¿Gi beni?

¿Xkä heti gatꞌho nuꞌu̱ yä revista Yꞌo̱dehu̱ bi bo̱ni nunä je̱ya? Hyandi mu̱ dä za gi thädi nuya yä ntꞌani:

¿Te mä hogä ejemplo uni rä Zi Dada Jeoba de hanja di trata yä ꞌme̱hñä?

Rä Zi Dada Jeoba di trata mähye̱gi tanto yä ñꞌo̱ho̱ ngu yä ꞌme̱hñä. O̱de ora xatuäbi, di jamäsu te di senti ꞌne te tupäbiyämu̱i. ꞌNehe, rä Zi Dada Jeoba pe̱ꞌtsuäbi rä komfiansa yä ꞌme̱hñä ge nuyu̱ hää tsa dä kumpli näꞌä xä nkargobi dä me̱fi (w24.01, yä nxii 15 ꞌne 16).

¿Hanja dä za gä pe̱fihu̱ näꞌä mää Efesios 5:7 habu̱ enä: «Nuꞌähu̱ ogi ntsixu̱ ko nuꞌu̱ pe̱fi nuya yä tsꞌoki»?

Rä apostol Pablo bi mända ge hingä ntsixu̱ ko nuꞌu̱ yä jäꞌi hingi o̱te yä mhända rä Zi Dada Jeoba, ngeꞌä nuyu̱ ho̱nse̱ ma dä japi mänꞌa xä ñhei gä pe̱päbihu̱ rä bolunta rä Zi Dada Jeoba. Nunä tsꞌofo ꞌnehe ri bo̱ni ge di debe gä jamäsuhu̱ tanto näꞌä di o̱dehu̱ ngu näꞌä di handihu̱ (w24.03, yä nxii 22 ꞌne 23).

¿Ngu te mä kuento hindi debe gä o̱dehu̱?

Mu̱ nꞌa mä amigohu̱ te dä metkägihu̱ pe hindi pädihu̱ mu̱ mäjuäni, mänꞌa dä hogi hingä o̱dehu̱ nixi gä xipäbihu̱ märꞌaa. O mu̱ nꞌa rä jäꞌi näꞌä hindi konosehu̱ ꞌne te dä me̱nkägihu̱ ha mä correohu̱ o ha mä telefonohu̱, hindi debe gä xokihu̱ o gä hetihu̱. ꞌNehe hindi debe gä ñähu̱ ko nuꞌu̱ yä jäꞌi ꞌñenä xa mäjuäni ne dä bädi de Äjuä, pe nuꞌu̱ ho̱nse̱ ne dä ñä kongekhu̱ pa dä xikägihu̱ yä kꞌuamba de rä Zi Dada Jeoba, de rä hnini ꞌne de yä ku (w24.04, rä nxii 12).

¿Te hindi pädihu̱ ꞌne te hää di pädihu̱ de hanja Jeoba ma dä juzga rä rey Salomón, nuꞌu̱ yä jäꞌi bi du ha Sodoma ꞌne Gomorra, ꞌne nuꞌu̱ bi du ha rä Diluvio?

Hindi pädihu̱ mu̱ rä Zi Dada Jeoba ya bi huati pa nzäntho nuꞌu̱ yä jäꞌiꞌu̱. Pe hää di pädihu̱ ge Jeoba bi hyandi te mi ja mbo ha yä koraso nuꞌu̱ yä jäꞌi. ꞌNehe di pädihu̱ ge Jeoba udi rä justisia ꞌne rä nhuekäte (w24.05, yä nxii 3 ꞌne 4).

¿Por hanja rä Zi Dada Jeoba tꞌembäbi «mä Däta Ndo̱dohu̱» ꞌne te dä za gä pädihu̱ de geꞌä? (Deut. 32:4).

Ngeꞌä Jeoba näꞌä nꞌa rä ntaki habu̱ dä za gä nkuatꞌihu̱, ꞌne dä za gä pe̱ꞌtsuäbihu̱ rä komfiansa ge hää ma dä kumpli gatꞌho näꞌä xä promete. ꞌNehe, Jeoba tꞌembäbi «mä Däta Ndo̱dohu̱» ngeꞌä hindi mpadi rä mꞌu̱i nixi näꞌä xä prometegihu̱ (w24.06, yä nxii 26-28).

¿Te ma dä maxkägihu̱ pa mäntꞌä gä nzäihu̱ mu̱ gä mponihu̱ de gä mhuntsꞌi?

