Näꞌä xä me̱fi Jeoba pa dä ñäni yä jäꞌi de rä pekado ꞌne rä du

1, 2. a) ¿Te di signifika rä pekado ꞌne hanja dä za gä täpäbihu̱? (Hyandi ꞌnehe habu̱ enä «Pa gä benihu̱»). b) ¿Ndaꞌu̱ nuꞌu̱ hñuu yä ntꞌani ma gä thädihu̱ ꞌne te ma gä pädihu̱ ha nunä revista? (Hyandi ꞌnehe habu̱ enä «Te ma gä pädihu̱»).

XI NUꞌI, ¿gi hohmä gi pädi hängu di mäꞌi rä Zi Dada Jeoba? Mu̱ hää, dä hogi gi imbestiga te xä me̱fi pa dä ñäñꞌäꞌi de rä pekado ꞌne de rä du. Rä pekadoa näꞌä nꞌa mä nkontrahu̱ näꞌä hindä za gä täpäbihu̱ ko mä tsꞌe̱dise̱hu̱. Kada nꞌa de gekhu̱ di pekahu̱ kontra Äjuä hyaxtho. ꞌNehe, kada nꞌa de gekhu̱ xtä mꞌu̱ihu̱ ko rä pekado ꞌne po geꞌä di tuhu̱ (Rom. 5:12). Pe ja yä hogä notisia. Dä za gä mꞌu̱ihu̱ kombensido ge dä za gä täpäbihu̱ rä pekado ko rä mfatsꞌi rä Zi Dada Jeoba.

² Rä Zi Dada Jeoba ya tsitsꞌi ngu 6.000 nje̱ya de xä matsꞌi yä jäꞌi dä ntsaui rä pekado. ¿Por hanja faxkägihu̱? Ngeꞌä dende nuꞌmu̱ bi hyogägihu̱, ¡rä Zi Dada Jeoba xa bi mäkägihu̱! Hänge nuꞌmu̱ bi yu̱tꞌi rä pekado ha rä Xiꞌmhai, Näꞌä xä mꞌu̱i dispuesto dä ja yä dängä sacrificio pa dä maxkägihu̱ gä ntsauihu̱ rä pekado. ꞌNe näꞌä hingi ne dä hyandi gä tuhu̱, sino ne dä hyandi gä mꞌu̱ihu̱ pa nzäntho (Rom. 6:23). Hää, Jeoba ne ge nuꞌi ꞌnehe gi mꞌu̱i pa nzäntho. Ha nunä ntꞌudi di nxadihu̱, ma gä thädihu̱ hñuu yä ntꞌani: 1) ¿Te bi me̱fi rä Zi Dada Jeoba ora bi hyandi ge yä jäꞌi ma xä du pa nzäntho? 2) ¿Te mi pe̱fi nuꞌu̱ yä jäꞌi mäyaꞌmu̱ pa mi johyabi rä koraso rä Zi Dada Jeoba mäske mi ñꞌoui rä pekado? ꞌNe 3) ¿te bi me̱fi rä Hesu pa bi ñäni yä jäꞌi de rä pekado ꞌne de rä du?

¿TE BI ME̱FI RÄ ZI DADA JEOBA ORA BI HYANDI GE YÄ JÄꞌI MA XÄ DU PA NZÄNTHO?

3. ¿Por hanja bi dagi ha rä pekado Adán ꞌne Eva?

