Rä däta mhuntsꞌi regional bi bo̱ni ha rä radio ꞌne ha rä telebision

Hinto ma dä pumfri näꞌä rä däta mhuntsꞌi regional de rä je̱ya 2020. Ngeꞌä po rä mu̱di mꞌiki bi ngraba näꞌä rä programä pa gatꞌho rä Xiꞌmhai ꞌne bi thutsꞌi ha Internet. Pe kasi gatꞌho nuꞌu̱ mä kuhu̱ yä mengu Malaui ꞌne Mozambique bi za bi me̱ꞌtsi nunä däta mhuntsꞌi nsi rä Internet. ¿Hanja bi thogi?

Rä Comité de Coordinadores ꞌne rä comité de Enseñanza de rä Cuerpo Gobernante, bi uni nse̱ki pa dä tꞌe̱ntsꞌi rä däta mhuntsꞌi regional po rä radio ꞌne rä telebision pa nuꞌu̱ yä ku yä mengu Malaui ꞌne Mozambique. ¿Por hanja bi tꞌo̱tꞌe njabu̱? Ngeꞌä Malaui geꞌä nꞌa de nuꞌu̱ yä luga habu̱ mänꞌa xi xä mädi rä Internet. Hänge se̱he̱ nꞌa hängutho yä testigo rä Jeoba de näꞌä rä hniniꞌä pe̱ꞌtsi rä Internet. Rä ku William Chumbi de rä Comité de rä ngu Betel de Malaui bi ꞌñenä: «Yä ku se̱he̱ dä za dä hñäni näꞌä rä ñhuni ehe de rä Noya Äjuä po mäde de rä radio ꞌne rä telebision». Rä ku Luka Sibeko de rä Comité de rä ngu Betel de Malaui ꞌnehe bi ꞌñenä: «Nsi rä mfatsꞌi rä radio ꞌne rä telebision, se̱he̱ nꞌa hängutho yä ku de mä territoriohe xä za xä me̱ꞌtsi rä däta mhuntsꞌi regional». Geꞌä thogi ꞌnehe ha Mozambique, se̱he̱ nꞌa hängutho yä ku dä za dä dai nꞌa rä hogä celular o dä gutꞌi rä Internet.

¿Hanja bi japi nuꞌu̱ yä ku?

Po näꞌä rä pandemia de rä COVID-19, rꞌa yä estación de gä radio ya mi thoꞌtsi nuꞌu̱ yä mhuntsꞌi di pe̱ꞌtsihu̱ tatꞌä semänä.a Hänge nuꞌu̱ mä kuhu̱ bi yꞌapäbi märꞌa yä ora nuꞌu̱ yä estación de gä radio pa njabu̱ xä za xä thoꞌtsi näꞌä rä däta mhuntsꞌi regional.

Pe nuꞌu̱ mä kuhu̱ ha Malaui bi ñhandui nꞌa rä däta xuñha. Nuꞌu̱ yä estación de gä radio ꞌne yä canal de gä telebision se̱he̱ hopi yä jäꞌi dä thoꞌtsi yä programä de gä nꞌa ora, ngeꞌä tuyämu̱i ge mu̱ dä thoꞌtsi yä programä po xa ndunthi yä ora ma dä mfadabi nuꞌu̱ yä jäꞌi o̱de o handi. Pe nuꞌu̱ bi xipäbi ge näꞌä rä ꞌme̱fi di jahu̱ fatsꞌi ndunthi yä zi jäꞌi. Por ejemplo, ha nunä tiempo mäske yä jäꞌi jotꞌitho ha yä nguu, nuju̱ di umbäbihu̱ rä humu̱i de dä yꞌo̱de nuꞌu̱ yä hogä notisia hutsꞌi ha rä Mäkä Tꞌofo. Nuya yä hogä noya dä za dä matsꞌi pa dä me̱ꞌtsi nꞌa rä mꞌu̱i temäꞌentho ꞌne rä johya ha yä familia. Nuꞌmu̱ bi yꞌo̱de njabu̱ nuꞌu̱ yä dueñu de nuꞌu̱ yä estación de gä radio ꞌne de nuꞌu̱ yä canal de gä telebision, bi ne bi umbäbi mä ndunthi yä ora nuꞌu̱ yä ku.

Ha Malaui, nꞌa rä estación de gä radio ꞌne nꞌa rä canal de gä telebision bi thoꞌtsi rä däta mhuntsꞌi regional. Yä miyontho yä jäꞌi de näꞌä rä hnini o̱tsꞌe näꞌä rä estación de gä radio ꞌne handi näꞌä rä canal de gä telebision. Ha Mozambique, 85 yä estación de gä radio ꞌne nꞌa rä canal de gä telebision bi thoꞌtsi rä däta mhuntsꞌi regional.

