¡Hingä ma dä faya näꞌä di to̱ꞌmihu̱!

1. ¿Por hanja dä za gä eñhu̱ ge näꞌä rä humu̱i mi pe̱ꞌtsi Abrahán hingä ma xä faya?

ÄJUÄ JEOBA bi prometebi Abrahán ge ha rä familia ma xä mꞌu̱i nꞌa rä jäꞌi ꞌne ge po mäde de nunä jäꞌi, ma xä njäpi gatꞌho yä dähni de rä Xiꞌmhai (Gén. 15:5; 22:18). Koꞌmu̱ Abrahán xa mi pe̱ꞌspäbi ndunthi rä jamfri ꞌne rä komfiansa rä Zi Dada Jeoba, hinte mä duda mi pe̱ꞌtsi ge hää ma xä thogi njabu̱. Pe nuꞌmu̱ Abrahán ya mi pe̱ꞌtsi 100 nje̱ya ꞌne Sara 90, tobe hixki mꞌu̱itho ninꞌa rä bätsi (Gén. 21:​1-7). Pe rä Mäkä Tꞌofo enä: «Abrahán mi kamfri ge dä zo̱ho̱ nuꞌä xki xipäbi Äjuä ꞌne bi sigi bi do̱ꞌmi. Hänge njabu̱ nuꞌä bi ndada de ndunthi yä hnini ngu nuꞌä xki xipäbi Äjuä» (Rom. 4:18). Ja ngu ya xtä pädihu̱, rä promesa rä Zi Dada Jeoba himbi faya. Abrahán bi ndada ja ngu tanto xki desia ꞌne bi mꞌu̱i nꞌa rä tꞌu̱ näꞌä bi ꞌñembäbi Isaac. ¿Por hanja Abrahán xa mi ꞌmu̱i seguro ge rä Zi Dada Jeoba hingä ma xä fayabi?

2. ¿Por hanja Abrahán hinte mä duda mi pe̱ꞌtsi ge rä Zi Dada Jeoba ma xä kumpli näꞌä xki prometebi?

² Koꞌmu̱ Abrahán mi pädi xä ñho tenguꞌä rä Zi Dada Jeoba, hinte mä duda mi pe̱ꞌtsi ꞌne mi ꞌmu̱i kombensido ge Jeoba ma xä kumpli näꞌä xki prometebi (Rom. 4:21). Po näꞌä rä däta jamfri mi pe̱ꞌtsi Abrahán, rä Zi Dada Jeoba bi numäñho ꞌne bi hyandi Abrahán ngu nꞌa rä jäꞌi näꞌä hinte mä thai mi tu ante yä da (Sant. 2:23). Ja ngu di handihu̱ ha Romanos 4:​18, Abrahán xa mi kamfri ꞌne mi pe̱ꞌspäbi ndunthi rä komfiansa rä Zi Dada Jeoba. Pe hingä ho̱nse̱ꞌä, Abrahán nunka bi hñäki de rä mfeni näꞌä xki promete rä Zi Dada Jeoba. Nubye̱ ma gä handihu̱ rä mfistꞌofo Romanos rä capítulo 5 pa gä pädihu̱ te bi mää rä apostol Pablo de näꞌä rä humu̱i di pe̱ꞌtsihu̱.

3. ¿Te bi mää rä apostol Pablo de näꞌä rä humu̱i di pe̱ꞌtsihu̱?

³ Rä apostol Pablo mää por hanja dä za gä mꞌu̱ihu̱ seguro ge näꞌä rä humu̱i di pe̱ꞌtsihu̱ hingä ma dä faya (Rom. 5:​5, TNM). Rä apostol Pablo ꞌnehe utkägihu̱ hanja näꞌä rä humu̱i di pe̱ꞌtsihu̱ dä za mänꞌa dä te ꞌne dä ze̱di. Komforme ma gä handihu̱ näꞌä udi Romanos 5:​1-5, hyandi hanja ngu xä thogi rä tiempo mänꞌa xä te näꞌä rä humu̱i gi pe̱ꞌtsi. Näꞌä ma gä pädihu̱ ma dä maxkägihu̱ pa njabu̱ mänꞌa gä japäbihu̱ dä te ꞌne dä ze̱di näꞌä humu̱iꞌä. Mꞌe̱tꞌo ma gä handihu̱ ndaꞌä näꞌä rä humu̱i di pe̱ꞌtsihu̱, ꞌne por hanja rä apostol Pablo bi ꞌñenä ge nunä hingä ma dä faya.