³ Nuꞌmu̱ rä Zi Dada Jeoba bi hyoki nuꞌu̱ yä mu̱di jäꞌi, mi ne ge nuyu̱ xä mꞌu̱i temäꞌentho ꞌne ko ndunthi rä johya. Hänge bi hyoki nꞌa rä luga xa mähotho pa geꞌu̱ ꞌne bi thäti. Bi mändabi dä me̱ꞌtsi yä bätsi asta xa xä ñuꞌtsi rä Xiꞌmhai. ꞌNehe, bi mändabi ge dä hyoki gatꞌho rä Xiꞌmhai nꞌa rä jardin xa mähotho ja ngu rä jardin de Edén. Rä Zi Dada Jeoba ho̱nse̱ bi umbäbi nꞌa rä mhända Adán ꞌne Eva ꞌne hinte mä nꞌa bi yꞌapäbi. ꞌNehe bi xipäbi claro ge mu̱ hinxä jamäsu nunä mhända, nuꞌmu̱ nuꞌu̱ ma xä du. ꞌNe ya di pädihu̱ te bi thogi: nꞌa rä e̱nxe̱ näꞌä himi mädi rä Zi Dada Jeoba nixi yä jäꞌi, bi desidi bi ntsꞌomꞌu̱i ꞌne bi xipäbi yä nkꞌuamba Adán ꞌne Eva pa himbi jamäsu näꞌä rä mhända xti tꞌumbäbi ꞌne njabu̱ nuꞌu̱ bi dagi ha rä pekado. Hää, nuyu̱ himbi me̱ꞌspäbi rä komfiansa rä Zi Dada Jeoba ꞌne go bi gamfribi rä Zithu, ꞌne bi thogi ja ngu xki xipäbi rä Zi Dada Jeoba: nuꞌu̱ bi mu̱di bi nxita asta xa bi du (Gén. 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Por hanja rä Zi Dada Jeoba xa di u̱tsa rä pekado ꞌne por hanja faxkägihu̱ pa gä täpäbihu̱? (Romanos 8:​20, 21).

⁴ Mäske xä ntsꞌo näꞌä bi me̱fi Adán ꞌne Eva, rä Zi Dada Jeoba bi ne ge xä gohi ha rä Mäkä Tꞌofo näꞌä bi me̱fiꞌu̱ pa njabu̱ dä za gä ntiendehu̱ por hanja näꞌä xa di u̱tsa rä pekado. Rä pekado ꞌuegägihu̱ de rä Zi Dada Jeoba ꞌne tsixkägihu̱ ha rä du (Is. 59:2). Rä Zithu xa di u̱tsa rä Zi Dada Jeoba ꞌne yä jäꞌi. Po geꞌä bi japäbi Adán ꞌne Eva bi dagi ha rä pekado ꞌne mäpaya geꞌä ne dä logra kongekhu̱ ꞌnehe. Nuꞌmu̱ Adán ꞌne Eva bi dagi ha rä pekado, zäi ge rä Zithu bi mbeni ge kongeꞌä rä Zi Dada Jeoba ya hingä ma xä logra näꞌä xki beni dä me̱fi ko yä jäꞌi. Pe rä Zithu nunka bi imäjinä ge po näꞌä rä mhäte pe̱skägihu̱ rä Zi Dada Jeoba, nguntꞌä ma xä ja nꞌa rä däta tꞌo̱tꞌe pa dä ñäni yä jäꞌi de rä pekado ꞌne rä du. Hää, rä Zi Dada Jeoba himbi paati näꞌä mi beni dä me̱fi ko nuꞌu̱ yä bätsi Adán ꞌne Eva (hñeti Romanos 8:​20, 21, TNM). Rä Zi Dada Jeoba mi pädi xä ñho ge rꞌa yä bätsi Adán ꞌne Eva ma xä desidi xä mädi ꞌne ma xä yꞌapäbi rä mfatsꞌi pa njabu̱ xä za xä ntsaui ꞌne xä däpäbi rä pekado. Koꞌmu̱ rä Zi Dada Jeoba näꞌä mä Hyokätehu̱ ꞌne nꞌa rä hogä Dada, näꞌä bi hyoni rä forma hanja dä matsꞌi yä jäꞌi pa njabu̱ xä za xä joni Kongeꞌä ꞌne xä däpäbi rä pekado ꞌne rä du. Ma gä handihu̱ te bi me̱fi rä Zi Dada Jeoba pa bi matsꞌi yä jäꞌi.

5. ¿Hämꞌu̱ ꞌne te mä humu̱i bi umbäbi rä Zi Dada Jeoba yä mexiꞌmhai? (Génesis 3:15).

