Sigi gi tede ri mhäte

1. ¿Gi beni te mä ntꞌudi gä pädi ora gä fu̱di gä nxadi rä Mäkä Tꞌofo?

¿GI BENI nuꞌmu̱ gä fu̱di gä nxadi rä Mäkä Tꞌofo? Zäi ge xa gä johya ora gä pädi ge Äjuä ja nꞌa rä thuhu. ꞋNehe, zäi ge asta bi haxämhaiꞌi ora gä pädi ge Äjuä hingi kastiga yä jäꞌi ha nꞌa rä infierno o ha nꞌa rä nidu. Pe hingä ho̱nse̱ꞌä, ¿gi beni te gä senti ora gä handi ge rä Mäkä Tꞌofo udi ge nuꞌu̱ xä du, ma dä nuhu mänꞌaki pa dä ꞌmu̱i nuua ha rä Xiꞌmhai ha nꞌa rä Paraiso?

2. ¿Gi beni hanja gä fu̱di gä bansa ha rä ꞌñuu rä Zi Dada Jeoba? (Efesios 5:1, 2).

² Entremäs ngi nxadi rä Mäkä Tꞌofo, ri mhäte po rä Zi Dada Jeoba mänꞌa bi te. Näꞌä rä mhäteꞌä geꞌä bi jaꞌi gä pe̱fi ha ri mꞌu̱i näꞌä mi tꞌutꞌäꞌi de rä Mäkä Tꞌofo. ꞋNehe gä fu̱di gä o̱tꞌe ngue̱nda nuꞌu̱ yä konseho uni rä Mäkä Tꞌofo ora ngi tomä nꞌa rä desision. Pe hingä ho̱nse̱ꞌä, ko rä mfatsꞌi rä Mäkä Tꞌofo gä paatä ri mfeni ꞌne ri mꞌu̱i pa gä johyabi rä koraso rä Zi Dada Jeoba. Ja ngu nꞌa rä zi tꞌu̱kä bätsi näꞌä de̱mbäbi rä mꞌu̱i rä dada, geꞌä gä pe̱fi ora gä fu̱di gä de̱mbäbi rä mꞌu̱i rä Zi Dada Jeoba (hñeti Efesios 5:1, 2).

3. ¿Te mä ntꞌani dä hogi gä thädihu̱?

³ Dä hogi gä ñꞌanise̱hu̱: «¿Mänꞌa di mädibye̱ rä Zi Dada Jeoba ke nuꞌmu̱ dä nxixtehe? ¿Näꞌä di mbeni ꞌne näꞌä di pe̱fi mänꞌa ri hñätsꞌi näꞌä rä mfeni ꞌne näꞌä rä mꞌu̱i rä Zi Dada Jeoba? ¿Di handi ꞌne di mädi yä ku ja ngu di ja rä Zi Dada Jeoba?». Mu̱ gi da ngue̱nda ge xä käni näꞌä rä mhäte gi senti po rä Zi Dada Jeoba ꞌne po yä ku, ogi desanimä. Rꞌa de nuꞌu̱ yä mu̱di kristianu bi thogi njabu̱ ꞌnehe. Pe rä Hesu himbi mbeni ge nuꞌu̱ yä kristianuꞌu̱ ya hingä ma xä paatä yä mfeni (Apoc. 2:4, 7). Njabu̱ ꞌnehe mäpaya, ora rä Hesu handi ge xä käni mä mhätehu̱, näꞌä di nupkä mä mfenihu̱ ꞌne pe̱skägihu̱ rä komfiansa ge ma gä o̱tꞌehu̱ ntsꞌe̱di po gä sigihu̱ gä tedehu̱ näꞌä rä mhäteꞌä.

4. ¿Te ma gä pädihu̱?

⁴ Ma gä pädihu̱ te dä za gä pe̱fihu̱ pa gä sigihu̱ gä tedehu̱ mä mhätehu̱ po rä Zi Dada Jeoba ꞌne po märꞌaa. ꞋNepu̱, ma gä handihu̱ te mä jäpi dä za gä pe̱ꞌtsihu̱, tanto nuju̱ ngu märꞌaa ora di tedehu̱ mä mhätehu̱.

