Desidi gi pe̱päbi rä Zi Dada Jeoba

¿Ya gi nxadi rä Mäkä Tꞌofo o ya grä publikador pe tobe hixkä nxixtehe? ¿Ya xkä beni gi nxixtehe? ¿Por hanja mähyoni gi nxixtehe? Ora nꞌa rä jäꞌi desidi dä ja nꞌa rä sadi pa dä xipäbi Jeoba ge umbäbi rä te, ꞌnepu̱ di nxixtehe, geꞌmu̱ fu̱di dä me̱ꞌtsi nꞌa rä hogä ntsitsꞌi ko rä Zi Dada Jeoba (Sl 91:1). ꞌNehe geꞌä ma dä matsꞌi dä me̱ꞌtsi nꞌa rä te pa nzäntho (1Pe 3:21). ¿Te debe gi pe̱fi pa dä za gi umbäbi ri te rä Zi Dada Jeoba ꞌne gi nxixtehe?

Kamfri ge xkä tini näꞌä xa mäjuäni rä ꞌñuu Äjuä. Mu̱ gi pe̱ꞌtsi yä duda, hyoni rä imformäsio (Ro 12:2). ¿Ja mꞌe̱di gi paati ri mꞌu̱i? Mu̱ hää, paati ri mꞌu̱i po näꞌä rä mhäte gi pe̱ꞌspäbi rä Zi Dada Jeoba (Pr 27:11; Ef 4:23, 24). Xatuäbi nzäntho rä Zi Dada Jeoba ꞌne yꞌapäbi rä mfatsꞌi. Mu̱ gi jabu̱ näꞌä ma dä rꞌaꞌäꞌi rä espiritu santo (1Pe 5:10, 11). Pe̱fi gatꞌho näꞌä di ja mꞌe̱di pa dä za gi nxixtehe, ngeꞌä otho mä nꞌa rä mꞌu̱i mänꞌa mähotho ke gä pe̱päbihu̱ rä Zi Dada Jeoba (Sl 16:11).

HYANDIHU̱ RÄ BIDEO NÄꞌÄ RÄ ꞌÑUU MA DÄ ZIXꞌÄꞌI PA GI NXIXTEHE. MꞌE̱FA THÄDIHU̱ NUYA YÄ NTꞌANI:

¿Te mä xuñha xä däpäbi rꞌa yä ku pa xä za xä nxixtehe?
¿Te ma dä maxꞌäꞌi pa dä te ri komfiansa po rä Zi Dada Jeoba ꞌne geꞌä dä jaꞌäꞌi gi umbäbi ri te ꞌne gi nxixtehe?
¿Te bi matsꞌi rꞌa yä ku pa bi zo̱ho̱ bi nxixtehe?
¿Hanja jäpi rä Zi Dada Jeoba nuꞌu̱ toꞌo desidi dä me̱päbi?
¿Te signifika gi umbäbi ri te Äjuä? ¿Te signifika gi nxixtehe?

Ora ya ma dä uadi näꞌä discurso de gä nxixtehe, rä ku ma dä yꞌapäbi dä mꞌai gatꞌho nuꞌu̱ ma dä nxixtehe pa dä dädi nuya yoho yä ntꞌani:

¿Ya xkä arrepenti de nuꞌu̱ ri pekado ꞌne xkä ja nꞌa rä sadi habu̱ gä xipäbi rä Zi Dada Jeoba ge gi umbäbi ri te pa gi pe̱päbi, ꞌne gi kamfri ge ma dä ñängägihu̱ po mädee de rä Hesu?

¿Ya gi pädi ge nu xki nxixtehe nubye̱ ma dä fäꞌäꞌi ge grä testigo rä Jeoba ꞌne ya gi pertenese ha rä organización rä Zi Dada Jeoba?

Mu̱ nuꞌu̱ ma dä nxixtehe dä ꞌñenä «hää», nuꞌmu̱ udi ante gatꞌho yä jäꞌi ge di rekonose hängu rä muui pe̱ꞌtsi näꞌä rä te bi uni rä Hesu po gekhu̱, ꞌne udi ge dende näꞌä oraꞌä ma dä mꞌu̱i pa dä me̱päbi rä bolunta rä Zi Dada Jeoba (Ro 10:9, 10).