Pa geꞌä bi ngasta 28.227 yä dolarb pa bi thoꞌtsi rä däta mhuntsꞌi regional po rä telebision ꞌne kasi 20.000 yä dolar pa bi thoꞌtsi po rä radio ha nuꞌu̱ yoho yä dähni. Nuꞌu̱ yä presio pa bi thoꞌtsi rä däta mhuntsꞌi po rä radio bi muui entre 15 ꞌne 2.777 yä dolar, depende hängu rä yabu̱ mi tso̱ni rä señal näꞌä rä estación.

Nuꞌu̱ mä kuhu̱ bi su ꞌne bi hyandi xä ñho hanja dä usa nuꞌu̱ yä donäsio. Ha Malaui, nuꞌu̱ yä estación de gä radio bi ne bi umbäbi yä hogä presio nuꞌu̱ yä ku ꞌne njabu̱ himbi kobrabi xä mädi. Nꞌa de geꞌu̱ bi käꞌmi asta 30% de näꞌä rä presio mi pe̱ꞌtsi. Njabu̱ bi orra 1.711 yä dolar. Rꞌa yä estación ha Mozambique bi käꞌmi nuꞌu̱ yä presio ngeꞌä pädi ge yä testigo rä Jeoba hingä yä hyate ꞌne di kumpli ko nuꞌu̱ yä njutꞌi.

Yä ku xa di njamädi

Mä zi kuhu̱ xa di jamädi ndunthi ngeꞌä bi za bi hyandi ha rä telebision o bi yꞌo̱tsꞌe ha rä radio näꞌä rä däta mhuntsꞌi. Patrick, nꞌa rä anciano de rä mhuntsꞌi ha Malaui, bi ꞌñenä: «Di umbäbihe rä njamädi rä Cuerpo Gobernante ngeꞌä bi za dä pe̱ꞌtsihe rä däta mhuntsꞌi regional ha nunä rä pandemia». Mä nꞌa rä ku rä mengu Malaui rä thuhu Isaac, bi ꞌñenä: «Hindi pe̱ꞌtsihe märꞌa yä aparato. Hänge xa di jamädihe ngeꞌä bi za dä o̱tsꞌehe rä däta mhuntsꞌi regional ha rä radio. ¡Xi nꞌa rä dängä regalo näꞌä bi rꞌakhe rä hnini rä Zi Dada Jeoba! Hängu di jamädihe ngeꞌä gatꞌho mä familia bi za bi yꞌo̱tsꞌe rä programä. Hinte mä duda di pe̱ꞌtsihe ge Jeoba xa di mädi rä hnini».

Nꞌa rä publicador mengu Mozambique, ha rä je̱ya 2020 geꞌä rä mu̱di däta mhuntsꞌi regional bi me̱ꞌtsi. Näꞌä bi ꞌñenä: «Gä handi rä däta mhuntsꞌi ha rä tele bi jaki dä beni ge Jeoba geꞌä rä Zi Dada pe̱ꞌtsi gatꞌho rä tsꞌe̱di. Rä pandemia himbi hñäkuäbi Jeoba de dä rꞌakägi näꞌä rä ñhuni ehe de rä Noya ꞌne bi rꞌakägi nuua ha mä nguu. Dä handi ge yä ꞌme̱go rä Zi Dada Jeoba xa di mädi ꞌne hinte mä duda di pe̱ꞌtsi ge nunä gehnä rä relijion xa mäjuäni».

Nꞌa rä anciano de nꞌa rä mhuntsꞌi rä thuhu Wyson bi ꞌñenä: «Di ne gä umbäbi njamädi rä Cuerpo Gobernante ngeꞌä xa xä sugägihe ha nunä rä pandemia. Nuje hindi pe̱ꞌtsihe ndunthi rä bojä ꞌne di ꞌmu̱ihe ha nꞌa rä luga habu̱ xa ja rä ñhoya. Pe xa di jamädihe ꞌne xa di johyahe ngeꞌä bi za dä pe̱ꞌtsihe rä däta mhuntsꞌi po rä radio ꞌne rä telebision, njabu̱ bi za dä benefisiahe ꞌne bi nupkä mä mfenihe nuꞌu̱ yä ntꞌudi Jeoba».

Rä Comité de Coordinadores ꞌne rä Comité de Enseñanza bi uni nse̱ki mänꞌaki pa njabu̱ bi za bi tꞌe̱ntsꞌi rä däta mhuntsꞌi regional de rä 2021 po rä radio ꞌne rä telebision ha rꞌa yä luga. ¿Hanja njutꞌi nuꞌu̱ yä gasto? Po mäde de nuꞌu̱ yä donäsio di tꞌuni pa rä obra mundial o de nuꞌu̱ märꞌa yä forma di tsu̱dihu̱ ha donate.jw.org. Xa di jamädihe ndunthi po nuꞌu̱ yä donäsio gi unihu̱.