SIGI GI TEDE RI MHÄTE PO RÄ ZI DADA JEOBA

5, 6. ¿Te mä xuñha bi ñhandui rä apostol Pablo ꞌne te bi matsꞌi pa bi sigi bi me̱päbi rä Zi Dada Jeoba?

⁵ Rä apostol Pablo xa mi johya mi pe̱päbi rä Zi Dada Jeoba, pe ꞌnehe bi ñhandui ndunthi yä xuñha. Näꞌä bi ꞌñenä: «Xtä yꞌo ndunthi, xtä rꞌaxä ha yä däthe xä ntsꞌuni. Xtä kꞌotꞌi de yä yꞌe̱ yä dakäte, ꞌne xtä kꞌotꞌi de ha yä yꞌe̱ mä mikꞌeiꞌme […]. Xtä thogi yä tsꞌo thogi ha yä hnini ꞌne ha yä mbonthi» (2 Cor. 11:23-27). Pe hingä ho̱nse̱ bi thogi yä ntꞌu̱tsate de nuꞌu̱ yä nkontra. Mäske rä apostol Pablo mi o̱tꞌe ntsꞌe̱di po dä matsꞌi yä kristianu de näꞌä tiempoꞌä, rꞌa de geꞌu̱ himi balora nixi mi jamädi näꞌä mi pe̱fiꞌä (2 Cor. 10:10; Filip. 4:15).

⁶ ¿Te bi matsꞌi rä apostol Pablo pa bi sigi bi me̱päbi rä Zi Dada Jeoba mäske mi thogi yä xuñha? Näꞌä mi pädi xä ñho tenguꞌä rä mꞌu̱i rä Zi Dada Jeoba ꞌne xki hyandi hanja xki matsꞌi ora xki ñhandui yä xuñha. Näꞌä himi pe̱ꞌtsi yä duda ge rä Zi Dada Jeoba xa mi mädi (Rom. 8:38, 39; Efes. 2:4, 5). Hänge rä apostol Pablo ꞌnehe xa bi mädi rä Zi Dada Jeoba ꞌne bi me̱päbi mäske mi thogi ndunthi yä xuñha. Näꞌä mi pädi xä ñho ge rä Zi Dada Jeoba nunka ma xä pumfri gatꞌho näꞌä mi pe̱fiꞌä po dä me̱päbi ꞌne po dä matsꞌi yä ku (Heb. 6:10).

7. ¿Te ma dä maxkägihu̱ pa dä za gä tedehu̱ mä mhätehu̱ po rä Zi Dada Jeoba?

⁷ Dä za gä japäbihu̱ dä te näꞌä rä mhäte di sentihu̱ po rä Zi Dada Jeoba mu̱ di nxadihu̱ njatꞌä rä Mäkä Tꞌofo. Hänge ora gi nxadi rä Mäkä Tꞌofo, hñudi gi ntso̱ꞌmi ꞌne hyandi te utꞌäꞌi de rä Zi Dada Jeoba näꞌä gi heti. Dä hogi gi ñꞌanise̱: «¿Hanja nunä di heti ha rä Mäkä Tꞌofo udi ge di mäkägi rä Zi Dada Jeoba? Xi nunä di heti, ¿te mä raso rꞌakägi pa gä mädi rä Zi Dada Jeoba?».

8. ¿Hanja dä za dä maxkägihu̱ rä sadi pa gä tedehu̱ näꞌä rä mhäte di sentihu̱ po Äjuä?

⁸ ꞌNehe ma dä za gä tedehu̱ näꞌä rä mhäte di sentihu̱ po rä Zi Dada Jeoba, mu̱ njatꞌä di xatuäbihu̱ ꞌne di xipäbihu̱ gatꞌho näꞌä di sentihu̱ (Sal. 25:4, 5). Mu̱ gä pe̱fihu̱ njabu̱, rä Zi Dada Jeoba ma dä yꞌo̱de mä sadihu̱ ꞌne ma dä maxkägihu̱ (1 Juan 3:21, 22). Nꞌa rä zi nju de rä dähni Asia rä thuhu Kaylab enä: «Ri mu̱di nuga ndi mädi rä Zi Dada Jeoba po näꞌä mi utkägi rä Mäkä Tꞌofo de Geꞌä. Pe näꞌä rä mhäteꞌä xä sigi xä te ora di handi hanja thädi mä sadi, ꞌne geꞌä xä jakägi gä pe̱fi nuꞌu̱ yä tꞌo̱tꞌe di hoꞌä».

