Nuꞌu̱ yä ntꞌani o̱tꞌe rꞌa yä jäꞌi

Nuꞌmu̱ rä Hesu bi muntsꞌi yä apostol ꞌne bi ja näꞌä rä Mäkä Ntꞌoxi, ¿habu̱ mi yꞌo nuꞌu̱ 70 yä de̱ni xki me̱hni änte pa dä predika? ¿Hage ya xki hye̱gi de dä de̱ni rä Hesu?

Koꞌmu̱ ha näꞌä Mäkä Ntꞌoxi himbi ntini nuꞌu̱ 70 yä de̱ni rä Hesu, hingä po geꞌä ma gä mbenihu̱ ge nuꞌu̱ ya xki zopu̱ rä Hesu. Sino ke näꞌä xuiꞌä, rä Hesu bi ne bi muntsꞌi ho̱nse̱ ko nuꞌu̱ yä apostol.

Rä Hesu mi mädi tanto nuꞌu̱ 12 yä apostol ngu nuꞌu̱ mä 70 yä de̱ni. Ma gä benihu̱ ge de gatꞌho nuꞌu̱ yä de̱ni, bi huahni ho̱nse̱ 12 nuꞌu̱ bi ꞌñembäbi yä apostol (Luc. 6:​12-16). Rä Hesu mi yꞌo ha Galilea nuꞌmu̱ «bi muntsꞌä nuꞌu̱ rꞌe̱tꞌa mä yoho» yä apostol ꞌne «bi me̱hni ndä xipä rä Tsꞌu̱tꞌhui Äjuä yä jäꞌi, ꞌne ndä o̱thebi yä ñheni» (Luc. 9:​1-6, Ár ꞌRaꞌyo Nkohi Jö). Mꞌe̱fa, rä Hesu «bi huahnä mä hñuꞌrate ꞌne rꞌe̱tꞌa yä nxadi pa bi me̱hni de gä yoho» (Luc. 9:51; 10:1). Ha nuꞌu̱ yä luga habu̱ mi tꞌungä ntꞌo̱de nuꞌu̱ yä hogä notisia, mi ꞌmu̱hni ꞌnehe nuꞌu̱ yä de̱ni rä Hesu.

Nuꞌu̱ yä judío mi desidi dä de̱ni rä Hesu, mi sigi mi o̱tꞌe rä ngo de rä Pascua tatꞌä je̱ya ko yä familia (Éx. 12:​6-11, 17-20). Ya himi ꞌme̱di ndunthi pa xä tho rä Hesu, näꞌä bi ma ko yä apostol pa Jerusalén. Mäske mi ꞌmu̱i yä de̱ni ha Judea, Galilea ꞌne Perea, rä Hesu himbi yꞌapäbi ge xä muntsꞌi kongeꞌä pa xä yꞌo̱tꞌe mähye̱gi rä ngo de rä Pascua. Po̱de näꞌä xuiꞌä, rä Hesu mi ne xä muntsꞌi ho̱nse̱ ko nuꞌu̱ 12 yä apostol. Rä Mäkä Tꞌofo udi ge rä Hesu bi ꞌñembäbi nuꞌu̱ yä apostol: «¡Xi stä ne gä tsihu̱ mähye̱gi rä ntꞌoxi de rä Pascua ngu di ꞌmu̱hu̱bye̱, änte dä zo̱ rä ora gä tu!» (Luc. 22:15).

¿Por hanja rä Hesu bi ne bi muntsꞌi ho̱nse̱ ko nuꞌu̱ yä apostol? Ngeꞌä rä Hesu ya mäntꞌä ma xä tho «ngu nꞌa rä zi de̱ti näꞌä di tꞌuni de gä ofrenda pa dä hñäkuäbi yä pekado yä mexiꞌmhai» (Juan 1:​29, TNM). Mäyaꞌmu̱, ha Jerusalén —habu̱ bi tho rä Hesu— yä israelita ja gehni mi ho nuꞌu̱ yä mboꞌni de gä ofrenda pa rä Zi Dada Jeoba. ꞌNehe tatꞌä je̱ya yä israelita mi o̱tꞌe rä Pascua habu̱ kada nꞌa rä familia mi muntsꞌi pa dä hyo ꞌne dä zi nꞌa rä zi tꞌu̱kä de̱ti, pa njabu̱ mi beni hanja rä Zi Dada Jeoba xki ñäni ꞌne xki gu̱ki de rä dähni Egipto. Pe nubye̱ näꞌä rä bida bi uni rä Hesu ma xä logra mä ndunthi, ngeꞌä kongehnä bi ñäni gatꞌho yä jäꞌi de rä pekado ꞌne rä du (1 Cor. 5:​7, 8). Ko näꞌä rä bida bi uni rä Hesu, mꞌe̱tꞌo bi logra ge nuꞌu̱ 12 yä apostol bi gohi de gä simiento pa näꞌä rä mhuntsꞌi bi zoogi de nuꞌu̱ xa mäjuäni yä de̱ni (Efes. 2:​20-22). Dende geꞌmu̱, rä mäkä hnini rä Zi Dada Jeoba bi me̱ꞌtsibye̱ de gä simiento nuꞌu̱ «rꞌe̱tꞌa mä yoho yä mu̱di do», ꞌne ha kada nꞌa de nuya yä do ja bi «tꞌofoni yä thuhu nuꞌu̱ rꞌe̱tꞌa mä yoho yä apostol rä Tꞌu̱kä De̱ti» (Apoc. 21:​10-14). Hää, nuꞌu̱ yä apostol rä Hesu bi thahni pa dä kumpli näꞌä ma dä me̱fi Äjuä ko yä jäꞌi ꞌne rä Xiꞌmhai. Po geꞌä rä Hesu bi muntsꞌi ho̱nse̱ nuꞌu̱ yä apostol pa bi yꞌo̱tꞌe rä Pascua ꞌne näꞌä rä mu̱di Mäkä Ntꞌoxi.

Nuꞌu̱ 70 ꞌne gatꞌho nuꞌu̱ märꞌa yä de̱ni rä Hesu, himbi ntini ha näꞌä rä mu̱di Mäkä Ntꞌoxi bi ja rä Hesu ko yä apostol. Pe mäske njabu̱, mu̱ nuꞌu̱ xä sigi xä ñꞌo mänjuäntho ha rä hnini rä Zi Dada Jeoba, ꞌnehe ma xä benefisia de näꞌä Mäkä Ntꞌoxiꞌä. ¿Por hanja? Ngeꞌä ko rä tiempo, gatꞌho nuꞌu̱ ma xä thahni pa dä ma ha mähetsꞌi, nuꞌu̱ ꞌnehe ma xä benefisia de näꞌä rä kohi o pacto bi ja rä Hesu ko nuꞌu̱ yä apostol ha näꞌä xuiꞌä (Luc. 22:​29, 30).