NꞌA RÄ HUMU̱I XA MÄHOTHO

4. ¿De te di trata Romanos 5:​1, 2?

⁴ (Hñeti Romanos 5:​1, 2, TNM). Rä apostol Pablo bi yꞌopäbi nunä karta nuꞌu̱ yä kristianu de näꞌä rä mhuntsꞌi mi ja ha rä dähni Roma. Nuyu̱ yä ku xki zo̱ho̱ xki bädi rä Zi Dada Jeoba ꞌne xki gamfri rä Hesu. Po näꞌä rä däta jamfri bi ꞌñudi nuyu̱ yä kristianu, rä Zi Dada Jeoba xa bi numäñho ꞌne bi hyandi ngu yä amigo ꞌne bi borrabi yä thai. Koꞌmu̱ rä Zi Dada Jeoba bi huahni nuyu̱ yä kristianu, dende geꞌmu̱ nuyu̱ bi zo̱ho̱ bi me̱ꞌtsi nꞌa rä humu̱i xa mähotho.

5. ¿Te mä humu̱i pe̱ꞌtsi rꞌa yä kristianu?

⁵ Mꞌe̱fa, ha näꞌä rä karta bi yꞌopäbi nuꞌu̱ yä kristianu mi ꞌmu̱i ha Éfeso, rä apostol Pablo bi no̱ni näꞌä rä humu̱i xki uni rä Zi Dada Jeoba pa geꞌu̱. Näꞌä bi ꞌñembäbi: «Gi pähu̱ te mä tesoro pe̱ꞌtsi pa dä umbäbi de gä erensia yä santo» (Efes. 1:​18, TNM). Ora rä apostol Pablo bi yꞌopäbi nuꞌu̱ yä kristianu mi ꞌmu̱i ha Colosas, nubye̱ bi xipäbi habu̱ ma xä hñäni näꞌä erensia mi to̱ꞌmiꞌu̱. Bi ꞌñembäbi: «Gi to̱ꞌmhu̱ ma gi ꞌmu̱hu̱ nuni mähetsꞌi habu̱ xä hyoki Äjuä pa geꞌähu̱» (Col. 1:​4, 5). Kongehnä utkägihu̱ ge Äjuä xä huahni rꞌa yä kristianu pa dä ma dä ꞌmu̱i ha mähetsꞌi, ꞌne ma dä mända mähye̱gi ko rä Kristo (1 Tes. 4:​13-17; Apoc. 20:6).

6. ¿Te bi mää nꞌa rä zi ku näꞌä mi to̱ꞌmi dä ma mähetsꞌi?

⁶ Nuꞌu̱ yä kristianu to̱ꞌmi dä ma ha mähetsꞌi, xa di balora ndunthi näꞌä rä humu̱i pe̱ꞌtsi. Por ejemplo, po rä je̱ya 1991 rä ku Frederick Franz bi ꞌñenä: «Äjuä ma dä kumpli nunä humu̱i ꞌne hingä ma dä faya. Näꞌä rä humu̱i xä rꞌakägihe Äjuä, ma dä kumplibi kada nꞌa de nuꞌu̱ 144.000 xä huahni pa dä forma nꞌa rä tꞌu̱kä taxo». Nunä zi ku bi me̱päbi rä Zi Dada Jeoba po ndunthi yä je̱ya. ¿Te mi mbeni näꞌä zi ku de näꞌä xki me̱fi? Näꞌä bi sigi bi ꞌñenä: «Ngu thogi kada nꞌa rä pa, mänꞌa di balora näꞌä xä prometegi rä Zi Dada Jeoba [ . . . ]. Hindi mporta ua di ꞌme̱di nꞌa miyon yä je̱ya pa gä häni nunä erensia, di bale rä penä gä sigi gä to̱ꞌmi. Entremäs di to̱ꞌmi ndunthi, ¡entremäs di balora nunä humu̱i!».