SIGI GI TEDE NÄꞌÄ RÄ MHÄTE GI SENTI PO MÄRꞌAA

9. ¿Hanja bi ꞌñudi rä mhäte Timoteo po märꞌa yä kristianu?

⁹ Mi thogi rꞌa yä je̱ya de nuꞌmu̱ xki dini näꞌä xa mäjuäni rä ꞌñuu Äjuä, rä apostol Pablo bi konose nꞌa rä bäsjäꞌi mrä thuhu Timoteo. Nuni bäsjäꞌi xa mi mädi rä Zi Dada Jeoba ꞌne mi mädi yä jäꞌi. Hänge rä apostol Pablo bi ñä xä ñho de Timoteo ꞌne bi ꞌñenä: «Joꞌo mä nꞌa toꞌo gä pe̱sꞌme nꞌadä rä mfeni, ꞌne mäjuäni xa mäꞌähu̱» (Filip. 2:20, RN). Mäske Timoteo xa mi pe̱ꞌtsi ndunthi rä mfädi ꞌne xa mi pädi dä ꞌñudi xä ñho rä Noya Äjuä, pe rä apostol Pablo ꞌne märꞌa yä kristianu go mänꞌa bi balora näꞌä mhäte mi udi po märꞌa yä ku. Ora yä mhuntsꞌi mi o̱de ge ma dä zo̱ni Timoteo, zäi ge nuꞌu̱ ya xtä du dä zo̱ho̱ näꞌä rä paꞌä (1 Cor. 4:17).

10. ¿Te bi me̱fi Anna ꞌne rä däme pa bi ꞌñudi ge mi mädi gatꞌho yä ku?

¹⁰ Mäpaya, kada nꞌa de gekhu̱ ꞌnehe di honihu̱ hanja gä fatsꞌihu̱ mä kuhu̱ (Heb. 13:16). ¿Gi beni Anna ꞌne rä däme, nuꞌu̱ yä misionero dä no̱nihu̱ ha Rä ntꞌudi pa gä nxadihu̱ 29? Nꞌa rä pa nuꞌmu̱ bi thogi nꞌa rä däta bu̱nthi yꞌee, Anna ꞌne rä däme bi ma bä nuu nꞌa rä familia pa bi hyandi te mi jatho. Nunä medinthäti bi hyandi ge rä techo de rä nguu nunä familia xki dagi ꞌne xki mobo gatꞌho yä dutu. Rä nju Anna enä: «Dä muntsꞌuäbihe yä dutu, dä penihe ꞌne dä planchabihe. Hingä ndunthi näꞌä dä pe̱fihe, pe nuꞌu̱ yä ku nunka xä pumfri ꞌne po geꞌä nubye̱ di pe̱ꞌtsihe nꞌa rä hogä amista kongeꞌu̱». Hää, Anna ꞌne rä däme bi ꞌñudi ndunthi rä mhäte po nuꞌu̱ yä zi ku mi thogi nuꞌu̱ yä xuñhaꞌu̱ (1 Juan 3:17, 18).

11. a) ¿Te di senti märꞌa ora di umbäbihu̱ rä mhäte? b) ¿Hanja handi rä Zi Dada Jeoba ora di udihu̱ rä mhäte po märꞌaa? (Proverbios 19:17).

