Ma gä eꞌtsuäbihu̱ rä nsu Jeoba ꞌne gä nsundabihu̱ rä thuhu

1. ¿Te pe̱fi ndunthi yä jäꞌi mäpaya?

¿XKÄ handi ge mäpaya ndunthi yä jäꞌi di nsuse̱ ꞌne tuyämu̱i po geꞌu̱se̱ ke po märꞌaa? Por ejemplo, ndunthi yä jäꞌi usa yä telefono ꞌne internet pa dä po̱ꞌtse yä kꞌoi habu̱ exä yä nsu ꞌne di mfacha näꞌä pe̱fi. ¿Pe hänge tsꞌu̱tho nuꞌu̱ yä jäꞌi eꞌtsuäbi rä nsu rä Zi Dada Jeoba? Ha nunä ntꞌudi di nxadihu̱, ma gä pädihu̱ te ri bo̱ni dä tꞌeꞌtsuäbi rä nsu rä Zi Dada Jeoba ꞌne drä nsundabi rä thuhu, ꞌne por hanja di debe gä pe̱fihu̱ njabu̱. ꞌNehe ma gä pädihu̱ te dä za gä pe̱fihu̱ pa gä eꞌtsuäbihu̱ rä nsu, ꞌne hanja mänꞌitꞌho Näꞌä mismo ma dä ꞌñudi por hanja ri ꞌñepi drä nsundabi rä thuhu ꞌne drä so̱kämbeni.

¿TE RI BO̱NI DRÄ TꞌEꞌTSUÄBI RÄ NSU RÄ ZI DADA JEOBA ꞌNE DRÄ NSUNDABI RÄ THUHU?

2. ¿Hanja bi ꞌñudi rä Zi Dada Jeoba rä nsunda ꞌne rä tsꞌe̱di ha rä tꞌo̱ho̱ Sinaí? (Hyandi ꞌnehe rä kꞌoi).

² ¿Te di signifika yä noya tꞌeꞌtsuäbi rä nsu o nsundabi rä thuhu? Ha rä Mäkä Tꞌofo udi hängu rä ndängi ꞌne hängu rä tsꞌe̱di pe̱ꞌtsi rä Zi Dada Jeoba. Geꞌä bi ꞌñudi mꞌe̱fa de bi gu̱ki yä israelita de rä dähni Egipto. Ma gä imäjinähu̱ te bi thogi: yä miyontho yä israelita bi muntsꞌi ha rä ua rä tꞌo̱ho̱ Sinaí pa dä yꞌo̱de te mä dä xipäbi rä Zi Dada Jeoba. ꞌNepu̱ nꞌa rä ꞌmo gui bi goꞌmi rä tꞌo̱ho̱. Nse̱kitho, bi nja nꞌa rä däta mbiꞌmhai ꞌne asta bi bo̱tsꞌe yä tsibi ꞌne yä ꞌmifi ha näꞌä tꞌo̱ho̱ꞌä. ꞌNehe, bi nheki yä hue̱i, bi ntꞌo̱de yä ngani ꞌne bi ntꞌo̱de toꞌo bi pixtꞌi xa ntsꞌe̱di nꞌa rä ndäni (Éx. 19:​16-18; 24:17; Sal. 68:8). ¿Dä za gi imäjinä te bi mbeni ꞌne te bi senti yä israelita mi hyandi hängu rä tsꞌe̱di pe̱ꞌtsi rä Zi Dada Jeoba?

3. ¿Hanja dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu?

³ Xi nuju̱, ¿dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu? ¡Hää dä za! ¿Pe de te mä forma? Di nsundabihu̱ rä thuhu rä Zi Dada Jeoba ora di petehu̱ märꞌa yä zi jäꞌi gatꞌho näꞌä xä me̱fi ꞌne nuꞌu̱ yä hogä mꞌu̱i pe̱ꞌtsi. ꞌNehe, di nsundabihu̱ rä thuhu rä Zi Dada Jeoba ora di rekonosehu̱ ge gatꞌho näꞌä xtä lograhu̱, xtä lograhu̱ ko rä mfatsꞌiꞌä (Is. 26:12). Rä rey David nzäntho mi ho dä ꞌñeꞌtsuäbi rä nsu rä Zi Dada Jeoba ꞌne dä nsundabi rä thuhu. Nꞌa rä pa, bi ja nꞌa rä sadi ndelante de rä hnini Israel ꞌne bi ꞌñembäbi rä Zi Dada Jeoba: «Oh Jeoba, go ri me̱ti gatꞌho rä nsu ꞌne rä tsꞌe̱di ꞌne rä nsunda ꞌne rä autorida. Ngeꞌä gatꞌho näꞌä ja ha mähetsꞌi ꞌne ha rä xiꞌmhai go ri me̱ti». Mi uadi rä rey David bi ja nunä sadi, «gatꞌho rä mhuntsꞌi bi nsunda Jeoba» (1 Crón. 29:​11, 20).