⁵ (Hñeti Génesis 3:15). Nuꞌmu̱ Adán ꞌne Eva bi dagi ha rä pekado, mäntꞌä rä Zi Dada Jeoba bi mää ge ma xä huati rä Zithu ꞌne njabu̱ bi umbäbi nꞌa rä humu̱i gatꞌho yä jäꞌi. Jeoba ꞌnehe bi mää ge ja toꞌo ma xpä pe̱hni ꞌne ko rä tiempo go geꞌä ma xä huati rä Zithu ꞌne ma xä hñäki gatꞌho nuꞌu̱ yä xuñha bi mu̱di ha rä jardin de Edén po rä tsꞌokiꞌä (1 Juan 3:8). Pe näꞌä toꞌo ma xpä pe̱hni, mꞌe̱tꞌo ma xä sufri ngeꞌä rä Zithu ma xä japi xä thogi yä u̱gi ꞌne ma xä hyo. Näꞌä ma xä me̱fi rä Zithu ma xä u̱mbäbi rä koraso rä Zi Dada Jeoba. Pe rä Zi Dada Jeoba bi desidi ge gatꞌho näꞌä rä u̱gi ma xä senti, mi bale rä penä kontal xä ñäni de rä pekado ꞌne rä du nuꞌu̱ yä miyontho yä jäꞌi.

¿TE MI PE̱FI NUꞌU̱ YÄ JÄꞌI MÄYAꞌMU̱ PA MI JOHYABI RÄ KORASO RÄ ZI DADA JEOBA MÄSKE MI ÑꞌOUI RÄ PEKADO?

6. ¿Te bi me̱fi rꞌa yä jäꞌi ngu Abel ꞌne Noé pa bi joni ko rä Zi Dada Jeoba?

⁶ Mu̱ gatꞌho nuꞌu̱ yä bätsi Adán ꞌne Eva ma xä mꞌu̱i ko rä pekado, ¿hanja ma xä za xä joni ko rä Zi Dada Jeoba? Ngu mi thogi yä je̱ya, rä Zi Dada Jeoba rꞌamätsꞌu̱u̱ bi mää te mi debe dä me̱fi yä jäꞌi. Adán ꞌne Eva bi me̱ꞌtsi näꞌä rä mu̱di tꞌu̱ ꞌne bi ꞌñembäbi Caín. Mꞌe̱fa bi mꞌu̱i mä nꞌa rä tꞌu̱ ꞌne bi hñuꞌmpäbi Abel. Abel geꞌä rä mu̱di jäꞌi xa bi mädi rä Zi Dada Jeoba ꞌne bi me̱ꞌspäbi ndunthi rä komfiansa hänge xa mi ne dä me̱fi näꞌä di hoꞌä. Koꞌmu̱ Abel mrä mayꞌo, näꞌä «bi gu̱ rꞌa de nuꞌu̱ yä mu̱di bätsi yä de̱ti ꞌne bi hyo pa bi ofrecebi» rä Zi Dada Jeoba. ¿Hanja bi hyandi rä Zi Dada Jeoba näꞌä rä ofrenda Abel? Rä Mäkä Tꞌofo enä: «Rä Zi Dada Jeoba xa bi numäñho Abel ko näꞌä rä ofrenda bi uni» (Gén. 4:4). Ko rä tiempo bi mꞌu̱i märꞌa yä jäꞌi ngu Noé nuꞌu̱ xa bi mädi rä Zi Dada Jeoba ꞌne bi umbäbi yä ofrenda ꞌnehe. Rä Zi Dada Jeoba ꞌnehe xa bi numäñho nuya yä ofrenda (Gén. 8:​20, 21). Ko näꞌä bi me̱fi nuyu̱ yä jäꞌi, bi ꞌñudi ge mäske xtä mꞌu̱ihu̱ ko rä pekado dä za gä jonihu̱ ko rä Zi Dada Jeoba ꞌne gä pe̱fihu̱ näꞌä di hoꞌä.b

7. ¿Te dä za gä pädihu̱ de näꞌä bi me̱fi Abrahán nuꞌmu̱ bi mꞌu̱i dispuesto dä uni rä tꞌu̱ ngu nꞌa rä ofrenda?