¹¹ Ora dyä hojäꞌihu̱ ꞌne di mädihu̱ märꞌaa, di de̱mbäbihu̱ rä mfeni ꞌne rä mꞌu̱i rä Zi Dada Jeoba. Ndunthi yä mꞌiki nixi di imäjinähu̱ hängu di nupäbi yä mfeni ora di udihu̱ rä mhäte po geꞌu̱. Kayla näꞌä rä zi nju ya dä no̱nihu̱ beni näꞌä rä mfatsꞌi bi tꞌumbäbi. Nunä zi nju enä: «Hängu di jamädibi nuꞌu̱ yä zi nju mi thogi po geki pa ndi po̱nihe ndi predikahe. Nuyu̱ yä zi nju mi rꞌakägi rä ñhuni ꞌnepu̱ mi tsixkägi mänꞌaki ha mä nguu. Nubye̱ di da ngue̱nda ge nuyu̱ yä zi nju, ko ndunthi rä mhäte bi ja ndunthi yä sacrificio po geki». Mäjuäni ge hingä gatꞌho ma dä za dä koskägihu̱ näꞌä di pe̱fihu̱ po geꞌu̱. Rä zi nju Kayla enä: «Gä hohmä gä koꞌtsuäbi nuꞌu̱ yä zi ku näꞌä bi me̱fi po geki, pe nixi di pädi habu̱ ꞌmu̱i. Pe di pädi xä ñho ge rä Zi Dada Jeoba hää pädi habu̱ yꞌo kada nꞌa de geꞌu̱, ꞌne xa di xatuäbi pa njabu̱ go dä guꞌti nuꞌu̱ yä zi ku näꞌä bi me̱fi po geki». Pe̱ꞌtsä nraso näꞌä mängä rä zi nju Kayla. Rä Zi Dada Jeoba di da ngue̱nda gatꞌho näꞌä di pe̱fihu̱ po mä zi kuhu̱ ꞌne kada nꞌa de nuꞌu̱ yä sacrificio di jahu̱ po geꞌu̱. Jeoba handi ngu nꞌa rä deuda näꞌä pe̱ꞌtsi kongekhu̱ ꞌne dä za gä mꞌu̱ihu̱ seguro ge näꞌä ma dä gutkägihu̱ (hñeti Proverbios 19:17).

12. ¿Te dä za me̱fi nuꞌu̱ yä ñꞌo̱ho̱ xä nxixtehe pa dä ꞌñudi ge di mädi gatꞌho yä ku de rä mhuntsꞌi? (Hyandi ꞌnehe yä foto).

¹² Mu̱ nuꞌi grä ñꞌo̱ho̱ ꞌne ya xkä nxixtehe, ¿te dä za gi pe̱fi pa gi ꞌñudi rä mhäte ha rä mhuntsꞌi? Dä hogi gi hyoni hanja dä za gi fatsꞌi yä ku. Nꞌa rä bäsjäꞌi rä thuhu Jordan, bi yꞌambäbi nꞌa rä anciano te mi debe dä me̱fi pa njabu̱ dä za dä matsꞌi mä nꞌa tu̱i yä ku. Näꞌä anciano bi felisita näꞌä rä bäsjäꞌi po gatꞌho näꞌä ya mi pe̱fi po rä mhuntsꞌi, ꞌne bi matsꞌi pa bi hyandi habu̱ xä za xä sigi xä mpe̱fi. Bi ꞌñembäbi ge xä hogi xä zo̱ho̱ nꞌihi ha rä Ngu de gä Mhuntsꞌi pa njabu̱ xä za xä ze̱njua gatꞌho yä ku. ꞋNehe bi ꞌñembäbi ge xä hogi xä uni mä nꞌa tu̱i yä komentario ha yä mhuntsꞌi, ge xä yꞌo̱tꞌe ntsꞌe̱di po dä bo̱ni mä nꞌa tu̱i ko rä grupo pa dä predika, ꞌne ge xä hyoni rä modo hanja xä za xä matsꞌi märꞌa yä ku. Näꞌä bäsjäꞌi bi jamäsu nuya yä konseho ꞌne geꞌä bi matsꞌi pa mꞌe̱fa bi hñäni märꞌa yä responsabilida ha rä mhuntsꞌi. Geꞌä bi matsꞌi ꞌnehe pa njabu̱ bi te näꞌä rä mhäte mi senti po gatꞌho yä ku. Nunä bäsjäꞌi bi hyandi ge ora nꞌa rä ku di thutsꞌi de gä siervo ministerial ya xä ꞌñudi dende änte ge di mädi ꞌne fatsꞌi yä ku ꞌne sigi pe̱fi njabu̱ (1 Tim. 3:8-10, 13).