4. ¿Te mi pe̱fi rä Hesu pa mi eꞌtsuäbi rä nsu rä Zi Dada Jeoba?

⁴ Mi mꞌu̱kua rä Hesu ha rä Xiꞌmhai, nzäntho bi ꞌñeꞌtsuäbi rä nsu rä Zi Dada Jeoba. Por ejemplo, nzäntho bi rekonose ge nuꞌu̱ yä milagro mi ja, mi ja ngeꞌä rä Zi Dada Jeoba go geꞌä mi umbäbi rä tsꞌe̱di (Mar. 5:​18-20). Rä Hesu ꞌnehe bi ꞌñeꞌtsuäbi rä nsu rä Zi Dada Jeoba ꞌne bi nsundabi rä thuhu po näꞌä rä modo hanja mi ñä de Geꞌä ꞌne hanja mi trata märꞌaa. Nꞌa rä pa, rä Hesu mi udi rä Noya Äjuä. Ha näꞌä lugaꞌä, xki ntini nꞌa rä zi ꞌme̱hñä näꞌä ya mi o̱tꞌe 18 nje̱ya de xki yu̱tꞌi nꞌa rä u̱xjua ha rä ndoyꞌo. Näꞌä u̱xjuaꞌä, xki japäbi dä nkꞌoxtha ꞌne himi tsa dä huäni rä ndoyꞌo. ¡Xa mi sufri nunä zi ꞌme̱hñä! Mi da ngue̱nda rä Hesu näꞌä mi thogi näꞌä zi ꞌme̱hñä, xa bi hueki ꞌne bi ne bi matsꞌi. Ko ndunthi rä mhäte bi ꞌñembäbi: «Ñäni de ri hñeni». ꞌNepu̱, bi hñuxä rä yꞌe̱ ha näꞌä zi ꞌme̱hñä, ꞌne näꞌä «oraꞌä ꞌmestho bi za bi huängä rä ndoyꞌo xä ñho, ꞌne bi mu̱di bi xo̱kämbeni Äjuä» (Luc. 13:​10-13). Näꞌä zi ꞌme̱hñä xa bi jamädibi rä Zi Dada Jeoba ꞌne bi nsundabi rä thuhu.

XI NUJU̱, ¿POR HANJA DI DEBE GÄ EꞌTSUÄBIHU̱ RÄ NSU RÄ ZI DADA JEOBA ꞌNE GÄ NSUNDABIHU̱ RÄ THUHU?

5. ¿Por hanja ri ꞌñepäbi rä Zi Dada Jeoba gä pe̱ꞌtsuäbihu̱ rä tꞌekꞌei?

⁵ Ngeꞌä xa di pe̱ꞌtsuäbihu̱ rä tꞌekꞌei. Nuju̱ di pe̱ꞌtsuäbihu̱ ndunthi rä tꞌekꞌei rä Zi Dada Jeoba ngeꞌä go geꞌä pe̱ꞌtsi gatꞌho rä tsꞌe̱di (Sal. 96:​4-7). ꞌNehe, go geꞌä pe̱ꞌtsi gatꞌho rä mfädi ꞌne go geꞌä bi hyoki gatꞌho yä tꞌo̱tꞌe. Rä Zi Dada Jeoba go geꞌä bi uni rä te ꞌne rꞌakägihu̱ te gä tsihu̱ (Apoc. 4:11). Rä Zi Dada Jeoba rä mhäte ꞌne nunka di fayagihu̱ (Apoc. 15:4). Gatꞌho näꞌä pe̱fi, po̱nibi xä ñho ꞌne nunka di faya ꞌne nzäntho di kumpli yä promesa (Jos. 23:14). Po geꞌä rä profeta Jeremías bi ꞌñembäbi rä Zi Dada Jeoba: «De gatꞌho nuꞌu̱ yä bämhñä ꞌmu̱i ha yä dähni ꞌne ha yä tsꞌu̱tꞌhui, joꞌo mä nꞌa ngu Nuꞌi» (Jer. 10:​6, 7). ¿Gi da ngue̱nda por hanja ri ꞌñepäbi rä Zi Dada Jeoba gä pe̱ꞌtsuäbihu̱ rä tꞌekꞌei? Pe Näꞌä hingä ho̱nse̱ ri ꞌñepäbi gä umbäbihu̱ rä tꞌekꞌei; ꞌnehe ri ꞌñepäbi xa gä mädihu̱ ko ngatꞌho mä korasohu̱.