⁷ Abrahán geꞌä mä nꞌa rä jäꞌi bi ꞌñudi ge xa mi mädi ꞌne mi pe̱ꞌspäbi rä komfiansa rä Zi Dada Jeoba. Nꞌa rä pa, Jeoba bi yꞌapäbi dä me̱fi nꞌa rä tꞌo̱tꞌe xa xä ñhei. Bi yꞌapäbi ge dä hyo näꞌä rä tꞌu̱ rä thuhu Isaac ꞌne dä umbäbi de gä ofrenda. ¿Te gi kamfri bi senti Abrahán? Zäi ge xa bi japäbi xä ñhei ꞌne bi umbäbi ndunthi rä u̱gi. Pe mäske njabu̱, näꞌä bi mꞌu̱i dispuesto dä me̱fi näꞌä bi mändabi rä Zi Dada Jeoba. Ora ya bi zo̱ho̱ rä ora ꞌne Abrahán bi gu̱ rä juai pa xä hyo rä tꞌu̱, rä Zi Dada Jeoba himbi hyopäbi dä me̱fi njabu̱. ¿Te utkägihu̱ näꞌä bi me̱fi Abrahán? Ge po näꞌä rä mhäte pe̱skägihu̱ rä Zi Dada Jeoba, ma xä mꞌu̱i dispuesto xä me̱hni rä Tꞌu̱ pa xä uni rä bida po gekhu̱ (Gén. 22:​1-18).

8. ¿Te bi ꞌñudi nuꞌu̱ yä ofrenda mi uni yä israelita? (Levítico 4:​27-29; 17:11).

⁸ Mi thogi rꞌa yä nthebe yä je̱ya, rä Zi Dada Jeoba bi umbäbi yä mhända rä dähni Israel. Nuyu̱ yä mhända fädi ngu rä Ley rä Moisés. Ha nuya yä mhända, rä Zi Dada Jeoba bi mändabi yä israelita dä hyo rꞌa yä mboꞌni pa dä uni de gä ofrenda ꞌne njabu̱ drä pumbäbi yä pekado (hñeti Levítico 4:​27-29; 17:11). Nuꞌu̱ yä ofrenda bi mhändabi yä israelita dä uni, bi ꞌñudi hanja mꞌe̱fa rä Zi Dada Jeoba go ma xä ofresese̱ nꞌa rä däta ofrenda näꞌä mänꞌa xa ja ndunthi rä muui pa njabu̱ dä za dä ñäni gatꞌho yä jäꞌi de rä pekado ꞌne rä du. Rä Zi Dada Jeoba bi mändabi nuꞌu̱ yä profeta dä yꞌofo ge näꞌä toꞌo ma xä me̱hni —o sea näꞌä rä Tꞌu̱ xa di mädi— pa xä ñäni yä jäꞌi de rä pekado ꞌne rä du, pe̱ꞌtsi te ma xä sufri ꞌne ma xä tho. Ora ma xä tho, ma xä zo̱ho̱ xä nja ngu nꞌa rä zi de̱ti näꞌä mi ofrese nꞌa rä israelita ꞌne mi uni de gä ofrenda (Is. 53:​1-12). Hñudi gi ntso̱ꞌmi te di signifika näꞌä bi me̱fi rä Zi Dada Jeoba: ¡Näꞌä bi mꞌu̱i dispuesto dä me̱hni rä Tꞌu̱ pa dä ñäni gatꞌho yä jäꞌi de rä pekado ꞌne rä du! Hää, ¡rä Zi Dada Jeoba bi ntrega rä tꞌu̱ po geꞌi ꞌnehe!

¿TE BI ME̱FI RÄ HESU PA BI ÑÄNI YÄ JÄꞌI DE RÄ PEKADO ꞌNE DE RÄ DU?

9. ¿Te bi mää Juan el Bautista? (Hebreos 9:22; 10:​1-4, 12).

