞌä di nehu̱ gä eꞌspäbihu̱ rä nsu rä Zi Dada Jeoba (Sl 115:16; Ap 11:18). ¿Te di pe̱fihu̱ ko nuꞌu̱ yä paxi po̱ni ora di taihu̱ yä dulse, yä tsꞌapo o yä refresco? ¡Gatꞌho näꞌä di pe̱fihu̱ ha mä mꞌu̱ihu̱, di nehu̱ dä nheki ge di pe̱päbihu̱ rä Zi Dada Jeoba! (2Co 6:3, 4).

HYANDIHU̱ RÄ BIDEO JEOBA XA DI MÄDI NUꞌU̱ YÄ JÄꞌI XÄ NTꞌAXI YÄ MꞌU̱I. MꞌE̱FA THÄDIHU̱ NUYA YÄ NTꞌANI:

• ¿Te mä pretesto huxä rꞌa yä jäꞌi pa hindä me̱ꞌtsi yä kosa xä ntꞌaxi?

• ¿Hanja faxkägihu̱ nuꞌu̱ yä Ley bi tꞌumbäbi Moisés pa gä pädihu̱ te di mbeni Jeoba de rä ntꞌaxi?

• ¿Hanja dä za gä eꞌspäbihu̱ rä nsu rä Zi Dada Jeoba mäske hinte gä mäñhu̱?