6. ¿Por hanja xa di mädihu̱ rä Zi Dada Jeoba?

⁶ Ngeꞌä xa di mädihu̱ ko ngatꞌho mä korasohu̱. Näꞌä rä mꞌu̱i pe̱ꞌtsi rä Zi Dada Jeoba jakägihu̱ gä mädihu̱ xa ndunthi. Por ejemplo, Näꞌä xa rä hojäꞌi ꞌne udi rä nhuekäte (Sal. 103:13; Is. 49:15). Ora di sufrihu̱, rä Zi Dada Jeoba di mpo̱tꞌe ha mä lugahu̱ ꞌne senti ꞌnehe näꞌä rä u̱gi di sentihu̱ (Zac. 2:8). ꞌNehe, faxkägihu̱ gä jonihu̱ Kongeꞌä ngeꞌä ne dä yꞌo̱tꞌägihu̱ yä amigo (Sal. 25:14; Hech. 17:27). Rä Mäkä Tꞌofo udi ge rä Zi Dada Jeoba «di ndoki pa handi mähetsꞌi ꞌne rä xiꞌmhai, pa dä gu̱tsꞌi de rä fonthai yä zi hyoya» (Sal. 113:​6, 7). Gä pädihu̱ tenguꞌä rä mꞌu̱i rä Zi Dada Jeoba, geꞌä jakägihu̱ gä mädihu̱ ko ngatꞌho mä korasohu̱ (Sal. 86:12).

7. ¿Te mä oportunida di pe̱ꞌtsihu̱?

⁷ Ngeꞌä di nehu̱ ge märꞌa yä jäꞌi dä bädi Toꞌoꞌä. Ndunthi yä jäꞌi hingi pädi näꞌä mäjuäni de rä Zi Dada Jeoba. ¿Por hanja? Ngeꞌä rä Zithu go geꞌä xä goꞌtuäbi yä da ꞌne yä mfeni yä jäꞌi ꞌne xä mängä ndunthi yä nkꞌuamba de rä Zi Dada Jeoba (2 Cor. 4:4). Rä Zithu xä kombense yä jäꞌi pa dä gamfri ge Äjuä xa rä bo̱ka, ge hingi turämu̱i po gekhu̱ ꞌne xä mää ge go geꞌä tu rä tsꞌoki po gatꞌho nuꞌu̱ yä sufrimiento ja ha rä Xiꞌmhai. Pe nuju̱ di pädihu̱ xä ñho ge hingä mäjuäni. Po geꞌä, nuju̱ di pe̱ꞌtsihu̱ rä oportunida de gä xipäbihu̱ märꞌaa ge rä Zi Dada Jeoba xa rä hojäꞌi ꞌne ge xa di mäkägihu̱. Mu̱ gä pe̱fihu̱ njabu̱, ma gä eꞌtsuäbihu̱ rä nsu rä Zi Dada Jeoba ꞌne ma gä nsundabihu̱ rä thuhu (Is. 43:10). Nubye̱ ma gä handihu̱ rꞌa yä testo de rä Salmo 96, habu̱ udi hanja dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu ja ngu ri ꞌñepäbi.

¿HANJA DÄ ZA GÄ EꞌTSUÄBIHU̱ RÄ NSU RÄ ZI DADA JEOBA ꞌNE GÄ NSUNDABIHU̱ RÄ THUHU JA NGU RI ꞌÑEPÄBI?

8. ¿De te mä forma dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu? (Salmo 96:​1-3).