7, 8. ¿Te mä humu̱i pe̱ꞌtsi kasi gatꞌho nuꞌu̱ pe̱päbi rä Zi Dada Jeoba? (Romanos 8:​20, 21).

⁷ Pe hingä gatꞌho yä kristianu to̱ꞌmi dä ma ha mähetsꞌi. Kasi gatꞌho nuꞌu̱ yä kristianu pe̱päbi rä Zi Dada Jeoba pe̱ꞌtsi mä nꞌa rä humu̱i. ¿Te mä humu̱iꞌä? Näꞌä rä humu̱i mi pe̱ꞌtsi Abrahán: ¡Dä mꞌu̱i pa nzäntho ha rä Xiꞌmhai xti mända rä Gobiernu Äjuä! (Heb. 11:​8-10, 13). Rä apostol Pablo ꞌnehe bi no̱ni nunä humu̱i mähotho (hñeti Romanos 8:​20, 21, TNM). Nuꞌmu̱ gä fu̱di gä nxadi rä Mäkä Tꞌofo ꞌne gä pädi te ma dä me̱fi Äjuä xudi ndämäni, ¿te mä nꞌa gä ho? ¿Xa gä johya ora gä pädi ge ma dä zo̱ho̱ rä pa habu̱ ma dä thäki rä pekado pa nzäntho? ¿Gä johya ora gä pädi ge Äjuä ma dä gu̱tsꞌi nuꞌu̱ xä du pa dä mꞌu̱i ha rä Xiꞌmhai? Xa Mähotho nunä humu̱i xä rꞌakägihu̱ rä Zi Dada Jeoba, ngeꞌä di pädihu̱ ge to̱bgägihu̱ nꞌa rä mꞌu̱i temäꞌentho xudi ndämäni.

⁸ Äjuä xä ñätkägihu̱ nꞌa rä thähä pa kada nꞌa de gekhu̱ ꞌne geꞌä rꞌakägihu̱ ndunthi rä johya. Rꞌaa to̱ꞌmi dä mꞌu̱i pa nzäntho ha mähetsꞌi, ꞌne märꞌaa to̱ꞌmi dä mꞌu̱i ha rä Xiꞌmhai. Näꞌä humu̱i di pe̱ꞌtsihu̱ kada nꞌa de gekhu̱, dä za dä te ꞌne dä ze̱di ngu thogi kada nꞌa rä pa. Pe, ¿te mähyoni gä pe̱fihu̱? Pa gä pädihu̱, ma gä sigihu̱ gä handihu̱ näꞌä bi yꞌofo rä apostol Pablo. Näꞌä bi yꞌofo ma dä maxkägihu̱ pa mänꞌa gä mꞌu̱ihu̱ kombensido ge näꞌä xä prometegihu̱ rä Zi Dada Jeoba, ma dä kumpli ꞌne hingä ma dä fayagihu̱.

JAPI DÄ TE ꞌNE DÄ ZE̱DI NÄꞌÄ RÄ HUMU̱I GI PE̱ꞌTSI

9, 10. Ja ngu rä apostol Pablo, ¿te di to̱ꞌmihu̱ gä thogihu̱ nuju̱ di pe̱päbihu̱ rä Zi Dada Jeoba? (Romanos 5:3; hyandi ꞌnehe yä foto).

