MÄ MꞌU̱IHU̱ NGU YÄ KRISTIANU
Yä anciano di mpe̱fi ndunthi po rä hnini Jeoba
Ndunthi hingi numäñho nuꞌu̱ yä jäꞌi pe̱ꞌtsi rä autorida. ¿Por hanja? Ngeꞌä ndunthi de nuꞌu̱ pe̱ꞌtsi rä autorida pe̱fi näꞌä go ne ꞌne honse̱ yä ñho. Geꞌä xä nheki dende mäyaꞌmu̱ ꞌne asta mäpaya (Miq 7:3). Pe hingi thogi njabu̱ ha rä hnini Äjuä. Rä Zi Dada Jeoba xä ꞌñuti yä anciano hanja dä usa näꞌä rä autorida pa dä hyombäbi rä ñho yä ku de rä mhuntsꞌi (Est 10:3; Mt 20:25, 26).
Yä anciano de rä mhuntsꞌi nuꞌu̱ hingi nja ngu nuꞌu̱ yä jäꞌi de nunä tsꞌo xiꞌmhai habu̱ honse̱ yä ñho. Nuꞌu̱ xa di mpe̱fi ndunthi po näꞌä rä mhäte pe̱ꞌspäbi rä Zi Dada Jeoba ꞌne yä ku (Jn 21:16; 1Pe 5:1-3). Yä anciano nzäntho o̱tꞌe ntsꞌe̱di po dä de̱ni näꞌä rä gia uni rä Hesu; fatsꞌi gatꞌho yä publicador pa dä ze̱di yä ntsitsꞌi ko Äjuä ꞌne dä ꞌmu̱i ko rä johya ha rä familia rä Zi Dada Jeoba. Ora ja nꞌa rä tsꞌo thogi o nꞌa rä ku nse̱kitho dä hñeni o dä me̱ꞌtsi nꞌa rä aksidente ꞌne pe̱ꞌtsi te dä tsꞌixä ha rä mediko, yä anciano ya xä ñhoki pa dä uni rä mfatsꞌi. Hänge mu̱ gi honi rä mfatsꞌi, nguntꞌä ñäui nꞌa rä anciano de ri mhuntsꞌi (Snt 5:14).
HYANDIHU̱ RÄ BIDEO YÄ ANCIANO SU YÄ KU DE RÄ MHUNTSꞌI. MꞌE̱FA THÄDIHU̱ NUYA YÄ NTꞌANI:
¿Te mä mfatsꞌi bi hñäni rä nju Mariana ꞌne hanja bi senti?
¿Te mä mfatsꞌi bi hñäni rä ku Elías ꞌne hanja bi senti?
¿Te gi mbenibye̱ de näꞌä rä ꞌme̱fi xä tꞌumbäbi yä anciano?