⁸ (Hñeti Salmo 96:​1-3). Dä za gä eꞌtsuäbi rä nsu rä Zi Dada Jeoba ꞌne gä nsundabihu̱ rä thuhu ko näꞌä di mäñhu̱ de Geꞌä. Ha nuya yä testo de nunä salmo, dri mbitagihu̱ gä «tutuäbihu̱ rä Zi Dada Jeoba», gä «nsundabihu̱ rä thuhu», gä uñhu̱ ntꞌo̱de «ge go geꞌä mä Ñäntehu̱» ꞌne gä «uñhu̱ ntꞌo̱de de geꞌä ha gatꞌho yä dähni». Nuꞌu̱ yä amigo rä Zi Dada Jeoba de mäyaꞌmu̱, ko ndunthi rä johya bi xipäbi märꞌaa toꞌo rä Zi Dada Jeoba, gatꞌho näꞌä xki me̱fi po geꞌu̱ ꞌne bi xu̱kuäbi rä thuhu (Dan. 3:​16-18; Hech. 4:29). Geꞌä dä za gä pe̱fihu̱ ꞌnehe.

9, 10. ¿Te dä za gä pädihu̱ de näꞌä bi me̱fi rä zi nju Angelina? (Hyandi ꞌnehe rä kꞌoi).

⁹ Ma gä handihu̱ te bi me̱fi nꞌa rä zi nju rä thuhu Angelinaa näꞌä bi ꞌmu̱i ha Estados Unidos. Nunä zi nju himbi ntsu ꞌne bi defendebi rä thuhu rä Zi Dada Jeoba ha rä ꞌme̱fi. Koꞌmu̱ ja penä xki tꞌumbäbi näꞌä ꞌme̱fi, bri mbitabi dä muntsꞌi ko gatꞌho nuꞌu̱ märꞌa yä me̱fi ꞌne bi tꞌembäbi dä mede nꞌa tu̱i de geꞌä pa njabu̱ drä konose. Rä zi nju Angelina bi ñhoki ko rꞌa yä foto pa bi ꞌñudi hängu rä johya mi pe̱ꞌtsi de dä me̱päbi rä Zi Dada Jeoba. Pe änte de xä tokäbi xä ñä nunä zi nju, bi tokabi dä ñä mä nꞌa rä me̱fi. Näꞌä ñꞌo̱ho̱ bi mää ge nuꞌmu̱ mi bätsi bi tꞌuti de rä Zi Dada Jeoba ꞌne xa bi burla de näꞌä di kamfrihu̱. Rä zi nju Angelina enä: «Ndi senti ge mä koraso ma xä bo̱ni. Pe mäntꞌä dä enäse̱: “¿Ma gä hopäbi toꞌo dä mängä yä nkꞌuamba de rä Zi Dada Jeoba o ma gä defendebi rä thuhu?”».

¹⁰ Mi uadi bi ñä näꞌä me̱fi, rä zi nju Angelina mäntꞌä bi xatuäbi rä Zi Dada Jeoba ꞌne ko ndunthi rä tꞌekꞌei bi ꞌñembäbi: «Nuga ꞌnehe dende ndi bätsi bi tꞌutkägi de rä Zi Dada Jeoba ꞌne asta mäpaya di sigi di pe̱päbi». Rä zi nju Angelina bi me̱ꞌtsä ndunthi rä calma ꞌne bi ꞌñuti nuꞌu̱ märꞌa yä me̱fi nuꞌu̱ yä foto mähotho habu̱ mi nheki hanja xki me̱päbi rä Zi Dada Jeoba ko ndunthi rä johya, ꞌne ko ndunthi rä tꞌekꞌei bi defende näꞌä mi kamfri (1 Ped. 3:15). Mi uadi bi ñä rä zi nju Angelina, näꞌä mä nꞌa rä me̱fi ya xki tsaya rä kue̱ ꞌne bi mää ge nuꞌmu̱ mrä bäsjäꞌi, ꞌnehe xki tꞌuti de rä Zi Dada Jeoba ꞌne ge xki senti ndunthi rä johya. Rä zi nju Angelina enä: «Rä Zi Dada Jeoba ri ꞌñepäbi gä defendebihu̱ rä thuhu. ¡Xi nꞌa rä däta nsu pa gekhu̱!». Nuju̱ ꞌnehe di pe̱ꞌtsihu̱ rä däta nsu de gä nsundabihu̱ rä thuhu rä Zi Dada Jeoba asta ora di o̱dehu̱ ge märꞌa ñä xä ntsꞌo de geꞌä o di ofende.