⁹ (Hñeti Romanos 5:​3, TNM). Tal vez dä za dä jakägihu̱ xä ñhei gä kamfrihu̱ näꞌä bi mää rä apostol Pablo nuꞌmu̱ bi ꞌñenä ge ora di thogihu̱ yä xuñha, geꞌä ma dä japäbi mänꞌa dä ze̱di näꞌä rä humu̱i xä rꞌakägihu̱ rä Zi Dada Jeoba. Kada nꞌa de gekhu̱ ma gä thogihu̱ ndunthi yä xuñha. Asta rä apostol Pablo bi thogi ndunthi yä xuñha. Nuꞌmu̱ bi yꞌopäbi nꞌa rä karta nuꞌu̱ yä kristianu mi ꞌmu̱i ha Tesalónica bi ꞌñembäbi: «Nu nduä ꞌmu̱hebu̱ kongeꞌähu̱, dä xiꞌäꞌihe ge mi pe̱ꞌtsi te gä thohu̱ yä ntꞌu̱tsate» (1 Tes. 3:4). ꞌNehe, rä apostol Pablo bi yꞌopäbi nuꞌu̱ yä kristianu mi ꞌmu̱i ha Corinto ꞌne bi ꞌñembäbi: «Zi kuhu̱, di nehe gi pähu̱ de nuya tsꞌo thogi dä thogihe de gehni Asia. Geꞌu̱ rꞌa yä tsꞌo thogi xi yä dängi, [ꞌne] yä mi otho mä tsꞌe̱dihe pa gä tse̱tꞌhe» (2 Cor. 1:8; 11:​23-27).

¹⁰ Geꞌä thogi ꞌnehe mäpaya, gatꞌho nuꞌu̱ pe̱päbi rä Zi Dada Jeoba ꞌnehe thogi yä xuñha (2 Tim. 3:12). Xi nuꞌi, ¿te mä xuñha xkä ñhandui dende nuꞌmu̱ gä fu̱di gä pädi de rä Zi Dada Jeoba ꞌne de rä Hesu? Zäi ge ri amigo o ri familia xä nkue̱ kongeꞌi o asta xä maltrataꞌi. Xi ha ri ꞌme̱fi, ¿ꞌnehe xkä thogi yä xuñha ngeꞌä gi trata gi porta ja ngu mända rä Mäkä Tꞌofo? (Heb. 13:18). O, ¿xkä thogi yä ntꞌu̱tsate po yä tsꞌu̱tꞌhui o yä gobiernu ngeꞌä gi predika? Rä apostol Pablo bi ꞌñenä ge mähyoni gä johyahu̱ hindi mporta te mä xuñha di thogihu̱. ¿Por hanja?

11. ¿Por hanja di debe gä mꞌu̱ihu̱ dispuesto gä uantahu̱?

¹¹ Mähyoni gä johyahu̱ ora di thogihu̱ yä xuñha, ngeꞌä nuya faxkägihu̱ gä potꞌihu̱ nꞌa rä hogä mꞌu̱i näꞌä di ho rä Zi Dada Jeoba. Romanos 5:3 enä: «Ma gä johyahu̱ ora di thogihu̱ yä xuñha, ngeꞌä di pädihu̱ ge yä xuñha di entrenägihu̱ pa gä uantahu̱». Koꞌmu̱ kada nꞌa de gekhu̱ di thogihu̱ yä xuñha ngeꞌä di pe̱päbihu̱ rä Zi Dada Jeoba, gatꞌho di debe gä mꞌu̱ihu̱ desidido gä uantahu̱. ¿Por hanja? Ngeꞌä mu̱ di sigihu̱ di ze̱tihu̱ ꞌne di uantahu̱, ma gä hänihu̱ näꞌä xä ñätkägihu̱ rä Zi Dada Jeoba. Hindi ne gä njahu̱ ngu nuꞌu̱ yä jäꞌi bi no̱ni rä Hesu ora bi ꞌñenä ge nuꞌu̱ yä jäꞌiꞌu̱, ꞌñenä näꞌä rä semilla bi dagi habu̱ ja ndunthi yä do; mäske bi dämä fo̱tsꞌe pe himbi nja yä yꞌu̱u̱ hänge mäntꞌä bi yꞌotꞌi. Njabu̱ ꞌnehe rꞌa yä jäꞌi, ri mu̱di ko ndunthi rä johya di ho dä yꞌo̱de rä Noya Äjuä. Pe ora tso̱päbi yä xuñha nguntꞌä di desanimä ꞌne ya hingi ne dä sigi (Mat. 13:​5, 6, 20, 21). Di pädihu̱ ge ninꞌa rä jäꞌi hindi ho dä thogi yä xuñha ꞌne dä sufri, pe ora di ze̱tihu̱ di hänihu̱ ndunthi yä benefisio. Ma gä handihu̱ por hanja.