⁹ Po rä je̱ya 29 e.c., ora Juan el Bautista bi hyandi rä Hesu, näꞌä bi ꞌñembäbi yä jäꞌi: «¡Hyanthu̱! Gehni xpä me̱hni Äjuä ngu nꞌa rä zi de̱ti näꞌä di tꞌuni de gä ofrenda pa dä hñäkuäbi yä pekado yä mexiꞌmhai» (Juan 1:​29, TNM). Njabu̱ Juan el Bautista bi ꞌñudi ge rä Hesu mi geꞌä näꞌä xki promete Äjuä dä me̱hni. Hänge rä Hesu go geꞌä ma xä sufri ꞌne ma xä uni rä bida ngu nꞌa rä ofrenda po gekhu̱. Njabu̱, gatꞌho yä jäꞌi ma xä za xä däpäbi rä pekado ꞌne rä du (hñeti Hebreos 9:​22, TNM; 10:​1-4, 12, TNM).

10. ¿Hanja bi ꞌñudi rä Hesu ge bä ehe ha rä Xiꞌmhai po nuꞌu̱ yä yꞌo̱tꞌä tsꞌoki?

¹⁰ Rä Hesu mänꞌa xa bi durämu̱i po nuꞌu̱ yä zi jäꞌi xa mäjuäni mi arrepenti ꞌne mi sufri po nuꞌu̱ yä pekado xki yꞌo̱tꞌe. Hänge bi mbitabi dä de̱ni ꞌne dä bädi de geꞌä. Rä Hesu mi pädi xä ñho ge gatꞌho nuꞌu̱ yä sufrimiento di ñhandui yä mexiꞌmhai, xpä ꞌñehe de näꞌä rä pekado bi zogägihu̱ Adán ꞌne Eva. Po geꞌä, en lugar xä do̱ꞌmi ge nuꞌu̱ yä yꞌo̱tꞌä tsꞌoki xä ꞌñehe dä zu̱di rä Hesu, rä Hesu go geꞌä mi pa mi tsu̱di nuꞌu̱ yä zi jäꞌi. Rä Hesu bi ꞌñenä: «Nuꞌu̱ ja yä nzaki hindi japäbi mꞌe̱di nꞌa rä mediko, pe nuꞌu̱ di hñeni hää». ꞌNehe bi ꞌñenä: «Hindä ehe pa gä honi yä hojäꞌi, sino pa gä honi nuꞌu̱ yä yꞌo̱tꞌä tsꞌoki» (Mat. 9:​12, 13, TNM). ꞌNe geꞌä bi me̱fi. Por ejemplo nꞌa rä pa, nꞌa rä ꞌme̱hñä näꞌä mi fädi ge mrä yꞌo̱tꞌä tsꞌoki bi ma bä tsu̱di rä Hesu ꞌne ko yä gida bi xu̱kuäbi yä ua. ¿Te bi me̱fi rä Hesu? Bi zofo ko ndunthi rä ñhojäꞌi ꞌne bi pumbäbi yä pekado (Luc. 7:​37-50). Mä nꞌa rä pa, ha nꞌa rä poso rä Hesu bi nthe̱ui nꞌa rä ꞌme̱hñä näꞌä mrä mengu Samaria. Mäske rä Hesu mi pädi ge nunä ꞌme̱hñä mi tsitsꞌi nꞌa rä mꞌu̱i näꞌä hingi tꞌaxi, näꞌä bi xipäbi directamente ge mi geꞌä rä Mesías (Juan 4:​7, 17-19, 25, 26). ¿Te mä nꞌa bi me̱fi rä Hesu pa bi ꞌñudi ge näꞌä pe̱ꞌtsi rä tsꞌe̱di pa dä däpäbi näꞌä rä pekado bi zogägihu̱ Adán ꞌne Eva? Rä Zi Dada Jeoba bi umbäbi rä tsꞌe̱di ꞌne rä autorida pa bi gu̱tsꞌi de rä du rꞌa yä jäꞌi, tanto yä ñꞌo̱ho̱, yä ꞌme̱hñä ꞌne yä zi bätsi (Mat. 11:5).