11. Tanto mäyaꞌmu̱ ngu mäpaya, ¿hanja di handihu̱ ge nuꞌu̱ yä amigo rä Zi Dada Jeoba xä jamäsu näꞌä mää rä Salmo 96:8?

¹¹ (Hñeti Salmo 96:8). Dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu ko nuꞌu̱ yä tꞌo̱tꞌe di pe̱ꞌtsihu̱. Nuꞌu̱ yä amigo rä Zi Dada Jeoba, nzäntho xä usa näꞌä pe̱ꞌtsi pa dä ꞌñeꞌtsuäbi rä nsu ꞌne dä nsundabi rä thuhu (Prov. 3:9). Mäyaꞌmu̱, yä israelita bi uni yä ꞌmo̱ñhä pa bi thokuäbi nꞌa rä templo rä Zi Dada Jeoba ꞌne mꞌe̱fa pa bi tꞌumbäbi rä mantenimiento ora mi ja mꞌe̱di (2 Rey. 12:​4, 5; 1 Crón. 29:​3-9). Ha yä pa nuꞌu̱ yä mu̱di kristianu, rꞌa de geꞌu̱ ꞌnehe mi usa de näꞌä mi pe̱ꞌtsi pa mi fatsꞌi rä Hesu ꞌne nuꞌu̱ yä apostol (Luc. 8:​1-3). Ha näꞌä tiempoꞌä, märꞌa yä kristianu ꞌnehe bi me̱mpäbi rä mfatsꞌi nuꞌu̱ märꞌa yä kristianu mi thogi yä däta xuñha (Hech. 11:​27-29). Mäpaya, nuju̱ ꞌnehe dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu ora di unihu̱ mä zi ꞌmo̱ñhähu̱.

12. ¿Hanja dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu ko nuꞌu̱ mä zi ꞌmo̱ñhähu̱? (Hyandi ꞌnehe rä kꞌoi).

¹² Ma gä handihu̱ hanja nuꞌu̱ mä zi ꞌmo̱ñhähu̱ di unihu̱ xä ꞌñeꞌtsuäbi rä nsu rä Zi Dada Jeoba ꞌne xä nsundabi rä thuhu. Po rä je̱ya 2020 ha rä dähni Zimbabue, bi nja nꞌa rä däta seka ꞌne nuꞌu̱ yä miyontho yä jäꞌi bi ꞌmu̱hni, xa mi tsu dä du rä thuhu. Ha nunä dähni, ꞌnehe ja bi ꞌmu̱hni nꞌa mä zi njuhu̱ rä thuhu Prisca. Mäske bi nja nunä däta seka, himbi hye̱gi de dä bo̱ni dä predika de gä mierkole ꞌne de gä mbehe. Mi zo̱ho̱ nuꞌu̱ yä pa de dä fu̱tsꞌi yä huähi yä jäꞌi, yä jäꞌi mi mpe̱fi hyaxtho pe rä zi nju Prisca mi sigi mi po̱ni mi predika nuꞌu̱ yä pa xki ꞌueke pa geꞌä. Ora mi handi njabu̱ yä jäꞌi, xa mi theni rä zi nju Prisca ꞌne mi embäbi: «Gi nuhmä ge ma gi tu rä thuhu». Pe rä zi nju mi embäbi: «Rä Zi Dada Jeoba nunka xä fayabi yä amigo». Himbi thogi ndunthi yä pa, rä hnini rä Zi Dada Jeoba bi usa nuꞌu̱ mä zi ꞌmo̱ñhähu̱ pa bi me̱mpäbi rä mfatsꞌi näꞌä mä zi njuhu̱. Rꞌa de nuꞌu̱ yä besinu himi tsa dä gamfri näꞌä mi handi ꞌne bi ꞌñembäbi: «Äjuä nunka xä fayaꞌi. ꞌNehe di ne gä pädihe de geꞌä». Yoto de nuꞌu̱ yä zi jäꞌi bi mu̱di bi ntini ha yä mhuntsꞌi.

13. ¿Hanja dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu ko näꞌä di pe̱fihu̱? (Salmo 96:9).