12. ¿Te mä benefisio bi hä ora di uantahu̱ ꞌne di ze̱tihu̱ yä xuñha?

¹² Santiago ꞌnehe bi mää te mä benefisio di hänihu̱ mu̱ di uantahu̱ yä xuñha. Näꞌä bi ꞌñenä: «Ostä zabiꞌihu̱ gi tse̱tihu̱, pa njabu̱ mänꞌa dä nja ri jamfrihu̱, ꞌne [ . . . ] pa xi gi ꞌmu̱hu̱ xä ñho ha rä thandi Äjuä» (Sant. 1:​2-4). Ja ngu di handihu̱, gä uantahu̱ bi hä ndunthi yä benefisio. ¿Te mä benefisioꞌu̱? Faxkägihu̱ pa mänꞌa gä pe̱ꞌtsihu̱ rä pasensia ꞌne mä komfiansahu̱ po rä Zi Dada Jeoba mänꞌa di te. Pe hingä ho̱nse̱ꞌä, ora di ze̱tihu̱ yä xuñha bi hä mä nꞌa rä dängä benefisio.

13, 14. ¿Hanja nugägihu̱ rä Zi Dada Jeoba ora di uantahu̱ yä xuñha, ꞌne te thogi ko näꞌä humu̱i di pe̱ꞌtsihu̱? (Romanos 5:4).

¹³ (Hñeti Romanos 5:​4, TNM). Rä apostol Pablo bi ꞌñenä: «Ora di uantahu̱, Äjuä di numäñhogihu̱». Nuya yä noya hindi signifika ge rä Zi Dada Jeoba di johya ora handi di sufrihu̱ o di thogihu̱ yä xuñha. Sino ke ne dä mää ge rä Zi Dada Jeoba xa di johya ora handi ge di uantahu̱ ꞌne hindi ꞌuegehu̱ de geꞌä. ¡Hängu di nupkägihu̱ mä mfenihu̱ gä pädihu̱ ge rä Zi Dada Jeoba o̱tꞌe ngue̱nda ora di ze̱tihu̱ yä xuñha ꞌne di johyabihu̱ rä koraso! (Sal. 5:12).

¹⁴ Mäyaꞌmu̱, Abrahán ꞌnehe bi ñhandui ndunthi yä xuñha. Pe koꞌmu̱ bi ze̱ti ꞌne bi uanta, rä Zi Dada Jeoba bi nuu ngu rä amigo ꞌne asta bi borrabi yä thai (Gén. 15:6; Rom. 4:​13, 22). Njabu̱ ꞌnehe dä za dä thogi kongekhu̱. Mäske rä Zi Dada Jeoba di numäñho näꞌä di pe̱fihu̱ ꞌne nuꞌu̱ yä responsabilida di pe̱ꞌtsihu̱ ha rä hnini, pe Näꞌä mänꞌa di ho ora handi ge di ze̱tihu̱ yä xuñha ꞌne hindi ꞌuegehu̱ de geꞌä. Hindi mporta hängu nje̱ya di pe̱ꞌtsihu̱, te di thogihu̱, o te di pädi gä pe̱fihu̱, kada nꞌa de gekhu̱ di ja mꞌe̱di gä ze̱tihu̱ yä xuñha. Xi nuꞌi, ¿gi ñhanduibye̱ nꞌa rä xuñha? Mu̱ hää, beni ge rä Zi Dada Jeoba handi näꞌä gi thogi, ꞌne xa di johya ora handi ge gi ze̱ti ꞌne gi uanta. Ora di pädihu̱ ge rä Zi Dada Jeoba o̱tꞌe ngue̱nda ora di ze̱tihu̱, di nupkägihu̱ ndunthi mä mfenihu̱ ꞌne japi mänꞌa dä ze̱di näꞌä rä humu̱i di pe̱ꞌtsihu̱.

