Yä jäꞌi xa tsu po nuꞌu̱ yä balasera xä nja | ¿Te udi rä Biblia?

Durante rä zänä julio de nunä je̱ya 2022 xä nja ndunthi yä balasera ha rꞌa nꞌañꞌo yä luga de rä Xiꞌmhai.

• «Mꞌe̱fa de bi tho nꞌa de nuꞌu̱ yä politiko mänꞌa rä famoso de rä dähni Japón [rä ex primer ministro Shinzo Abe] gatꞌho yä jäꞌi de näꞌä dähniꞌä ꞌne de märꞌa yä luga xa tsu. Ha rä dähni Japón kasi nunka xki nja yä nthote, ngetꞌho yä autorida de näꞌä dähniꞌä xä proibi toꞌo dä hñä ꞌne dä usa yä arma» (10 de rä julio de rä 2022, The japan Times).

• «Ha nꞌa rä luga habu̱ ja yä dängä de̱nda de Copenhague de rä dähni Dinamarca, nꞌa rä ñꞌo̱ho̱ bi gu̱ki rä arma ꞌne bi hyo hñuu yä jäꞌi» (4 de rä julio de rä 2022, Reuters).

• «Ha nꞌa rä cantina de nꞌa rä luga rä thuhu Soweto de rä dähni Sudáfrica, rꞌa yä ñꞌo̱ho̱ bi gu̱ki yä arma ꞌne bi hyo 15 yä jäꞌi» (10 de rä julio de rä 2022, The Guardian).

• «Ha Estados Unidos, bi tho thogi de 220 yä jäꞌi durante näꞌä rä fin de semänä änte de näꞌä ngo di tꞌo̱tꞌe rä pa 4 de rä julio» (5 de rä julio de rä 2022, CBS News).

¿Ja yä raso pa gä tsuhu̱ po gatꞌho nuꞌu̱ yä nthote xä nja mäpaya? ¿Te udi rä Biblia?

¡Mänꞌitꞌho ya hingä ma dä nja yä nthote!

Rä Noya Äjuä udi ge di ꞌmu̱ihu̱ ha «yä ngätsꞌi yä pa», po rängeꞌä mänꞌa xä xu nuꞌu̱ yä bo̱ka ꞌne yä tsꞌomꞌu̱i gä jäꞌi (2 Timoteo 3:1, 3). Geꞌä xä japi ge ndunthi yä jäꞌi xa tsu (Lucas 21:11). Pe, ¿gi pädi? Äjuä di promete ge ma dä zo̱ho̱ rä pa habu̱ ma dä huati gatꞌho nuꞌu̱ yä jäꞌi hote ꞌne pe̱fi yä tsꞌo tꞌo̱tꞌe. Gatꞌho nuꞌu̱ yä bo̱ka jäꞌi ma dä mꞌe̱di pa njabu̱ dä kumpli näꞌä hutsꞌi ha Isaías 32:18, habu̱ enä: «Mä hnini pe̱ꞌtsi te dä mꞌu̱i ha nꞌa rä luga habu̱ hinte mä tuhni di ja ꞌne ma dä mꞌu̱i nsi rä ntsu ha yä luga de gä tsaya». Pe, ¿hanja ma dä japi Äjuä pa dä hñäki yä ntsꞌomꞌu̱i ꞌne yä nthote?

Äjuä ma dä hñäki yä arma ꞌne nuꞌu̱ yä tsꞌomꞌu̱i gä jäꞌi.

• «Nuꞌu̱ yä tsꞌomꞌu̱i ma dä thäki de ha rä xiꞌmhai» (Proverbios 2:22).

• «[Äjuä] ma dä hñäki yä gerra po gatꞌho rä xiꞌmhai. Näꞌä di ꞌuaki yä arko ꞌne thotsi yä lansa, ꞌne e̱ntꞌä ha rä tsibi nuꞌu̱ yä karro yä soldado» (Salmo 46:9).

Äjuä ma dä hñäki rä ntꞌu̱tsate ꞌne ma dä ꞌñuti yä jäꞌi dä mꞌu̱i en paz.

• «Hinte mä ntsꞌomꞌu̱i ma dä yꞌo̱tꞌe, nixi hinte mä dañu ma dä yꞌo̱tpäbi mä mäkä tꞌo̱ho̱; ngeꞌä gatꞌho rä xiꞌmhai, ma dä ñudi ko näꞌä rä mfädi bi ehe de Jeoba, ja ngu nuꞌu̱ yä dehe koꞌmi rä ndehe» (Isaías 11:9).

• Ya dende mäpaya, rä Zi Dada Jeoba uti yä jäꞌi de gatꞌho rä Xiꞌmhai dä mädi nꞌa ngu mänꞌaa, ja ngu hutsꞌi ha Miqueas 4:3, habu̱ enä: «Nuꞌu̱ ma dä gu̱ yä däjuai ꞌne kongeꞌu̱ ma dä hyoki yä tꞌabi, ꞌne ko nuꞌu̱ yä lansa ma dä hyoki yä tꞌe̱xi. Yä dähni hingä ma dä gu̱ yä däjuai pa dä ntuhni ko märꞌa yä dähni, nixi ya hingä ma dä bädi yä gerra».

Mu̱ gi ne gi pädi mä nꞌa tu̱i de näꞌä rä hogä mꞌu̱i ma dä hä Äjuä pa xudi ndämäni, hyandi rä artikulo «¿Es posible librarse del miedo?».

Pa gi pädi te ma dä me̱fi Äjuä pa dä hñäki yä tuhni ꞌne yä nthote, hyandi rä artikulo «¡Por fin paz en la Tierra!».