¹³ (Hñeti Salmo 96:9). Dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu ko näꞌä di pe̱fihu̱. Mäyaꞌmu̱, nuꞌu̱ yä majhä mi pe̱päbi rä Zi Dada Jeoba ha rä templo mi debe dä nxu̱ki pa xträ ntꞌaxi yä ndoyꞌo (Éx. 40:​30-32). Mäpaya, nuju̱ ꞌnehe di o̱thu̱ ntsꞌe̱di po gä pe̱ꞌtsihu̱ mä dutuhu̱ ꞌne mä ndoyꞌohu̱ xä ntꞌaxi. Pe ꞌnehe, xa di o̱thu̱ ntsꞌe̱di po hingä pe̱fihu̱ nuꞌu̱ yä tꞌo̱tꞌe di u̱tsa rä Zi Dada Jeoba ꞌne njabu̱ gä ꞌmu̱ihu̱ xä ntꞌaxi ante yä da (Sal. 24:​3, 4; 1 Ped. 1:​15, 16). Xa mähyoni gä tsopu̱hu̱ näꞌä rä ndäxjua mꞌu̱i ndi tsitsꞌihu̱ mä mꞌe̱tꞌo ꞌne gä he̱hu̱bu̱ nuꞌu̱ yä tꞌo̱tꞌe xä ntsꞌo ndi pe̱fihu̱, pa nubye̱ gä tsitsꞌihu̱ nꞌa rä rꞌayꞌo mꞌu̱i ja ngu di ho rä Zi Dada Jeoba. Hää, nubye̱ mähyoni gä o̱thu̱ ntsꞌe̱di po gä udihu̱ rä mfeni ꞌne rä mꞌu̱i rä Zi Dada Jeoba (Col. 3:​9, 10). Ko rä mfatsꞌi rä Zi Dada Jeoba, dä za dä paatä yä mꞌu̱i asta nuꞌu̱ yä jäꞌi xa yä bo̱ka ꞌne nuꞌu̱ tsitsꞌi nꞌa rä mꞌu̱i xä ntsꞌo.

14. ¿Te dä za gi pädi de rä esperiensia Jack? (Hyandi ꞌnehe rä kꞌoi).

¹⁴ Ma gä handihu̱ te bi thogi ko nꞌa rä ñꞌo̱ho̱ rä thuhu Jack. Koꞌmu̱ nuni jäꞌi xa mrä bo̱ka mi tꞌembäbi rä U̱xjua ꞌne xa mi tsꞌu. Koꞌmu̱ xa xki komete ndunthi yä delito, bri kondenä dä tho. Pe mentä mi to̱ꞌmi dä zo̱ho̱ näꞌä paꞌä, bi asepta dä nxadi rä Mäkä Tꞌofo ko nꞌa rä zi ku näꞌä mi tso̱ni mi predika ha rä fadi. Mäske xa xki me̱fi yä tꞌo̱tꞌe xä ntsꞌo, ko rä tiempo Jack bi paatä rä mꞌu̱i ꞌne bi nxixtehe ngu nꞌa rä testigo rä Jeoba. Jack bi zitsꞌi nꞌa rä mꞌu̱i ngu di ho rä Zi Dada Jeoba. Hänge mi zo̱ho̱ näꞌä rä pa de dä tho, asta bi nzoni rꞌa de nuꞌu̱ yä polisia mi konose. Nꞌa rä polisia näꞌä mi mända ha rä fadi, bi ꞌñenä: «Mä mꞌe̱tꞌo Jack mi nꞌa rä yꞌo fadi näꞌä xa mrä bo̱kä jäꞌi. Pe nubye̱ xa rä hojäꞌi ꞌne joꞌo mä nꞌa rä yꞌo fadi nguni». Rä hñätoꞌä, yä ku bi mengi ha rä fadi pa dä yꞌo̱tꞌe rä mhuntsꞌi ja ngu mi ja nzäntho ꞌne bi hyandi ge xki ntini nꞌa rä yꞌo fadi näꞌä nunka xki ntini änte. ¿Por hanja bi desidi bi ntinibye̱ ha nunä mhuntsꞌi? Ngeꞌä himi tsa dä gamfri hängu xki paatä rä mꞌu̱i Jack ꞌne nubye̱ mi ne dä bädi te mi debe dä me̱fi pa ꞌnehe dä xo̱kämbeni rä Zi Dada Jeoba. Ja ngu di handihu̱, dä za gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu ko näꞌä di pe̱fihu̱ (1 Ped. 2:12).

¿TE MA DÄ ME̱FI MISMO RÄ ZI DADA JEOBA PA DÄ ꞌÑEXÄ RÄ NSU ꞌNE DÄ NSUNDA RÄ THUHU?