13. ¿Hanja bi matsꞌi rä zi ku Christian näꞌä rä mhäte di senti po rä Zi Dada Jeoba ꞌne po yä ku?

¹³ ¿Mä mꞌe̱tꞌo ngrä siervo ministerial o ngrä anciano pe nubye̱ ya hinä? Rä Zi Dada Jeoba hinxä pumfri gatꞌho näꞌä ri ꞌme̱fi gä ja, nixi näꞌä rä mhäte gä udi näꞌä rä tiempoꞌä ꞌne gi sigi gi udi mäpaya (1 Cor. 15:58). Nꞌa rä ku rä thuhu Christian, beni ge nuꞌmu̱ bi thäki de gä anciano, xa himi senti xä ñho. Nuni zi ku enä: «Mäske ya hingä ndrä anciano, po näꞌä rä mhäte di pe̱ꞌspäbi rä Zi Dada Jeoba dä desidi gä o̱tꞌe ntsꞌe̱di po gä pe̱päbi ko ngatꞌho mä koraso». Ko rä tiempo, rä zi ku Christian bi thutsꞌi mänꞌaki de gä anciano. Nuni zi ku sigi enä: «Ngu ndi duda gä asepta. Pe dä handi ge rä Zi Dada Jeoba mi udi rä nhuekäte po geki ꞌne mi huxkägi mänꞌaki de gä anciano pa gä fatsꞌi yä zi ku ha rä mhuntsꞌi. Näꞌä rä mhäte di pe̱ꞌspäbi rä Zi Dada Jeoba ꞌne yä ku, geꞌä bi jaki dä asepta mänꞌaki».

14. ¿Te dä za gä pädihu̱ de näꞌä bi mää rä zi nju Elena?

¹⁴ Nuju̱ ꞌnehe di mädihu̱ nuꞌu̱ yä zi jäꞌi hingi pe̱päbi rä Zi Dada Jeoba (Mat. 22:37-39). Por ejemplo, nꞌa rä zi nju rä thuhu Elena de nꞌa rä dähni näꞌä fädi ngu rä república de Georgia enä: «Ri mu̱di nuga ndi po̱ni ndi predika ho̱nse̱ ngeꞌä ndi mädi rä Zi Dada Jeoba. Pe entremäs mi te näꞌä rä mhäte ndi senti po Geꞌä, ꞌnehe mi te mä mhäte po yä zi jäꞌi. Ndi trata gä imäjinä nuꞌu̱ yä xuñha ꞌne yä sufrimiento mi thogi, ꞌnepu̱ ko rä Mäkä Tꞌofo ndi huahni te mä noya gä xipäbi pa gä huꞌmpäbi yä mu̱i. Ora di pe̱fi njabu̱, di da ngue̱nda ge mänꞌa di te näꞌä mä ganä de gä fatsꞌi nuꞌu̱ yä zi jäꞌiꞌu̱» (Rom. 10:13-15).

NUꞌU̱ YÄ BENEFISIO BI HÄ ORA DI UDIHU̱ RÄ MHÄTE PO MÄRꞌAA

15, 16. Ja ngu di nheki ha yä foto, ¿te mä benefisio bi hä ora di udihu̱ rä mhäte po märꞌaa?

¹⁵ Ora di udihu̱ rä mhäte po mä kuhu̱, märꞌa yä zi jäꞌi ꞌnehe di benefisia. Durante näꞌä rä COVID-19, Paolo ꞌne rä ꞌme̱hñä bi matsꞌi ndunthi yä nju nuꞌu̱ ya yä zi däta jäꞌi pa bi bädi bi usa yä telefono o yä tablet. Nꞌa de nuya yä zi nju xa mi japäbi xä ñhei, pe hää bi bädi bi usa rä tablet ꞌne asta bi mbitabi rä familia dä hyandi rä Fenäte de rä du rä Hesu. Hää, 60 yä jäꞌi de rä familia bi za bi hyandi rä Fenäte de rä du rä Hesu. Ja ngu di handihu̱, tanto nunä zi nju ngu nuꞌu̱ yä pariente bi benefisia de näꞌä rä mfatsꞌi bi uni Paolo ꞌne rä zi ꞌme̱hñä. Mꞌe̱fa nunä zi nju bi yꞌopäbi nꞌa rä karta rä ku Paolo ꞌne bi ꞌñembäbi: «Ndunthi di jamädi ngeꞌä gä utkägi gä usa mä tablet. Nunka ma gä pumfri näꞌä rä mhäte bi ꞌñudi rä Zi Dada Jeoba ꞌne näꞌä rä pasensia gä udihu̱ ꞌnehe po geki».

