¿Hanja dä za gä kuatꞌihu̱ Äjuä?

1. ¿O̱de Äjuä gatꞌho yä sadi?

Äjuä di mbitabi yä jäꞌi de gatꞌho yä rasa dä uatꞌi ꞌne dä xatuäbi (Salmo 65:2). Mäske Äjuä uni näꞌä imbitasio, näꞌä hingi thädi gatꞌho yä sadi. Jeoba hingi thädi yä sadi nꞌa ñꞌo̱ho̱ mu̱ nuni hindi trata xä ñho rä ꞌme̱hñä (1 Pedro 3:7). Mäyaꞌmu̱, Äjuä himi thädi nuꞌmu̱ yä israelita mi xatuäbi, ngeꞌä nuyu̱ mi ne mi sigi mi pe̱fi yä tsꞌo tꞌo̱tꞌe. Pe Äjuä, hää thädi nuꞌu̱ yä sadi di ja nꞌa jäꞌi, mu̱ nuni udi ge di yobri de nuꞌu̱ yä däta tsꞌoki xä me̱fi. ¿Hänge Äjuä xä rꞌakägihu̱ nꞌa däta nsu ngeꞌä di mbitagihu̱ gä xatuäbihu̱? Hñeti Isaías 1:15 ꞌne 55:7.

Hyandi rä bideo ¿O̱de Äjuä gatꞌho yä sadi?

2. ¿Hanja ri ꞌñehe gä xatuäbihu̱ Äjuä?

Pa gä xo̱kämbenihu̱ Äjuä ngu di ho, mähyoni gä xatuäbihu̱. Ho̱nse̱ rä Zi Dada Jeoba ri ꞌñepi gä xatuäbihu̱ ngeꞌä go geꞌä bi hyogägihu̱ (Mateo 4:10; 6:9). Nuju̱ di pe̱ꞌtsihu̱ rä tsꞌoki, hänge mähyoni gä xatuäbihu̱ Jeoba po mäde de rä thuhu rä Hesu, ngeꞌä rä Hesu bi uni rä te pa bi gutꞌi mä tsꞌokihu̱ (Juan 14:6). Rä Zi Dada Jeoba hingi ne gä mepye̱hu̱ nixi gä hetihu̱ ha nꞌa he̱ꞌmi nuꞌu̱ yä sadi di mäñhu̱. Jeoba di ho gä xatuäbihu̱ ꞌne gä xipäbihu̱ näꞌä po̱ni de ha mä korasohu̱. Hñeti Mateo 6:7 ꞌne Filipenses 4:6, 7.

Äjuä o̱de asta nuꞌu̱ yä sadi di jahu̱ ha mä mfenihu̱ (1 Samuel 1:12, 13). Jeoba di mbitagihu̱ gä xatuäbihu̱ nzäntho; nuꞌmu̱ di nangihu̱ ꞌne nuꞌmu̱ di ähähu̱, nuꞌmu̱ di ñunihu̱, ꞌne nuꞌmu̱ di thogihu̱ yä xuñha. Hñeti Salmo 55:22 ꞌne Mateo 15:36.

3. ¿Por hanja yä kristianu di ntini ha yä mhuntsꞌi?

Rꞌabu̱ xä ñhei gä kuatꞌihu̱ Äjuä ngeꞌä di ꞌmu̱ihu̱ ko nuꞌu̱ yä jäꞌi hingi kamfri Äjuä ꞌne thedetho nuꞌmu̱ o̱de ge Äjuä ma dä hä nꞌa rä hogä mꞌu̱i habu̱ hindi ja yä tuhni (2 Timoteo 3:1, 4; 2 Pedro 3:3, 13). Hänge di jakägihu̱ mꞌe̱di gä muntsꞌihu̱ ko märꞌa yä kristianu, pa dä nupkägihu̱ mä mfenihu̱. Hñeti Hebreos 10:24, 25.

Mu̱ di muntsꞌihu̱ ko nuꞌu̱ yä jäꞌi di mädi Äjuä, ma dä maxkägihu̱ gä kuatꞌihu̱ Äjuä. Nuꞌu̱ yä mhuntsꞌi pe̱ꞌtsi yä testigo rä Jeoba, faxkägihu̱ ꞌne nupkä mä mfenihu̱ ngeꞌä ja di handihu̱ni hängu rä jamfri ꞌne rä mhäte pe̱ꞌtsi po Äjuä nuꞌu̱ märꞌa yä kristianu. Hñeti Romanos 1:11, 12.

4. ¿Hanja dä za gä kuatꞌihu̱ Äjuä?

Pa dä za gi kuatꞌi Äjuä, mähyoni gi ntso̱ꞌmi ꞌne gi mbeni xä ñho näꞌä xkä pädi ha rä Mäkä Tꞌofo. Hyandi xä ñho gatꞌho näꞌä xä hyoki Äjuä, pädi de nuꞌu̱ yä promesa ꞌne de nuꞌu̱ yä tsꞌofo. Mu̱ gä ntso̱ꞌmihu̱ ꞌne gä xatuäbihu̱ Äjuä, ma dä za gä handihu̱ hängu rä mhäte ꞌne rä mfädi pe̱ꞌtsi. Hñeti Josué 1:8 ꞌne Salmo 1:1-3.

Nuꞌi dä za gi kuatꞌi Äjuä pe nuꞌmu̱ gi kamfribi. Näꞌä jamfri pe̱ꞌtsi te gi su pa dä te ꞌne dä ze̱di. Nuꞌi dä za gi su ri jamfri mu̱ njatꞌä gi handi ꞌne gi ntso̱ꞌmi de nuꞌu̱ yä raso gi pe̱ꞌtsi pa gi kamfri Äjuä. Hñeti Mateo 4:4 ꞌne Hebreos 11:1, 6.

5. ¿Te mä jäpi ma gi hñäni mu̱ gi kuatꞌi Äjuä?

Rä Zi Dada Jeoba di su ꞌne turämu̱i po gatꞌho nuꞌu̱ yä jäꞌi di mädi. Jeoba pe̱ꞌtsi rä tsꞌe̱di pa dä ñängägihu̱ de nuꞌu̱ yä tsꞌo tꞌo̱tꞌe ne dä bekägihu̱ mä jamfrihu̱ ꞌne mä humu̱ihu̱ de gä pe̱ꞌtsihu̱ nꞌa rä te pa nzäntho (Salmo 91:1, 2, 7-10). Jeoba xikägihu̱ gä nsuhu̱ de nuꞌu̱ yä tsꞌo tꞌo̱tꞌe tsꞌoni mä nzakihu̱, mä tehu̱ ꞌne mä johyahu̱. ¡Jeoba utkägihu̱ hanja dä za gä pe̱ꞌtsihu̱ näꞌä rä mꞌu̱i mänꞌa xä ñho de gatꞌho! Hñeti Salmo 73:27, 28 ꞌne Santiago 4:4, 8.