15. ¿Te ma dä me̱fi rä Zi Dada Jeoba mänꞌitꞌho pa dä ꞌñexä rä nsu ꞌne dä nsunda rä thuhu? (Salmo 96:​10-13).

¹⁵ (Hñeti Salmo 96:​10-13). Nuya yä testo de rä Salmo 96 udi hanja rä Zi Dada Jeoba näꞌä nꞌa rä Rey näꞌä o̱tꞌe rä justisia. ¿Pe te ma dä me̱fi rä Zi Dada Jeoba pa dä ꞌñexä rä nsu ꞌne dä nsunda rä thuhu? Rä Mäkä Tꞌofo udi ge mänꞌitꞌho rä Zi Dada Jeoba ma dä huati gatꞌho yä hyate relijion, fädi ngu rä Dängä Babilonia. ¿Por hanja ma dä huati? Ngeꞌä xä ꞌñudi ndunthi yä nkꞌuamba de Geꞌä ꞌne xä mänchabi rä thuhu (Apoc. 17:​5, 16; 19:​1, 2). Rꞌa de nuꞌu̱ ma dä hyandi hanja ma dä uadi gatꞌho yä hyate relijion, tal vez näꞌä oraꞌä ma dä desidi dä xo̱kämbeni ꞌnehe rä Zi Dada Jeoba kongekhu̱. Mꞌe̱fa, rä Zi Dada Jeoba ma dä hä näꞌä rä gerra fädi ngu rä gerra de Armagedón. Ha nunä gerra, ma dä huati gatꞌho nuꞌu̱ yä tsꞌo tꞌo̱tꞌe xä me̱fi rä Zithu nuua ha rä Xiꞌmhai, ꞌne ma dä huati gatꞌho nuꞌu̱ yä jäꞌi xä mfaxui pa xä u̱tsa rä Zi Dada Jeoba ꞌne xä mängä yä nkꞌuamba de geꞌä ꞌne de rä hnini. Pe ha näꞌä gerraꞌä, rä Zi Dada Jeoba ma dä ñäni gatꞌho nuꞌu̱ yä jäꞌi xä mädi, xä yꞌo̱te yä mhända, xä ꞌñeꞌtsuäbi rä nsu ꞌne xä nsundabi rä thuhu (Mar. 8:38; 2 Tes. 1:​6-10). Mꞌe̱fa, Ñhesukristo ma dä mända po 1.000 yä je̱ya. Xti uadi nuꞌu̱ 1.000 yä je̱ya, ya hinte mä duda ma dä nja ge ho̱nse̱ rä Zi Dada Jeoba ri ꞌñepäbi dä tꞌeꞌtsuäbi rä nsu ꞌne drä nsundabi rä thuhu (Apoc. 20:​7-10). Pa näꞌä tiempoꞌä, «po gatꞌho rä xiꞌmhai ma dä nheki hanja rä Zi Dada Jeoba xä nsundatho, ꞌne näꞌä rä mfädi de Geꞌä ma dä ñuxä ha rä xiꞌmhai ja ngu nuꞌu̱ yä dehe ñuꞌtsi gatꞌho yä ndehe» (Hab. 2:14).

16. Xi nuꞌi, ¿te gi ꞌmu̱i desidido gi pe̱fi? (Hyandi ꞌnehe rä kꞌoi).

¹⁶ ¿Dä za gi imäjinä xti zo̱ho̱ näꞌä rä pa habu̱ po gatꞌho rä Xiꞌmhai, yä jäꞌi ma dä ꞌñeꞌtsuäbi rä nsu rä Zi Dada Jeoba ꞌne ma dä nsundabi rä thuhu ja ngu ri ꞌñepäbi? Mentä di to̱ꞌmihu̱ dä zo̱ho̱ näꞌä paꞌä, dä hogi ge dende nubye̱ xa gä o̱thu̱ ntsꞌe̱di po gä sigihu̱ gä eꞌtsuäbihu̱ rä nsu rä Zi Dada Jeoba ꞌne gä nsundabihu̱ rä thuhu. Pa dä benꞌgägihu̱ rä Cuerpo Gobernante nunä rä däta nsu di pe̱ꞌtsihu̱, xä huahni rä Salmo 96:8 pa geꞌä rä testo de rä je̱ya 2025. Nunä testo enä: «Umbäbihu̱ Jeoba näꞌä rä nsunda ri ꞌñepäbi dä hñäni rä thuhu».