¹⁶ ¿Te bi bädi rä ku Paolo ko nunä esperiensia? Nunä zi ku bi hyandi ge rä mhäte geꞌä mänꞌa xa mähyoni ke näꞌä rä mfädi dä za gä pe̱ꞌtsihu̱. Rä ku Paolo enä: «Po nꞌa rä tiempo dä nsuperintendente de gä circuito. ꞌNe ora di nthe̱ꞌmee rꞌa yä zi ku di da ngue̱nda ge hingi beni nuꞌu̱ mä thoꞌtsi dä uni, pe hää beni näꞌä rä mhäte ꞌne näꞌä rä mfatsꞌi dä umbäbi».

17. ¿Toꞌo ꞌnehe ma dä benefisia ora di udihu̱ rä mhäte?

¹⁷ Nuju̱ ꞌnehe di hänihu̱ ndunthi yä benefisio ora di udihu̱ rä mhäte po märꞌaa. Njabu̱ udi rä esperiensia Jonathan, nꞌa rä zi ku näꞌä bi ꞌmu̱i ha rä dähni Nueva Zelanda. Jonathan enä ge nꞌa rä pa nsabdo bi hyandi hanja nꞌa rä precursor ma xä bo̱nise̱ pa xä predika mäske xa xmä pa rä Hyadi. Mi hyandi njabu̱ Jonathan bi desidi bi kompañä näꞌä rä precursor tatꞌä nsabdo de gä ndee. Jonathan nunka bi imäjinä hängu yä benefisio ma xä hñäni. Mäpaya nuni zi ku enä: «Xa gä mängä mäjuäni, näꞌä tiempoꞌä hingä ndi ho gä predika. Pe ora dä handi näꞌä rä precursor hanja mi udi rä Noya Äjuä ꞌne hanja yä zi jäꞌi xa mi ho dä yꞌo̱de, geꞌä bi maxkägi pa xa dä ho gä predika. Pe hingä ho̱nse̱ꞌä, ꞌnehe dä tähä nꞌa mä amigo ngeꞌä näꞌä rä precursor xa bi maxkägi ndunthi pa dä sigi dä bansa ha rä ꞌñuu rä Zi Dada Jeoba, pa gä pe̱ꞌtsi rä johya ꞌne pa gä japi dä te näꞌä mä ntsitsꞌi di pe̱ꞌtsi ko rä Zi Dada Jeoba».

18. ¿Te ne rä Zi Dada Jeoba gä pe̱fihu̱ kada nꞌa de gekhu̱?

¹⁸ Jeoba ne ge kada nꞌa de gekhu̱ gä potꞌihu̱ nꞌa rä dängä mhäte po Geꞌä ꞌne po mä mikꞌeihu̱. Ja ngu ya dä handihu̱, pa gä tedehu̱ näꞌä rä mhäte di sentihu̱ po rä Zi Dada Jeoba, mähyoni gä nxadihu̱ rä Mäkä Tꞌofo, gä hudihu̱ gä ntso̱ꞌmihu̱ näꞌä utkägihu̱ ꞌne gä xatuäbihu̱ hyaxtho. ꞌNehe dä pädihu̱ ge pa gä tedehu̱ näꞌä rä mhäte di sentihu̱ po mä zi kuhu̱, mähyoni gä honihu̱ rä modo hanja gä fatsꞌihu̱ ora thogi yä xuñha. Ora di te näꞌä rä mhäte di sentihu̱ po rä Zi Dada Jeoba ꞌnehe di te näꞌä rä amista di pe̱ꞌtsihu̱ Kongeꞌä ꞌne ko ngatꞌho mä kuhu̱. Hää, ¡mu̱ gä sigihu̱ gä tedehu̱ mä mhätehu̱, nunä amista dä za dä dura pa nzäntho!