Mähyoni gä pe̱ꞌtsuäbihu̱ rä komfiansa rä Zi Dada Jeoba ge ja ngu bi matsꞌi yä amigo mäyaꞌmu̱, ꞌnehe ma dä maxkägihu̱. ꞌNehe mähyoni hingä komparahu̱ näꞌä rä mhuntsꞌi habu̱ ndi ntinihu̱ mä mꞌe̱tꞌo ko näꞌä rä mhuntsꞌi habu̱ dä tso̱nihu̱. Dä hogi gä o̱thu̱ ntsꞌe̱di po gä mfaxtehu̱ ko nuꞌu̱ yä ꞌme̱fi ja ha rä mhuntsꞌi ꞌne gä o̱thu̱ ntsꞌe̱di po gä konosehu̱ yä ku ꞌne gä o̱thu̱ mä amigohu̱ (w24.07, yä nxii 26-28).

¿Te utkägihu̱ nuꞌu̱ hñuu yä kꞌoi pede rä mfistꞌofo Mateo rä capítulo 25?

Näꞌä rä kꞌoi de «yä de̱ti ꞌne yä tꞌäxi», utkägihu̱ ge di debe gä sigihu̱ gä ze̱tihu̱ ꞌne hingä fayabihu̱ rä Zi Dada Jeoba. Näꞌä rä kꞌoi de nuꞌu̱ «rꞌe̱tꞌa yä nxutsi» utkägihu̱ ge xa mähyoni gä udihu̱ hyaxtho ge xtä ñhokihu̱ ꞌne ge di to̱ꞌmihu̱ näꞌä rä pa habu̱ rä Hesu ma dä huati nuꞌu̱ yä tsꞌo tꞌo̱tꞌe di nheki ha rä xiꞌmhai. ꞌNe näꞌä rä kꞌoi habu̱ pede de «nꞌa rä hmuu bi nkargobi yä ꞌme̱go dä supäbi rä bojä», utkägihu̱ ge hingä ndähñehu̱ ꞌne xa gä o̱thu̱ ntsꞌe̱di po gä pe̱päbihu̱ rä Zi Dada Jeoba asta xti zo̱ho̱ rä fin (w24.09, yä nxii 20-24).

¿Hängu rä ñhetsꞌi mi pe̱ꞌtsi nuꞌu̱ yä jädo de rä goxthi de rä templo Salomón?

Rꞌa yä tꞌofo de mäyaꞌmu̱, ha rä 2 Crónicas 3:4 hutsꞌi ge mi pe̱ꞌtsi «120 codo» rä ñhetsꞌi. Geꞌä ri bo̱ni 53 yä metro rä ñhetsꞌi (175 pies). Pe märꞌa yä tꞌofo de mäyaꞌmu̱ udi ge mi pe̱ꞌtsi «20 codo», ꞌne mi geꞌä 9 yä metro rä ñhetsꞌi (30 pies). Nunä gäxä tꞌe̱ni mänꞌa di nthe̱e̱ ko näꞌä rä nxidi mi pe̱ꞌtsi nuꞌu̱ yä jädo de näꞌä temploꞌä (w24.10, rä nxii 31).

¿Te ri bo̱ni ora rä Mäkä Tꞌofo enä ge yä siervo ministerial «debe dä me̱ꞌtsi nꞌadä rä ꞌme̱hñä»? (1 Tim. 3:​12, TNM).

Yä siervo ministerial nuꞌu̱ xä nthäti, debe dä me̱ꞌtsä ho̱nse̱ nꞌadä rä ꞌme̱hñä. Nunka di debe dä mꞌe̱ngui nꞌa rä ꞌme̱hñä näꞌä hinxä nthätui nixi debe dä koketeabi o dä xaxi märꞌa yä ꞌme̱hñä (w24.11, rä nxii 19).

¿Por hanja näꞌä bi mää rä Hesu ha Juan 6:53 di nꞌañꞌo ko gatꞌho näꞌä bi thogi nuꞌmu̱ bi ja rä Mäkä Ntꞌoxi?

Ha Juan 6:​53, rä Hesu bi mää ge xa mähyoni dä tsꞌipäbi rä ngo̱ ꞌne rä ji. Nuya yä noya bi xipäbi yä judío ha Galilea po rä je̱ya 32. Nuꞌu̱ yä judío himi pe̱ꞌtsuäbi rä jamfri rä Hesu. Pe mi thogi nꞌa nje̱ya, nuꞌmu̱ rä Hesu bi ja rä Mäkä Ntꞌoxi, mi ñäui ho̱nse̱ ko nuꞌu̱ ma dä mända kongeꞌä ha mähetsꞌi (w24.12, yä nxii 10 ꞌne 11).