NꞌA RÄ HUMU̱I NÄꞌÄ MÄNꞌA RI TE

15. Nuꞌmu̱ rä apostol Pablo bi xipäbi nuꞌu̱ yä kristianu de Roma ge mi to̱ꞌmi dä ma ha mähetsꞌi, ¿te bi sigi bi xipäbi ꞌne te mä ntꞌani mähyoni gä thädihu̱?

¹⁵ Ja ngu di handihu̱, rä apostol Pablo bi ꞌñenä ge mu̱ di ze̱tihu̱ ꞌne di uantahu̱ yä xuñha, rä Zi Dada Jeoba ma dä numäñhogihu̱. Ha Romanos 5:2 di handihu̱ ge rä apostol Pablo, ya xki xipäbi nuꞌu̱ yä kristianu mi ꞌmu̱i ha Roma ge nꞌa rä pa, nuꞌu̱ mi to̱ꞌmi dä mꞌu̱i ha rä nsunda Äjuä. Hää, nuꞌu̱ mi pe̱ꞌtsi rä humu̱i de dä ma ha mähetsꞌi. Pe mäske nuꞌu̱ ya mi pe̱ꞌtsi nunä humu̱i, rä apostol Pablo bi sigi bi ꞌñembäbi: «Ora di uantahu̱, Äjuä di numäñhogihu̱. ꞌNe mu̱ Äjuä di numäñhogihu̱, nuꞌmu̱ di pe̱ꞌtsihu̱ nꞌa rä humu̱i, ꞌne näꞌä rä humu̱i hingä ma dä faya» (Rom. 5:​4, 5, TNM). ¿Por hanja rä apostol Pablo bi yo no̱ni mänꞌaki rä humu̱i? Ma gä handihu̱.

16. ¿Hanja xä zo̱ho̱ nꞌa rä jäꞌi xä gamfri ge näꞌä rä humu̱i uni rä Zi Dada Jeoba hää mäjuäni ma dä kumpli? (Hyandi ꞌnehe yä foto).

¹⁶ Pa gä ntiendehu̱ näꞌä bi mää rä apostol Pablo ha Romanos 5:​4, 5, mähyoni gä o̱thu̱ ngue̱nda ge näꞌä rä humu̱i xtä e̱ntꞌihu̱ ha mä mfenihu̱, dä za dä sigi dä te ꞌne dä ze̱di. Por ejemplo, ¿gi beni te gä senti nuꞌmu̱ bi tꞌutꞌäꞌi ge nꞌa rä pa ma dä za gi mꞌu̱i pa nzäntho ha nꞌa rä Paraiso nuua ha rä Xiꞌmhai? Zäi ge ri mu̱di hingä ngi kamfri, ꞌne asta ngi senti ge ngu nꞌa rä kuentotho näꞌä mi ꞌmetꞌäꞌi. Pe ora gä sigi gä pädi rä Zi Dada Jeoba ꞌne näꞌä udi rä Mäkä Tꞌofo, zäi ge gä da ngue̱nda te mä prueba ja ge mäjuäni näꞌä di promete rä Zi Dada Jeoba ꞌne ya hinte mä duda gi pe̱ꞌtsi ge hää ma dä kumpli.

17. ¿Hanja mi nja näꞌä ri humu̱i ngi pe̱ꞌtsi nuꞌmu̱ gä fu̱di gä nxadi rä Mäkä Tꞌofo, ꞌne hanja ꞌmu̱i mäpaya?