11. ¿Por hanja nuꞌu̱ yä yꞌo̱tꞌä tsꞌoki himi tsu dä uatꞌi rä Hesu?

¹¹ Asta nuꞌu̱ yä jäꞌi xki yꞌo̱tꞌe yä däta pekado, himi tsu dä uatꞌi rä Hesu. ¿Por hanja? Ngeꞌä rä Hesu mi trata nuꞌu̱ yä zi jäꞌi ko rä mhäte ꞌne rä nhuekäte (Luc. 15:​1, 2). ꞌNehe mi felisita yä zi jäꞌi ora mi pe̱fi näꞌä xä ñho ꞌne mi jäpi po näꞌä rä jamfri mi udiꞌu̱ po geꞌä (Luc. 19:​1-10). Gatꞌho näꞌä bi me̱fi rä Hesu, bi ꞌñudi xä ñho hängu di huegägihu̱ rä Zi Dada Jeoba (Juan 14:9). Hää, näꞌä bi mää ꞌne näꞌä bi me̱fi rä Hesu, bi ꞌñudi xä ñho hängu di mäkägihu̱ rä Zi Dada Jeoba ꞌne ge xa ne dä maxkägihu̱ pa gä täpäbihu̱ rä pekado. ¿Te bi senti nuꞌu̱ yä zi jäꞌi myä yꞌo̱tꞌä tsꞌoki ora rä Hesu mi trata ko rä ñhojäꞌi ꞌne rä nhuekäte? Nuyu̱ bi ne bi paatä yä mꞌu̱i ꞌne bi desidi bi de̱ni (Luc. 5:​27, 28).

12. ¿Te mi pädi xä ñho rä Hesu?

¹² Rä Hesu mi pädi xä ñho ge mi pe̱ꞌtsi te xä ntrega rä bida. Ndunthi yä mꞌiki bi xipäbi nuꞌu̱ yä de̱ni ge ma xä mꞌu̱i toꞌo ma xä traisionä ꞌnepu̱ ma xä tho. Hää, ma xä tsꞌu̱ti ha nꞌa rä zaa ngu nꞌa rä yꞌo̱tꞌä tsꞌoki (Mat. 17:22; 20:​18, 19). Pe rä Hesu ꞌnehe mi pädi xä ñho ge ko näꞌä rä bida ma xä uni, ma xä hñäki näꞌä rä pekado bi zogägihu̱ Adán ꞌne Eva ja ngu xki mää Juan el Bautista ꞌne märꞌa yä profeta. Rä Hesu ꞌnehe bi mää ge mꞌe̱fa de xä tho ndunthi yä jäꞌi ma xä zo̱ho̱ xä jamfri (Juan 12:32). Toꞌo xä me̱ꞌspäbi rä jamfri rä Hesu ꞌne xä de̱mbäbi yä paso, nubye̱ ma xä za xä me̱ꞌtsi nꞌa rä hogä ntsitsꞌi ko rä Zi Dada Jeoba ꞌne nubye̱ hää ma xä za xä kꞌotꞌi de rä pekado (Rom. 6:​14, 18, 22; Juan 8:32). Pe pa geꞌä, rä Hesu pe̱ꞌtsi te bi mbaliente ꞌne bi mꞌu̱i dispuesto dä sufri ꞌne bi ntrega rä bida (Juan 10:​17, 18).

13. ¿Te bi tꞌo̱ꞌtuäbi rä Hesu ꞌne por hanja rä Zi Dada Jeoba bi hye̱gi dä thogi njabu̱ rä Tꞌu̱? (Hyandi ꞌnehe yä kꞌoi).

