Jamäsu ri medinthäti

Pa rä Zi Dada Jeoba, hingä nꞌa rä ntꞌeni näꞌä promesa bi ja tanto nꞌa rä däme ngu rä ꞌme̱hñä ora bi nthäti. Jeoba di mändabi ge hindä ñhe̱gi (Mt 19:5, 6). Ha rä hnini rä Zi Dada Jeoba ꞌmu̱i ndunthi yä medinthäti nuꞌu̱ ꞌmu̱i ko rä johya. Pe mäpaya, gatꞌho yä medinthäti rꞌabu̱ pe̱ꞌtsi yä xuñha. Pe dä ñhe̱gi o dä diborsia yä medinthäti, hingä geꞌä rä ꞌñuu debe dä gu̱u̱ ora di ñhandui yä xuñha. ¿Hanja dä za tanto rä däme ngu rä ꞌme̱hñä dä su rä medinthäti?

Ma gä handihu̱ 5 yä konseho.

1. Jamäsu ri koraso ꞌne ogi koketea ko märꞌa yä jäꞌi. Ogi handi yä programä o yä pelikula habu̱ ehe yä tsꞌu̱di jäꞌi. Ngeꞌä nuya yä tsꞌo tꞌo̱tꞌe di tsꞌoni yä medinthäti (Mt 5:28; 2Pe 2:14).

2. Japi dä ze̱di ri ntsitsꞌi ko rä Zi Dada Jeoba ꞌne yꞌo̱tꞌe ntsꞌe̱di po gi pe̱fi ha ri medinthäti nuꞌu̱ yä tsꞌofo uni (Sl 97:10).

3. Sigi gi ꞌñudi näꞌä rä mꞌu̱i di ho Äjuä. Tanto ko näꞌä gi mää ngu ko näꞌä gi pe̱fi, ꞌñudi ge gi mädi näꞌä jäꞌi xkä nthätui, pa njabu̱ hindä japi xä ñhei dä mꞌu̱i kongeꞌi (Col 3:8-10, 12-14).

4. Nzäntho hyonihu̱ rä modo hanja dä za gi ñähu̱ de näꞌä gi mbenihu̱ ꞌne de näꞌä gi sentihu̱, pe ñähu̱ ko rä tꞌekꞌei (Col 4:6).

5. ꞌÑudi rä mhäte ꞌne rä tꞌekꞌei ora gi ꞌme̱ngui ri ꞌme̱hñä o ri däme (1Co 7:3, 4; 10:24).

Mu̱ nꞌa rä däme ꞌne nꞌa rä ꞌme̱hñä pe̱ꞌspäbi rä tꞌekꞌei rä medinthäti, signifika ge pe̱ꞌspäbi rä tꞌekꞌei rä Zi Dada Jeoba, ngeꞌä go geꞌä bi hyoki rä medinthäti.

HYANDIHU̱ RÄ BIDEO PE̱ꞌTSI TE GÄ TSE̱TIHU̱ NUNÄ RÄ NHEXTꞌI: MA GÄ JAMÄSUHU̱ NUꞌU̱ YÄ REGLA XÄ THUTSꞌI HA RÄ NHEXTꞌI. MꞌE̱FA THÄDIHU̱ NUYA YÄ NTꞌANI:

• 

  Mäske nꞌa rä medinthäti bi mu̱di xä ñho, ¿te mä xuñha dä za dä ꞌñepäbi mꞌe̱fa?

• 

  ¿Hanja dä za dä matsꞌi nuꞌu̱ yä konseho uni rä Zi Dada Jeoba nuꞌu̱ senti ge otho rä mhäte ha yä medinthäti?

• 

  ¿Te di mändabi rä Zi Dada Jeoba nuꞌu̱ yä medinthäti?

• ¿Te debe dä me̱fi tanto rä däme ngu rä ꞌme̱hñä pa njabu̱ dä nja rä johya ha rä medinthäti?