¹⁷ ꞌNehe, dende näꞌä rä pa gä nxixtehe, näꞌä rä humu̱i gi pe̱ꞌtsi xä sigi xä te ngeꞌä mänꞌa xä ze̱di näꞌä ri ntsitsꞌi ko rä Zi Dada Jeoba (Heb. 5:13–6:1). Zäi ge xkä thogi nuꞌu̱ yä xuñha no̱ni rä mfistꞌofo Romanos 5:​2-4. Pe zäi ge ꞌnehe xkä handi hanja rä Zi Dada Jeoba xä numäñhoꞌi ngeꞌä xkä ze̱ti ꞌne xkä uanta nuꞌu̱ yä xuñhaꞌu̱. Koꞌmu̱ gi pädi ge rä Zi Dada Jeoba xa di numäñhoꞌi, mänꞌa gi ꞌmu̱i kombensido ge gatꞌho näꞌä xä promete ma dä kumpli. Nubye̱ ri humu̱i mänꞌa xä te ke nuꞌmu̱ gä fu̱di gä nxadi rä Mäkä Tꞌofo. Nubye̱ gi senti hanja rä Zi Dada Jeoba go geꞌä di prometeꞌi nuya yä jäpi. Näꞌä xkä pädi de geꞌä ꞌne de nuꞌu̱ yä promesa, xä tso̱ni mbo ha ri koraso ꞌne geꞌä xä jaꞌäꞌi gi trata xä ñho ri familia, gi huahni yä hogä desision, gi yꞌo ha nꞌa rä ꞌñuu xä ñho, ꞌne geꞌä jaꞌi gi usa xä ñho ri tiempo pa gi pe̱päbi.

18. ¿Te mä garantia xä uni rä Zi Dada Jeoba?

¹⁸ Rä apostol Pablo bi mää te thogi ko näꞌä rä humu̱i gi pe̱ꞌtsi ora rä Zi Dada Jeoba di numäñhoꞌi ngeꞌä gi ze̱ti ꞌne gi uanta yä xuñha. Näꞌä bi asegura ge näꞌä xä prometeꞌi rä Zi Dada Jeoba, ma dä kumpli. ¿Por hanja dä za gi mꞌu̱i seguro? Rä apostol Pablo bi no̱ni näꞌä garantia xä uni rä Zi Dada Jeoba. Näꞌä bi ꞌñenä: «Näꞌä rä humu̱i hingä ma dä faya, ngeꞌä rä mhäte Äjuä xä nhäꞌmi ha mä korasohu̱ po mädee de näꞌä rä mäkä tsꞌe̱di xtä hänihu̱» (Rom. 5:​5, TNM). Hänge dä za gi mꞌu̱i seguro ge näꞌä xä promete rä Zi Dada Jeoba —näꞌä xä prometeꞌi— ma dä kumpli.

19. ¿De te di ꞌmu̱ihu̱ kombensido?

¹⁹ Mähyoni gi hñudi gi ntso̱ꞌmi näꞌä bi me̱fi rä Zi Dada Jeoba po Abrahán. Rä Zi Dada Jeoba bi umbäbi nꞌa rä humu̱i Abrahán, bi numäñho ꞌne bi hyandi ngu rä amigo. Abrahán pe̱ꞌtsi te bi do̱ꞌmi pa bi hyandi hanja rä Zi Dada Jeoba bi kumpli näꞌä xki prometebi ꞌne himbi fayabi. Rä Mäkä Tꞌofo enä: «Abrahán bi do̱ꞌmä ndunthi [ . . . ] asta himbi hñängä nuꞌä xki ñhäꞌtuäbi» (Heb. 6:15; 11:​9, 18; Rom. 4:​20-22). Ja ngu Abrahán, nuju̱ ꞌnehe hinte mä duda di pe̱ꞌtsihu̱ ge mu̱ gä o̱tehu̱ rä Zi Dada Jeoba ꞌne hingä ꞌuengihu̱ de rä ꞌñuu, Näꞌä ma dä kumpli näꞌä xä promete ꞌne hingä ma dä fayagihu̱. Näꞌä rä humu̱i di pe̱ꞌtsihu̱ geꞌä jakägihu̱ gä mꞌu̱ihu̱ ko ndunthi rä johya (Rom. 12:12). Rä apostol Pablo bi ꞌñenä: «Näꞌä rä Zi Dada uni rä humu̱i, dä rꞌaꞌähu̱ ndunthi rä johya ꞌne nꞌa rä mꞌu̱i temäꞌentho po näꞌä ri jamfrihu̱, pa njabu̱ gi pe̱ꞌtsihu̱ ndunthi rä humu̱i ko näꞌä rä tsꞌe̱di rä espiritu santo» (Rom. 15:​13, TNM).