Ma gä ntsitsꞌihu̱ ko rä Zi Dada Jeoba pa nzäntho

Mähyoni gä o̱tꞌehu̱ ntsꞌe̱di pa gä tinihu̱ ꞌne gä suhu̱ nꞌa rä hogä ntsitsꞌi. Ma gä hänihu̱ ndunthi yä jäpi mu̱ di o̱thu̱ ntsꞌe̱di pa gä tinihu̱ ꞌne gä suhu̱ rä hogä ntsitsꞌi Äjuä. Ñhesukristo bi ꞌñembäbi nuꞌu̱ yä jäꞌi bi gamfribi: «nuꞌmu̱ gi pädihu̱ näꞌä mäjuäni, ya hingä ma gi mꞌe̱gohu̱» (Juan 8:32). ¿Te ri bo̱ni nuya yä noya bi mää?

Mäpaya hingä ma dä ja ꞌme̱gogihu̱ nuꞌu̱ yä ntꞌudi hingä mäjuäni. Dä za gä ꞌuegehu̱ de nuꞌu̱ yä ntꞌudi hingä mäjuäni, ꞌne de nuꞌu̱ yä nkꞌuamba xä xani rä Zithu. ꞌNehe dä za gä pe̱ꞌtsihu̱ nꞌa rä humu̱i ꞌne ma gä ꞌuegehu̱ de näꞌä rä ntso̱ꞌmi pe̱ꞌtsi ndunthi yä jäꞌi nuꞌu̱ hingi pädi toꞌo rä Zi Dada Jeoba (Romanos 8:22). Jeoba xä matsꞌi nuꞌu̱ yä ntsitsꞌi pa njabu̱ dä «ꞌme̱[di] rä ntsu», hänge nuyu̱ hingi «tsu rä du» (Hebreos 2:14, 15).

Ha rä rꞌayꞌo xiꞌmhai Äjuä hinto ma dä mꞌe̱go. Nꞌa rä pa ya hinto ma dä mꞌe̱go, ¡hänguhmä nꞌa rä ñho ma gä pe̱ꞌtsihu̱! Nuꞌmu̱ sti uädri rä Xiꞌmhai, dä ñꞌotho yä dängä tuhni, yä ñheni ha nixi rä ntsꞌomꞌu̱i. Dä ñꞌotho rä ñhoya nixi rä thuhu. Dä mꞌe̱di rä ntsu, rä ñꞌeda ꞌne rä du. Ma dä nja rä tsꞌu̱tꞌhui ꞌne hinto ma dä mꞌe̱go. Rä Mäkä Tꞌofo mää: «Äjuä näꞌä bi ꞌmu̱i mähetsꞌi [...] di rꞌakägihu̱ gatꞌho yä ñho» (Santiago 1:17).

Yä ntsitsꞌi rä Zi Dada ma dä mꞌu̱i pa nzäntho. Rä te pa nzäntho, näꞌä nꞌa rä ntꞌuni mähotho ma dä uni rä Zi Dada pa nuꞌu̱ yä jäꞌi honi dä ntsitsꞌi kongeꞌä (Romanos 6:23). ¿Xkä beni te gatꞌho dä za gi pe̱fi mu̱ gi pe̱ꞌtsi nꞌa rä te pa nzäntho?

Ma dä za gä pe̱fihu̱ ndunthi yä tꞌo̱tꞌe. Rꞌaa dä ne dä bädi dä mpe̱ꞌmta, dä hyoki ꞌne dä gätꞌi yä kꞌoi o dä za dä bädi rä ꞌme̱fi yä yaxi. ꞌNehe mu̱ gä nehu̱ dä za gä nxadihu̱ te ngu yä mꞌu̱i yä mboꞌni o hanja di te yä do̱ni ꞌne yä boza. Dä za gä maha ha märꞌa yä hnini pa gä pätuähu̱ yä mꞌu̱i märꞌa yä jäꞌi. Koꞌmu̱ ma gä pe̱ꞌtsihu̱ nꞌa rä te pa nzäntho, gatꞌho gehya ma dä za gä pe̱fihu̱.

Ma dä za gä pe̱ꞌtsihu̱ ndunthi yä ntsitsꞌi. Koꞌmu̱ ma gä mꞌu̱ihu̱ pa nzäntho, ma dä za gä pädihu̱ ndunthi märꞌa yä ntsitsꞌi rä Zi Dada. Pa gä pädihu̱ te ngu yä hogä mꞌu̱i ꞌne näꞌä pädi dä me̱fi, ꞌnehe ma gä ntsitsꞌihu̱ kongeꞌu̱. Ma gä mädihu̱ ha xi neꞌu̱ ma dä mäkägihu̱ (1 Corintios 13:8). Koꞌmu̱ ma gä pe̱ꞌtsihu̱ nꞌa rä te pa nzäntho, ma dä za gä ntsitsꞌihu̱ ko yä jäꞌi de gatꞌho rä Xiꞌmhai. Pe ndaꞌä mänꞌa xi xä ñho, ngeꞌä ma dä thogi yä nthebetho nuꞌu̱ yä je̱ya ha näꞌä rä hogä ntsitsꞌi di pe̱ꞌtsihu̱ ko rä Zi Dada Jeoba mänꞌa ma dä ndängi. ¡Ma gä ntsitsꞌihu̱ ko rä Zi Dada Jeoba pa nzäntho!