¿Por hanja hinto tsa dä hä nꞌa rä mꞌu̱i temäꞌentho ha rä Xiꞌmhai? | ¿Te udi rä Biblia?

Asta mäpaya nixi nꞌa rä jäꞌi ꞌne nixi nꞌa rä organización hinxä za xpä hä nꞌa rä mꞌu̱i temäꞌentho. Dende rä Segunda Guerra Mundial asta mäpaya, xä mꞌe̱di rä paz. Mäpaya, ngu nꞌa 2.000 yä miyon nuꞌu̱ yä jäꞌi bi ꞌmu̱i ha nuꞌu̱ yä luga habu̱ ja tuhni ꞌne yä gerra.

¿Por hanja hinto tsa dä hä nꞌa rä mꞌu̱i temäꞌentho ha rä Xiꞌmhai? ¿Te udi rä Biblia?

Hyandi ndaꞌu̱ nuꞌu̱ hñuu yä raso uni rä Biblia

1. 1. Rä Biblia udi ge ha nuya yä pa di ꞌmu̱ihu̱ «yä jäꞌi ma dä mädise̱, xi ma dä kꞌatꞌi yä bojä, xi dyä fachoso, [...] hingä ma dä kumpli näꞌä di promete, [...] hinte mä kohi ma dä ne dä ja, [...] hinte mä tsꞌofo ma dä ne dä yꞌo̱de, dyä ñꞌexmänsu» (2 Timoteo 3:2-4). Ja ngu di handihu̱, ya jäꞌi ya nixi o̱tꞌe ntsꞌe̱di po dä mfaxte pa dä nja nꞌa rä mꞌu̱i temäꞌentho.

2. 2. Yä mexiꞌmhai, hingä ma dä logra dä hä nꞌa rä mꞌu̱i temäꞌentho nsi rä mfatsꞌi Äjuä.a Rä Noya Äjuä udi ge yä mexiꞌmhai «hingo ri ꞌñepäbi dä yꞌe̱nse̱ rä paso» (Jeremías 10:23).

3. 3. Nunä rä xiꞌmhai go o ha rä yꞌe̱ nꞌa rä tsꞌomꞌu̱i gobernante. ¿Gi pädi toꞌoꞌä? Fädi ngu rä Zithu o Tsꞌondähi. Mientra nunä «rä xiꞌmhai o ha rä yꞌe̱ rä tsꞌondähi», ma dä sigi dä nja yä tuhni ꞌne yä gerra (1 Juan 5:19; Apocalipsis 12:9).

¿Se̱he̱ toꞌo ma dä za dä hä nꞌa rä mꞌu̱i temäꞌentho?

Rä Biblia udi ge se̱he̱ Äjuä ma dä za dä hä nꞌa rä mꞌu̱i temäꞌentho, hingä yä mexiꞌmhai.

• «Ngeꞌä nuga di pädi xä ñho nuꞌu̱ yä mfeni di beni pa ko nuꞌähu̱ —geꞌä mängä Jeoba—, yä mfeni de gä hogä mꞌu̱i ꞌne de gä tsaya, ꞌne hingä de gä xuñha, pa hingi hñäkihu̱ de ha ri mfenihu̱ näꞌä rä hogä mꞌu̱i ma gä häñꞌähu̱» (Jeremías 29:11).

¿Hanja ma dä kumpli Äjuä nunä promesa? Rä Biblia enä: «Äjuä näꞌä uni nꞌa rä mꞌu̱i temäꞌentho ma dä xutꞌi mänꞌitꞌho rä Zithu» (Romanos 16:20). Äjuä ma dä usa näꞌä rä Gobiernu xpä egi mähetsꞌi pa dä hä nꞌa rä mꞌu̱i temäꞌentho nuua ha rä Xiꞌmhai. Nunä Gobiernu fädi ngu rä «Tsꞌu̱tꞌhui Äjuä», ꞌne rä Rey de nunä Gobiernu geꞌä Ñhesukristo (Lucas 4:43). Xti mända rä Hesu po gatꞌho rä Xiꞌmhai, yä jäꞌi ma dä za dä ꞌmu̱i en paz ꞌne ma dä me̱ꞌtsi nꞌa rä mꞌu̱i temäꞌentho (Isaías 9:6, 7).

• Mu̱ gi ne gi pädi mä nꞌa tu̱i rä imformäsio, po rä mäte hñeti nunä artículo «¿Qué cosas logrará el Reino de Dios?».