¹³ Mismo nꞌa de nuꞌu̱ yä amigo rä Hesu bi traisionä ꞌne njabu̱ nuꞌu̱ yä nkontra bi zitsꞌi pa bri kondenä, bi sipäbi ndunthi yä tsꞌone, bri ju̱ꞌtsuäbi yä nkꞌuamba ꞌne bri nhaꞌmpäbi. Pa ri uadi, rꞌa yä soldado bi gu̱u̱ ꞌne bi to̱ꞌmi ha nꞌa rä zaa ko yä klabo. Pe rä Hesu bi uanta gatꞌho näꞌä bi tꞌo̱ꞌtuäbi. Hinte mä duda ja ge rä Zi Dada Jeoba xa bi u̱ rä mfeni ꞌne rä koraso mi hyandi gatꞌho näꞌä bi tꞌo̱ꞌtuäbi rä Tꞌu̱. Pe mäske xa mi mädi rä Tꞌu̱ ꞌne di pädihu̱ ge näꞌä pe̱ꞌtsi gatꞌho rä tsꞌe̱di, bi desidi hindä ebita gatꞌho näꞌä rä sufrimiento bi thogi rä Hesu. ¿Por hanja? Po näꞌä rä mhäte pe̱skägihu̱. Mismo rä Hesu bi ꞌñenä de rä Dada: «Ngeꞌä Äjuä xi bi mädi gatꞌho yä jäꞌi, hänge bä pe̱hnä rä rꞌa Tꞌu̱, pa gatꞌho toꞌo dä me̱ꞌspäbi rä jamfri, hindä mꞌe̱di ꞌne dä me̱ꞌtsä rä te pa nzäntho» (Juan 3:16).

14. ¿Te gi senti ora gi handi näꞌä bi me̱fi rä Zi Dada Jeoba po geꞌi?

¹⁴ Näꞌä rä bida bi ntrega rä Hesu, utkägihu̱ hängu di mäkägihu̱ rä Zi Dada Jeoba mäske dä mꞌu̱ihu̱ ko rä pekado. Hää, rä Zi Dada Jeoba ne gi pädi ge Näꞌä bi mꞌu̱i dispuesto bi me̱hni rä Tꞌu̱ pa bi sufri ꞌne bi ntrega rä bida pa bi ñäñꞌäꞌi de rä pekado ꞌne de rä du. ¿Te gi senti ora gi handi hängu di mäꞌi ꞌnehe rä Zi Dada Jeoba? (1 Juan 4:​9, 10). Po näꞌä rä mhäte pe̱ꞌskägihu̱ rä Zi Dada Jeoba, hingi he̱gäse̱hu̱ sino ke ꞌnehe ꞌmu̱i dispuesto dä maxkägihu̱ kada nꞌa de gekhu̱ pa gä ntsauihu̱ rä pekado ꞌne gä täpäbihu̱.

15. ¿Te mähyoni gä pe̱fihu̱ pa gä benefisiahu̱ de näꞌä rä regalo xä rꞌakägihu̱ rä Zi Dada Jeoba?

¹⁵ Näꞌä rä bida bi ntrega Ñhesukristo, geꞌä mänꞌa rä däta regalo xä rꞌakägihu̱ rä Zi Dada Jeoba ngeꞌä kongehnä dä za drä punꞌgägihu̱ mä pekadohu̱. Pe mähyoni gä udihu̱ ge di balorahu̱ nunä regalo ꞌne hindi debe gä pontꞌätho mä yꞌe̱hu̱. Tanto Juan el Bautista ngu Ñhesukristo bi mää te di debe gä pe̱fihu̱ kada nꞌa de gekhu̱. Nuꞌu̱ bi ꞌñenä: «Arrepentihu̱, ngeꞌä rä Tsꞌu̱tꞌhui de mähetsꞌi ya ꞌmu̱i getbu̱» (Mat. 3:​1, 2, TNM; 4:​17, TNM). Po geꞌä mu̱ xa mäjuäni di ne gä täpäbihu̱ rä pekado ꞌne gä kuatꞌihu̱ rä Zi Dada Jeoba, mähyoni gä arrepentihu̱. ¿Pe te di signifika gä arrepentihu̱ ꞌne hanja geꞌä ma dä maxkägihu̱ pa gä johyabihu̱ rä koraso rä Zi Dada Jeoba mäske xtä mꞌu̱ihu̱ ko rä pekado? Ha näꞌä rä ntꞌudi xä ꞌñepu̱ ma gä pädihu̱.